Ձեր վստահելի աղբյուրը

Ադրբեջանի կողմից Լաչինի միջանցքն արդեն 50-րդ օրն է արգելափակված է, իրավիճակը մնում է վտանգավոր։ ՄԱԿ-ի արդարադատության միջազգային դատարանում Հայաստանն ընդդեմ Ադրբեջանի դատավարական լսումներում հայտարարեց Հայաստանի հայցը ներկայացնող փաստաբաններից Կոնստանտինոս Սալոնիտիսը։

«Իրավիճակն աստիճանաբար վատթարանում է։ Մարդասիրական ճգնաժամը շարունակվում է, և մտավախություն ունեմ, որ դա շարունակվելու է, եթե դատարանը հրատապորեն չմիջամտի»,- ընդգծեց նա։

Կոնստանտինոս Սալոնիտիսը ներկայացրեց շրջափակման հետևանքով Արցախի Հանրապետությունում տիրող իրավիճակը. «Ավելի քան 1000 անձ կտրված է ընտանիքից և ընկերներից, այդ թվում՝ հարյուրավոր երեխաներ: Պատկերացրեք, թե վերջին 50 օրերին ամեն րոպե այդ երեխաները, նրանց ծնողներն ինչ են զգացել: 

Ցուցարարները իսկապես  վերահսկում են այս անձանց կյանքը կամ մահը։ Քիմիաթերապիա հնարավոր չէ ստանալ, մարդիկ բուժում չեն ստանում արդեն 7 շաբաթ, այսինքն՝ քաղցկեղից բուժվելու շանսերը կամաց-կամաց զրոյանում են:

Այս պահին հարյուրավոր պլանային վիրահատություններ անժամկետ կասեցված են, հիվանդանոցների պալատները հնարավոր չէ բավականաչափ ջեռուցել, որ նվազագույն ջերմաստիճան ապահովվի: Դեղորայքի, մանկական սնունդի քանակը շատ քիչ է։

Գազամատակարարումն այս նիստից անմիջապես առաջ վերականգնվեց, բայց պարզ չէ, թե քանի ժամով կամ որքան ժամանակով:

Էլեկտրաէներգիայի հովհարային անջատումները նախկինի պես անհրաժեշտ են, որպեսզի  էլեկտրաէներգիայի ցանցը շարունակի կայուն գործել։

Դպրոց հաճախելու փոխարեն հազարավոր երեխաներ նստում են տանն առանց էլեկտրաէներգայի, դատակ սառնարանով, ոմանց պարագայում միայն փայտի վառարանի տաքությամբ։

Այս ամենի ազդեցությունը նրանց զարգացման վրա ամբողջովին ակնհայտ է։

Ողջ տնտեսական  գործունեությունը կանգ է առել»։

Այնուհետև նշեց. «Ցանկացած պնդում, թե այս իրավիճակը կարող է լուծվել այն չնչին մատակարարումներով, որոնք թույլ են տալիս տեղ հասցնել, ցինիզմի դրսևորումներ կլինի,  ինչպես նաև՝ ցանկացած պնդում, թե 120 հազար մարդկանց հրատապ ու ընթացիկ բուժօգնության համար ամեն անգամ պետք է Կարմիր խաչի միջազգային կոմիտեի հետ բանակցել ու կազմակերպել տեղափոխությունը,  կարծես պատերազմական իրավիճակ լինի:

Արգելափակումը պետք է ամբողջովին վերացվի: Եվ պետք է ապահովվի հանրային ծառայությունների անխոչընդոտ հասանելիությունը, որպեսզի այս դաժան արգելափակումից տուժողների համար հետևանքները վերացվեն: Սա միայն Հայաստանի եզրակացությունը չէ, սա նաև միջազգային հանրության եզրակացությունն է»,-ասաց նա:

Նա հիշեցրեց Ադրբեջանին ուղղված բազմաթիվ կոչերի մասին՝ անմիջապես լիովին դադարեցնել արգելափակումը՝ հրատապ կարգով երաշխավորելու անխոչընդոտ հասանելիությունը:

«Սա անհրաժեշտ է՝ խուսափելու մարդասիրական աղետից, որի ռիսկը օրեցօր ահագնանում է»,- ընդգծեց Կոնստանտինոս Սալոնիտիսը։

Նա հիշեցրեց, որ Ադրբեջանը չի կատարել նաև ՄԻԵԴ-ի որոշումը:

«Կոչերն անտեսվել են, Ադրբեջանը բացահայտ պարծենում է, թե ինչպես իրեն հնարավոր չէ կանգնեցնել, թե դա չի կարող անել միջազգային հանրությունը, և անգամ՝ Ստրասբուրգի դատարանի պարտադիր ուժ ունեցող որոշումն իրեն չի կարող կանգնեցնել»,- նշեց փաստաբանը։

Պրոֆեսոր Պիեր Գարժանն ասաց, որ  Ադրբեջանը 120 հազար մարդու ոչ ավել, ոչ պակաս պատանդ է վերցրել՝ նրանց կյանքն անհնարին, անտանելի դարձնելով, ծնկի բերելով, զրկելով ձմռան կեսին բոլոր էական կենսաապահովման միջոցներից բացառապես նրա համար, որ նրանք ազգությամբ հայ են. 

«Այս գործողության ակնհայտ նպատակը, որը կազմակերպել և որին սատարում է ադրբեջանական ռեժիմը, ծանուցելն է ԼՂ հայերին, որ նրանք շրջափակված և պաշարված են, եթե ուզում են մեկնել, թող մեկնեն։

Ադրբեջանը կարող է ինչքան ցանկանում է փաստարկներ բերել, ոչ մեկ չի հավատում նրանց բնապահպանական հեքիաթներին, այսպես կոչված քաղհասարակության ակտիվիստների նախաձեռնությանը մի երկրում, որը հայտնի է՝ որպես բռնապետական երկիր։ Ոչ ոք չի հավատում։

Ադրբեջանը պաշարում է Լեռնային Ղարաբաղը, քանի որ հայերն ուզում են շարունակել այնտեղ ապրել։ Միակ պատճառն է։ 

Ձեր դատարանը պարտավոր է գործել և դուք պետք է գործեք անհապաղորեն։ Եթե չհրահանգեք միջանկյալ միջոցներ, շուտով այլևս հայ մարդիկ չեն մնա ԼՂ-ում, նրանք կհեռանան իրենց կյանքը փրկելու համար, ինչպես նրանց կոչ է անում Ալիևը»։