Ձեր վստահելի աղբյուրը

«Հիմնական շեշտը դնում են՝ վայ, տեսեք,  զորամասեր են վաճառել։ Բարեբախտաբար, դատախազն ասաց, որ դրանք չգործող զորամասեր են եղել, և հարցադրումը՝ Նախիջևանի սահմանին զորամաս է վաճառվել, տեղին չէր»,- ԱԺ-ում լրագրողների հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը՝ անդրադառնալով այսօր ԱԺ-ում «Հայաստան» խմբակցության ղեկավար, ՀՀ պաշտպանության նախկին նախարար Սեյրան Օհանյանի նկատմամբ քրեական հետապնդում հարուցելուն համաձայնություն տալու մասին միջնորդագրի քննությանը, որին ընդդիմադիր պատգամավորները չեն մասնակցել։

Նա ասաց, որ բերել է 2022 թ. ապրիլի 15-ի Նիկոլ Փաշինյանի ստորագրությամբ մի փաստաթուղթ. «ՊՆ-ի թվով 71 գույք փոխանցվում է պետական գույքի կառավարման կոմիտեին, որպեսզի հետո օտարվի, վաճառվի: Այստեղ 71 զորամասի հասցե է, «ստալիչնի պոլկ»-ն էլ մեջը, տարբեր քաղաքների զորամասեր:  Հիմա ի՞նչ՝ հայտարարենք, որ զորամասեր են վաճառվո՞ւմ: Ոչ, պարզապես այս զորամասերը չգործող են և նույնիսկ  դրանց պահպանությունը ՊՆ-ի համար բեռ է, դրա համար  դրվել է վաճառքի»։

Դիտարկմանը, որ գլխավոր դատախազն ասաց, որ դրանք պետական շահի տեսանկյունից չեն օտարվել, Գեղամ Մանուկյանն արձագանքեց. «Արշակունյաց պողոտաի վրա եղած 6 հեկտարանոց զորամասը վաճառելը պետական շահի տեսանկյունի՞ց է, թե՞ ոչ: Կրկնում եմ՝ խոսքը երկու չգործող փոքր զորամասի մասին է:

Շատերը Արարատի ճանապարհին կտեսնեն, մինչև հիմա անխնամ մնացել են, որոնք իրենց ֆունկցիան վաղուց ավարտած են եղել: Դրանք համարենք պետական շահին վնա՞ս, թե՞ ոչ: Սա պարզապես շոու է:

Հիմա ես հրապարակեմ 71 անուն գույք ու ասեմ՝ Սուրեն Պապիկյանը վաճառե՞լ է: Քանի որ չգործող զորամաս է, ՊՆ-ն նպատակահարմար չի գտնում իր հաշվեկշռում պահել՝ հոսանք ծախսի, պահակ պահի, բազմաթիվ այլ հարցեր, դրա համար տալիս է սեփականաշնորման, օտարման:

Ազատ գյուղում տեղի ունեցած ողբերգության հաջորդ օրը գլխավոր դատախազը եկել էր Սեյրան Օհանյանի, և մի քանի օր հետո Արմեն Չարչյանի միջնորդությամբ: Երկու շաբաթ իրենք որևէ իրավական գործընթաց չէին արել, այսօր միայն ԱԺ-ն կարող էր այդ հարցը քննարկել, ինչո՞ւ երկու շաբաթ առաջ եկան: Հասարակության ուշադրությունը Ազատ գյուղում տեղի ունեցած ողբերգությունից շեղելու համար էր»։

Նա նշեց, որ տարիներ կանցնի, Աննա Վարդապետյանի փոխարեն կլինի այլ դատախազ, և Սուրեն Պապիկյանին Նիկոլ Փաշինյանի հետ կգամի անարգանքի սյունին՝ «ստալիչնի պոլկը» վաճառելու համար, որն անարդար է, անարդար է:

«Տա Աստված, հետագայում Հայաստանում այլ իշխանությունների պարագայում նման էժանագին շոուներով իշխանությունը չծանրաբեռնի իր աշխատանքը և երկրի հաամր կարևորագույն ռազմավարական հարցերի մասին մտածի»,- ասաց ընդդիմադիր պատգամավորը:

Նա կարծում է, որ իշխանությունը չի գնա Սեյրան Օհանյանի կալանավորմանը. «Խելագարության սահման կա, էլի՞։ Իշխանությունները խելագարության սահմանները շատ են անցել, բայց, կարծում եմ, այս հարցում չեն անցնի»: