Ձեր վստահելի աղբյուրը

Հայաստանում վերջին օրերին սուր շնչառական վարակներով հիվանդացության կայունացում է նկատվում, նախորդ շաբաթվա համեմատ հիվանդացությունը գտնվում է միևնույն մակարդակի վրա։ Այս մասին Panorama.am-ի հետ զրույցում հայտնեց ԱՆ ՀՎԿԱԿ-ի վարակիչ և ոչ վարակիչ հիվանդությունների վարչության համաճարակաբան Եվգենյա Խաչատրյանը։

Նրա խոսքով, մարզերում էլ միջին ակտիվություն է արձանագրվել, Արմավիրի ու Վայոց Զորի մարզերում հիվանդացության մի փոքր նվազում է նկատվել։

«Ընդհանուր դեպքերի 68 տոկոսը կազմում են 0-18 տարեկան երեխաները, 30 տոկոսը՝  30 տարեկանից բարձր անձինք։ Ինչպես եվրոպական տարածաշրջանի երկրներում, այնպես էլ Հայաստանում առավել շատ տարածված է ու շրջանառվում է գրիպի Ա տեսակի H1N1 ենթատեսակը, սակայն արձանագրվում են նաև Ա տեսակի H3 ենթատեսակը, ինչպես նաև Բ տեսակի հարուցիչներ»,-մանրամասնեց համաճարակաբանը։

Օրվա կտրվածքով իրականացրած մշտադիտարկման արդյունքում այսօր՝ փետրվարի 9-ին  ամբուլատոր պոլիկլինիկական կազմակերպություններ դիմել է 1013 պացիենտ, որից 68 տոկոսը 0-18 տարեկան երեխաներն են։

Շտապ օգնության կանչերն էլ են մի փոքր նվազել նախորդ օրվա համեմատ, այսօր 92 կանչ է գրանցվել սուր շնչառական վարակների հետ կապված։

«Ծանրաբեռնվածությունն ընկած է մանկական ստացիոնար կազմակերպությունների վրա։ Այսօր Հայաստանի տարածքում ստացիոնար բուժում է ստանում սուր շնչառական հիվանդություն ունեցող 506 պացիենտ, որի 90 տոկոսը 0-18 տարեկան երեխաներն են։ Նախորդ օրվա համեմատ մի փոքր նվազում ունենք, ինչպես ասացի, այս պահի դրությամբ մի փոքր կայունացում ունենք»,-նշեց Եվգենյա Խաչատրյանը։

Այս պահին հանրապետության բուժհաստատություններում ստացիոնար բուժում է ստանում թոքաբորբով 184 հիվանդ, նրանց 32 տոկոսը 0-18 տարեկան երեխաներ են։

«Եթե օրվա կտրվածքով համեմատենք, էլի մի փոքր նվազում ունենք։ Սակայն ուզում եմ ընդգծել, որ մենք դեռ գտնվում ենք գրիպի սեզոնում, որի ընթացքում կարող ենք ունենալ պիկեր ու կայունացում։ Գրիպի սեզոնը սկսում է հոկտեմբերից, շարունակվում մինչև ապրիլ-մայիս։ Կայունացումը, կարծում եմ, պայմանավորված է եղանակային փոփոխություններով, մի փոքր տաքացումով, կարծում եմ արդյունք են տվել նաև հորդորները՝ հաճախ օդափոխել փակ տարածքները, հիվանդ երեխաներին չուղարկել ուսումնական հաստատություններ։ Չեմ բացառում, որ կրկին սրացումներ լինեն։ Մենք դեկտեմբեր-հունվար ամիսներին ունեցել ենք պիկ։ Գրիպի դեմ պատվաստումը հիվանդության կանխարգելման ամենարդյունավետ միջոցն է»,-նշեց կենտրոնի համաճարակաբանը։

Ե. Խաչատրյանը խորհուրդ է տալիս հաճախ լվանալ ձեռքերը, մարդաշատ վայրերում, քաղաքային տրանսպորտում դիմակ կրել, հագնվել եղանակին համահունչ, պահպանել հազալու, փռշտալու կանոնները, չշփվել հիվանդների հետ։

Հնարավո՞ր  է հիվանդացության կայունացումը պայմանավորված լինի վերջին օրերին ձյան տեղումներով, քանի որ ժողովուրդն ասում է՝ ձյունը մաքրում է օդը վիրուսներից։ Հարցին ի պատասխան համաճարակաբանը նկատեց՝ ապացուցված չէ։

Կենտրոնի մասնագետը խորհուրդ տվեց որևէ դեպքում ինքնաբուժմամբ չզբաղվել, առանց բժշկի նշանակման հակաբիոտիկներ չընդունել։

«Գրիպի ու սուր շնչառական հիվանդությունների ախտանշանները  շատ բազմազան են՝ սկսած քթահոսությունից, ջերմության բարձրացումից, հազից, կոկորդի ցավից։ Սակայն գրիպին բնորոշ են ջերմության կտրուկ բարձրացումը, մկանային ցավերն ու ընդհանուր թուլություն։ Տան պայմաններում բուժման դեպքում հնարավոր է հատկապես փոքրահասակ երեխաների մոտ բարդությունների զարգացում՝ ականջաբորբեր, բրոնխիտ, աչքերի բորբոքում, թոքաբորբ։ Մեր հորդորն է, եթե երեխայի մոտ գանգատները շարունակվում են երկու օրից ավելի, պետք է  պարտադիր դիմել բժշկի, տանը չզբաղվել ինքնաբուժմամբ, հակաբիոտիկներ անհարկի  չօգտագործել։ Ընդգծում եմ՝ դրանք չեն օգնում  վիրուսային վարակներին, դրանք օգնում են այն ժամանակ, եթե վիրուսային վարակին միացել է ինչ-որ մանրէային վարակ, որի դեպքում հակաբիոտիկն իր ազդեցությունը կունենա, բայց դա որոշվում է միայն բժշկի կողմից»,-ասաց նա։

Կրթության, գիտության, մշակույթի ու սպորտի նախարարությունից Panorama.am-ին հայտնեցին, որ այս պահին հիվանդացության պատճառով հեռավար ուսուցման անցած որևէ ուսումնական հաստատություն չկա։ Դպրոցն անցնում է հեռավար կրթության, եթե  աշխատողների և սովորողների ընդհանուր թվի 10 և ավելի տոկոսի շրջանում արձանագրվում է  հիվանդության վարակման դեպք։