Ձեր վստահելի աղբյուրը

«2022 թ.-ի դեկտեմբերին 12 ամսյա գնաճը շարունակել է նվազել և տավա վերջում կազմել է 8.3 %, 12 ամսա բնականոն գնաճն էլ կազմել է 9.5 %»,-հրավիրված ասուլիսում հայտնեց ԿԲ նախագահ Մարտին Գալստյանը:

Ընթերցելով ԿԲ խորհրդի որոշումը՝ Գալստյանն ասաց, որ ՀՀ միջազգային գործընկեր պետությունների տնտեսությունների ակտիվության դանդաղումը շարունակվել է, համաշխարհային գնաճը նույնպես նվազում է՝ պայմանավորված որոշ հումքային և պարենային ապրանքների գնային նվզամամբ, բայց ընդլայնված պահանջարկը  նպաստում է գնաճային իրավիճակի պահպանմանը:

Ըստ ԿԲ խորհրդի կանխատեսումների՝ զարգացած երկրների ԿԲ-ները կշարունակեն խստացնել դրամավարկային քաղաքականությունը, որը կնպաստի համաշխարհային պահանջարկի թուլացմանը և ապրանքահումքային գների ճշգրտմանը:

ԿԲ նախագահը հայտնեց, որ ակնկալում են համաշխարհային տնտեսությունից Հայաստանի տնտեսության վրա գնաճային ազդեցության թուլացում, սակայն տնտեսությունում բարձր ակտիվությունը պահպանվել է, որին նպաստել է ծառայությունների ոլորտում արտաքին բարձր պահանջարկը:

«Իրականացվող զսպող դրամավարկային քաղաքականության, դրամի արժևորման և արտաքին հատվածի գնաճային ազդեցության թուլացման արդյունքում ՀՀ ընդհանուր գնաճային միջավայրն աստիճանաբար մեղմվում է»,-ասաց Գալստյանը, և ընդգծեց, որ բարձր պահանջարկը արտահայտվում է աշխատուժի շուկայում և նպաստում աշխատավարձերի, առանձին ապրանքների և ծառայությունների գների աճին:

Նա հայտնեց, որ ԿԲ խորհուրդը նպատակահարմար է գտնում քաղաքականության տոկոսը թողնել անփոփոխ՝սահմանելով 10.75%:

«Խորհուրդը հետևողական է լինելու համարժեք գործողություններով ապահովել գների կայունացում և չեզոքացնելու գնաճային սպասումների ապախարսխման ցանկացած ռիսկ»,-խորհրդի որոշման համապատասխան դրույթը ներկայացրեց Գալստյանը՝ հավելելով, որ դրամավարկային նախանշված սցենարով12-ամսյա գնաճն աստիճանաբար կնվազի և 2023  թվականի երկրորդ կեսից կկայունանա նպատակային 4 % ցուցանիշի շուրջ, իսկ նախանշված ուղենիշիչ գնաճի շեղումները հավասարակշռված են և ռիսկերի դրսևորման դեպքում ԿԲ խորհուրդը համարժեքորեն կարձագանքի:

Պատախսխանելով լրագրողի հարցին՝ Մարտին Գալստյանը հայտնեց, որ, ըստ կանխատեսումների, տարվա ընթացքում արձանագրվելու է 4.6 % տնտեսական աճ՝ հիմնականում ծառայությունների ոլորտի աճի հետ կապված: