Ձեր վստահելի աղբյուրը

Թուրքիայում տեղի ունեցած հզոր երկրաշարժի հետևանքով զոհերի թիվը հասել է 3549-ի։ Այս մասին հայտարարել է նախագահ Ռեջեփ Թայիփ Էրդողանը, փոխանցում է «Ռիա Նովոստի»-ին։

«Մենք ունենք 3549 զոհ և 22168 վիրավոր: Մեզ համար ամենամեծ մխիթարությունն այն է, որ առ այսօր մեր ավելի քան ութ հազար քաղաքացիներ ողջ-ողջ փրկվել են փլատակներից»,- ասել է նա։

Էրդողանն ընդգծել է, որ տարերային աղետը ազդել է 10 Նահանգների վրա, որտեղ բնակվում է մոտ 13 միլիոն մարդ:

«Մենք բախվել ենք խոշորագույն աղետներից մեկին ոչ միայն հանրապետության պատմության մեջ, այլև աշխարհում»,- նշել է նա։

Նա նաև հայտարարել է տուժած շրջաններում երեք ամիս ժամկետով արտակարգ դրություն մտցնելու մասին։

Էրողանը հայտնել է, որ որոնողափրկարարական աշխատանքներում ներգրավված է ավելի քան 53 հազար մարդ, որոնց թիվը մշտապես ավելանում է Թուրքիայից և արտերկրից ժամանած թիմերի շնորհիվ։

Նա նաև ասել է, որ տուժածներին արդեն ուղարկվել է 54 հազար վրան, 102 հազար ներքնակ, առաջին անհրաժեշտության այլ պարագաներ։ Ընդհանուր առմամբ, իշխանությունները երկրաշարժի հետևանքների վերացման համար հատկացրել են 100 մլրդ լիրա՝ ավելի քան 5,3 մլրդ դոլար։

Հիշեցնենք, որ փետրվարի 6-ին, վաղ առավոտյան 7,4 մագնիտուդ ուժգնությամբ երկրաշարժ է տեղի ունեցել Թուրքիայի Քահրամանմարաշ նահանգում։ Երկրաշարժից տուժել են նաև Սիրիայի Հալեպ, Լաթաքիա, Համա և Տարտուս նահանգներին։ Այնտեղ, վերջին տվյալներով, զոհվել է 711 մարդ, տուժել՝ 1431-ը։

Ժամեր անց, մոտավորապես 14:25-ին տեղի է ունեցել ևս մեկ երկրաշարժ՝ 7,6 մագնիտուդով։ Թուրք սեյսմոլոգների տվյալներով՝ ամենաշատ տուժած քաղաքներից մեկը Գազիանթեփն է։

Ավելի ուշ փորձագետները երեք տասնյակ հետցնցումներ են գրանցել, իսկ օրվա կեսին՝ նոր հզոր ցնցումներ՝ 7,7 մագնիտուդով։ Երկրաշարժը զգացվել է Լիբանանում, Իրաքում, Իսրայելում, Վրաստանում, Աբխազիայում, փոքր հետցնցումներ են գրանցվել Սոչիում։