Ձեր վստահելի աղբյուրը

«Նախագծերի փաթեթի նպատակը Ազգային անվտանգության մարմիններում ատեստավորման նոր համակարգի ներդրումն է, դրա արդյունքում առավել բարձր վարձատրության նախատեսումը, ինչպես նաև ծառայողների մասնագիտական պատրաստվածության պատշաճ մակարդակի ապահովումը»,-կառավարության նիստում հայտնեց ԱԱԾ տնօրեն Արմեն Աբազյանը՝ զեկուցելով «Ազգային անվտանգության մարմիններում ծառայության մասին» օրենքում փոփոխություններ և լրացումներ կատարելու մասին» ու «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություն կատարելու մասին» օրենքների նախագիծը:
:

Նա ասաց, որ Ազգային անվտանգության մարմիններում պետական սահմանի պահպանության, հետախուզական, հակահետախուզական, օպերատիվ հետախուզական գործունեության իրականացման, հատուկ առաջադրանքների կատարման, պլանավորման և վերահսկման գործառույթներ իրականացնող ծառայողների համար ատեստավորման արդյունքում կհաշվարկվի հավելավճար:

Տեղեկացնելով, որ այդ պաշտոնները զբաղեցնող ծառայողներն ատեստավորմանն առաջին անգամ կմասնակցեն կամավորության սկզբունքով՝ ԱԱԾ տնօրենը հայտնեց. «Յուրաքանչյուր հաջորդ ատեստավորումը կիրականցվի երեք տարին մեկ անգամ: Ատեստավորման բացասական արդյունքի դեպքում ծառայողը կրկին ատեստավորում անցնելու համար մեկ տարվա ընթացքում երկու անգամ դիմելու հնարավորություն կունենա»:

Նա ասաց, որ, օրենքի նախագծի համաձայն՝ ատեստավորման ընթացակարգը, հաշվարկվող հավելավճարների չափերն ու վճարման կարգը սահմանվելու են Կառավարության որոշմամբ

«Մենք այս փուլում գործընթացն այս տրամաբանությամբ իրականացնում ենք այն մարմիններում, որտեղ իրականացվում է մարտական ծառայություն»,-ատեստավորման գործընթացի տրամաբանությունը ներկայացրեց Փաշինյանը: