Ձեր վստահելի աղբյուրը

«Վերջին տարիներին ես հասկացել եմ մի բան, որ մենք այլևս չպետք է խոսենք օրենքներից, դատավորների, դատախազների կամ նախաքննական մարմինների ապօրինություններից, քանի որ այսօր շատ ավելի կարևոր արժեքներ են ոտնահարվում»,- Այլընտրանքային նախագծեր խմբի նախաձեռնությամբ հրավիրված «Իրավական տեռոր՝ կենսական վտանգների շեմին» թեմայով քննարկմանն ասաց փաստաբան Լուսինե Սահակյանը։

Նրա խոսքով՝ ինքն այն փաստաբանների թվին է դասում, որոնք եթե տարբեր գործերում գտնում էին, որ կա օրենքի խախտում կամ խնդիրներ օրենքներում խնդիրներ, դրա մասին բարձրաձայնում էին՝ ակնկալելով հասարակության աջակցությունը։ Մինչդեռ, ըստ նրա, վերջին տարիներին հասկացել են, որ դա անիմաստ է։

«Ինչո՞ւ։ Իշխանությունները հասան նրան, որ երբ հասարակությանն ասում են՝ մեզ տվեք մուրճ, քլունգ և այլն, մենք գնալու ենք ապօրինություն անելու, մարդիկ գտնում են, որ դա նորմալ է։ Իրենք հասարակությանն այդպես դաստիարակեցին, որ ապօրինություն կատարելը համարվի նորմալ։ Մինչդեռ առողջ հասարակությունը դրա դեմ կընդվզեր, իսկ եթե ունենք հիվանդ հասարակություն, բնականաբար, չեն էլ գիտակցում, որ այս գործողությունների արդյունքը շատ ավելի վատ է լինելու իրենց համար»,- ասաց փաստաբանը։

Այսպիսով, ըստ Լուսինե Սահակյանի պարզվեց, որ իրականում հասարակությանն այդքան էլ լավ չեն ճանաչում, շատ ավելի լավ կարծիք ունեին, քան իրականում է։ 

«Ստացվում է, որ մարդիկ իրականում չէին ցանկանում լավ ապրել, այլ ցանկանում են, որ իրենց հարևանը վատ ապրի։ Եւ այս գաղափարը իշխանություններն ավելի զարգացրեցին։ Եթե տարիներ առաջ մտածում էինք սոցիալական վիճակի վատթարացումով «պայթուն» կառաջանա, հիմա  իշխանությունները հասարակությանն ասում են՝ կարևոր չէ, թե դու լավ կապրես, թե ոչ, սպասիր այնպես անեմ, որ մյուսն էլ վատ ապրի։ Եւ այդ մուրճի գաղափարը բերեցին իրավական համակարգ»,- ընդգծեց նա։

Լուսինե Սահակյանի խոսքով՝ հիմա ստացվում է այնպես, որ իշխանությունները ապօրինություններ են գործում, իսկ մարդիկ դրա համար ուրախանում են։

«Ապօրինի կալանավորում են, ապօրինի դատում են և մարդիկ չեն ասում՝ ինչու է ապօրինություն կատարվում։ Արդյունքում, կարևորագույն գաղափարներն արժեզրկվել են։ Հասել ենք նրան, որ հայրենիքը մեզ համար այլևս կարևոր չէ, հողերը կարևոր չեն։ Մեր երեխաների կյանքը արժեզրկվեց, քանի որ այդքան երեխաների կորուստն այլևս ոչ մեկին չի զարմացնում»,- ասաց Լուսինե Սահակյանը։