Ձեր վստահելի աղբյուրը

«Ինչպես է ստացվել, որ ՀԱՊԿ դիտորդական առաքելությունը չի ժամանում Հայաստան, իսկ Եվրամիության դիտորդական առաքելությունը ժամանում է։ Իմիջայլոց, ուզում եմ ասել, որ մեր ՀԱՊԿ գործընկերներն արձանագրել են, որ այդ առաջարկը շարունակում է  մնալ ուժի մեջ, ինչի համար շնորհակալ ենք»,- ԱԺ-ում կառավարության հետ հարցուպատասխանի ժամանակ ասաց Նիկոլ Փաշինյանը։

Նա նշեց, որ իրենք ՀԱՊԿ-ի պարագայում հստակ ձևակերպել են խնդիրը. «Մենք ՀԱՊԿ-ից խնդրել ենք ամենակարևոր սկզբունքային մի բան՝ ճշգրտել ՀԱՊԿ  պատասխանատվության գոտին Հայաստանի Հանրապետությունում։ Այսինքն մեզ ասել իրենց պատկերացումը, թե որն է  Հայաստանի Հանրապետությունը։ Մենք այս հարցի հստակ պատասխանը չենք ստացել։

Մյուս կողմից Եվրամիության քաղաքացիական առաքելության գործուղումն ինչո՞ւ է հնարավոր դարձել։ Որովհետև Պարահայում տեղի ունեցած քառակողմ հանդիպման արդյունքում ԵՄ-ն հստակ գծագրել է, այդ թվում Հայաստանի և Ադրբեջանի մասնակցությամբ և համաձայնությամբ, թե որն է Հայաստանի Հանրապետությունը, այսինքն իրենք ասել են, որ մեր պատկերացմամբ ՀՀ քարտեզը սա է, կամ մենք ենք ասել, իրենք էլ դա ընդունել են ի գիտություն և հաստատել են։

Իրենք գալիս են այդ տարածքը մոնիտորինգ անելու, դիտելու։ Առանց այս առաքելության և տարածքի մասին պատկերացման՝ դիտորդական առաքելությունը կլինի առնվազն տարօրինակ, քանի որ իրենց համար պարզ չէ, թե իրենք ինչ են դիտում, որովհետև հարցն առաջացել է այն իրավիճակից, երբ Ադրբեջանն օկուպացրել է ՀՀ տարածքներ։ Եթե որևէ առաքելություն չգիտի, թե որն է ՀՀ տարածքը, ո՞նց է ինքը դիտարկելու՝ օկուպացվա՞ծ է  ՀՀ տարածքը, թե օկուպացված չէ»։

Նա նաև ասաց, որ մինչև ԵՄ առաքելությունը, Ադրբեջանը արևմտյան հարթակներում իր ագրեսիվ գործողություններն ընդդեմ Հայաստանի բացատրում էր նրանով, որ Հայաստանը,  կոնկրետ  ՀՀ վարչապետն ավելի ու ավելի շատ ռուսական զորքեր է բերում ու տեղակայում Հայաստան-Ադրբեջան սահմանին, և պատրաստվում է  հայ-ռուսական համատեղ ագրեսիվ հարձակում Ադրբեջանի դեմ, և Ադրբեջանն իր ագրեսիվ  հարձակումներով պարզապես փորձում է շատ թե քիչ հավասարակշռել իրավիճակը իր խոցելիությունները կառավարելու համար ու այս գործընթացը շարունակվում էր։

«Արևմուտքում Հայաստանը փորձ էր արվում ներկայացնել որպես Ռուսաստանի ագերսիվ քաղաքականության մասնակից, իսկ ՌԴ-ում փորձ էր արվում ներկայացվել որպես  Արևմտյան դավադրության մասնակից։ Քանի որ ՌԴ գործընկերները տեղում ունեին ներկայացուցուցիչներ, և արևմտյան մեր գործընկերները սկսել էին մեզ խեթ նայել, թե դուք, փաստորեն, հիմա իրականում պատրաստվում եք ագրեսիվ  գործողություններ իրականացնել, որովհետև այնտեղ հայկական և ռուսական զորքերի մեծ կուտակումներ կան, պատրաստվում եք հարձակվել Ադրբեջանի վրա, խեղճ  ադրբեջանցիները ստիպված բարձունքներ են ուզում գրավել, որպեսզի հավասարակշռեն, մենք ասացիքն՝ եկեք, դուք տեղում դիտարկեք ու տեսեք՝ այդ ամեն ինչն իրականությանը համապատասխանո՞ւմ է, թե ոչ։

Բայց անկյունաքարային դրույթն այն է, ինչ որ ասացի առաջին մասում»,- ասաց Նիկոլ Փաշինյանը։