Ձեր վստահելի աղբյուրը

Ավստրիայի դաշնային կանցլեր Կարլ Նեհամմերը վրացական կողմին առաջարկել է աջակցել այն առաջարկությունների իրագործման հարցում, որոնք հանրապետությանը թույլ կտան ստանալ ԵՄ թեկնածուի կարգավիճակ։ Լուրը հաղորդում է ՏԱՍՍ-ը:

«Պարոն վարչապետը (Իրակլի Ղարիբաշվիլին) ինձ ասաց, թե ինչ է արվել ԵՄ հանձնարարականների իրագործումն ապահովելու համար, և մեզ համար ակնհայտ է, որ դա հեշտ չէ իրականացնել, բայց արժե գնալ այս ուղղությամբ՝ ջանքեր գործադրելով, ավելի շատ ներդրումներ անելով, քանի որ այս գործընթացը ներքաղաքական առումով բազմաթիվ փոփոխություններ է բերելու։ Այս ուղղությամբ քաղաքական պատասխանատվություն ստանձնողների համար սա մեծ մարտահրավեր է, և ես պարոն վարչապետին առաջարկեցի բոլոր ուղղություններով աջակցություն մեր կողմից»,-ասել է նա երկուշաբթի օրը Թբիլիսիում Ղարիբաշվիլիի հետ բանակցություններից հետո կայացած մամուլի ասուլիսում։

Իր հերթին Ղարիբաշվիլին նշել է, որ հանրապետությունը կատարել է առաջարկությունների մեծ մասը, մնում է մի քանի օրենքների վերջնական ընդունումը, որոնք ուղարկվել են Վենետիկի հանձնաժողով՝ ստուգման։ Բացի այդ, Ղարիբաշվիլին վրացական ընդդիմությանը կոչ է արել անցնել կառուցողական աշխատանքի ռեժիմի՝ բևեռացման աստիճանը նվազեցնելու համար, ինչպես պահանջում է ԵՄ-ն։

2022 թվականի հունիսին ԵՄ առաջնորդները Մոլդովային և Ուկրաինային ԵՄ թեկնածուի կարգավիճակ շնորհեցին, սակայն հրաժարվեցին Վրաստանից՝ ճանաչելով միայն նրա եվրոպական հեռանկարը։ Նրանք ներկայացրել են 12 առաջարկություններ՝ ապագայում հանրապետությանը ԵՄ թեկնածուի կարգավիճակ շնորհելու համար, որոնք վերաբերում են կոռուպցիայի դեմ պայքարին, օրենքի գերակայության ամրապնդմանը, օլիգարխների դեմ օրենքի ընդունմանը, օմբուդսմենի ընտրության օրենսդրության բարելավմանը և այլ ասպեկտների: