Ձեր վստահելի աղբյուրը

«Գեղարքունիքի մարզի Ազատ գյուղում տեղի ունեցած ողբերգությունը պետք է դառնա մեր հասարակության համբերության վերջին կաթիլը։ Մեր հասարակությունը այսուհետ պետք է ամեն ինչ անի խաղաղ պայմաններում որևէ զոհի գոյությունը բացառելու համար, մեր բանակի պետք է դադարի լինել մահվան բանակ»,-լրագրողների հետ հանդիպմանը հայտարարեց փաստաբան Նորիկ Նորիկյանը։

Նա  ստանձնել է Գեղարքունիքի մարզի Ազատ գյուղում ինժեներասակրավորական վաշտի կացարանում հունվարի 19-ին բռնկված հրդեհի հետևանքով մահացած 15 զինծառայողներից 13-ի մերձավոր ազգականների՝ որպս տուժողների լիազոր ներկայացուցչի կարգավիճակը։

Փաստաբանը հայտարարեց, որ զոհված զինծառայողների ծնողները չեն հավատում պաշտոնական վարկածին, չեն վստահում պետական մարմինների կողմից արտահայտված որոշակի դիրքորոշումներին։

«Նրանք ունեն մտահոգություն, որ փորձ է արվելու ծածկադմփոց անել այս գործը։ Ծնողները համոզված են, որ իրենց երեխաները հդեհից առաջ ողջ չեն եղել կամ առնվազն անգիտակից են եղել, իսկ բուն հրդեհն ինչ-որ հետքեր թաքցնելու կամ էլ հասարակության ուշադրությունը շեղելու նպատակով է։ Եթե անկեղծ, ծնողները ճիշտ էլ անում են, որ չեն վստահութ քննության պաշտոնական վարկածին, քանի որ դեպքից հետո որոշ շրջանակների դրսևորած հակասական, ոչ պրոֆեսիոնալ, հակաօրինական վարքագիծը տվել է այդ հիմքերը»,-ասաց փաստաբանը։

Նորիկյանն ուշադրություն հրավիրեց այս գործի շուրջ գործադիր մարմնի ներկայացուցիչների ու այլ պաշտոնյաների թույլ տված կոպտագույն խախտումների վրա։

«Դեպքի օրը կառավարության նիստից տպավորության ստացա, որ ի դեմս Հայաստանի կառավարության գործ ունենք արտակարգ դատարանի հետ, որտեղ տեղի է ունենում դատավարություն, որտեղ վարչապետ Նիկոլ Փաշինյանը հանդես է գալիս միաժամանակ մեղադրողի ու դատավորի դիրքերից՝ ներկայացնելով ինչ-որ վարկած. նաև թե ինչ է եղել, ովքեր են մեղավոր, ովքեր պետք է պատասխան տան»,-ասաց նա։

Բանախոսն ասաց՝ ասուլիսից առաջ ևս մեկ անգամ վերընթերցել է սահմանադրաքրեաիրավական կարգավորումները։

«Գործող վարչապետը, անկախ անձից, գործող Սահմանադրության, «Կառավարության կառուցվածքի և գործունեության մասին» օրենքի, ինչպես նաև «Քրեական դատավարության» մասին օրենքով սահմանված կարգով որևէ իրավասություն չունի որևէ քրեական գործի վարույթի մասին որևէ կարծիք հայտնել, որևէ տեղեկություն կամ վարկած շրջանառության մեջ դնելու, բացատրություններ ներկայացնելու կամ զեկույցներ ստանալու։ Կառավարության որևէ այլ անդամ նույնպես որևէ իրավասություն չունի որևէ քրեական վարույթի վերաբերյալ»,-ասաց նա։

Փաստաբանը նշեց, որ նույն նիստում հայտարարություններ են արել նաև Սուրեն Պապիկյանը, Արգիշտի Քյարամյանը, հայտարարվել է պաշտոնանկությունների մասին։

«Ես ձեզ որպես իրավաբան եմ ասում, օրինական է միայն կորպուսի հրամանատարի ազատումը։ Ես իհարկե հասկանում եմ, թե ինչի համար են արվել այդ պահին պաշտոնանկությունները՝ հանրության զայրույթը մեղմելու  համար»,-ասաց նա։

Նորիկյանն ընդգծեց՝ մտավախություն կա, որ այս գործը չի բացահայտվի, մեղավորները չեն պատժվի, հերթական անգամ գործ կունենան սլաքավարներին պատասխանատվության ենթարկելու հետ։

«Մեր հետևողական աշխատանքի շնորհիվ պետք է հասնենք այն բանին, որ բոլոր մեղավորները բացահայտվեն ու ենթարկվեն պատասխանատվության»,-նշեց նա։

Քննչական կոմիտեն այս գործի վերաբերյալ մասնավորապես հայտնել է.

«19․01․2023թ-ին՝ ժամը 00։40-ի սահմաններում, անձնակազմի հիմնական մասը գտնվել է զորանոցում՝ քնած, իսկ  2 ժամկետային զինծառայող վարորդները գնացել են աղբյուրից ջուր բերելու։ Օրվա հերթապահը գտնվել է կացարանից քիչ հեռու գտնվող խոհանոցում և խոսել է բջջային հեռախոսով։ Այդ ընթացքում վաշտի պատասխանատու կապիտանը հերթապահ ժամկետային զինծառայողից հարցրել և տեղեկացել է  վառարանը վառելու նպատակով ավտոկայանատեղիում՝ ինժեներական աշխատանքներ իրականացնող տեխնիկայի գործարկման սարքավորումը (մեկնարկիչը) լիցքավորելու համար նախատեսված ավտոբենզինի առկայության մասին։ Այնուհետև 5 լիտր տարողությամբ պլաստամսե տարայում գտնվող ավտոբենզինով փորձել է վառել վառարանը։

Այս հանգամանքը փաստվում է նաև վկաների տված ցուցմունքով առ այն, որ այդ հատվածում եղել է բենզինով լցված 5 լիտրանոց 10 տարա, մինչդեռ դեպքի վայրի զննությամբ այնտեղ հայտնաբերվել է 9-ը։

Վառարանն ավտոբենզին լցնելուց հետո բոց է բռնկվել, որի հետևանքով պատասխանատու կապիտանը, այրվածքներ ստանալով, մեխանիկորեն իր ձեռքի ավտոբենզինով լի տարան նետել է մի կողմ, որն ընկել է կացարանի մեջ, ապա տվյալ օրվա վերակարգում գտնվող մեկ այլ ժամկետային զինծառայողի հետ, ով նույնպես ստացել է այրվածքներ, մի կերպ կարողացել են դուրս գալ կացարանից։

Կացարանի ողջ տարածքով կրակի արագ տարածման հետևանքով զինծառայողները չեն կարողացել կացարանի մուտքով դուրս գալ, սակայն դրսում գտնվող պարտադիր ժամկետային զինծառայողները կարողացել են 2 ժամկետային զինծառայողի օգնել դուրս գալ զորանոցից։

Դրսում գտնվող ժամկետային զինծառայող վարորդներից մեկը «Ուրալ» մակնիշի  ավոտմեքենայով երկու անգամ հարվածել է կացարանի պատին՝ անցք բացելու և համածառայակիցներին այնտեղից դուրս բերելու նպատակով, որի արդյունքում պատի որոշակի հատված քանդվել է։ Սակայն կրակի արագ տարածման պատճառով կացարանում գտնվող մյուս զինծառայողներին չեն կարողացել դուրս բերել, որի արդյունքում թվով 15 ժամկետային զինծառայողներ մահացել են։ Նրանց դիերը դուրս են բերվել հրդեհը մարվելուց հետո»։