Ձեր վստահելի աղբյուրը

«Հայաստանի իրավապահ համակարգն այսօր ակնհայտորեն չունի անկախություն և վերածվել է իշխող քաղաքական ուժի կամակատարի»,- ասաց իրավապաշտպան, «Իրավական ուղի» ՀԿ համահիմնադիր Ռուբեն Մելիքյանը, որը մասնակցում է «Իրավական տեռոր՝ կենսական վտանգների շեմին» թեմայով պանելային քննարկմանը։

Նրա խոսքով, իրավապահ մարմինները դարձել են իշխող քաղաքական ուժի  քարոզչության կամակատարները։

«Մենք ունենք իշխանություն, որի հիմնական, գուցե միակ խնդիրն իշխանության մնալն է, որը որևէ այլ շահ չի գերադասում իրենց՝ իշխանության մնալու շահից, մնացած ամեն ինչ երկրորդական, երրորդական, չորրորդական է, առաջնային է իշխանության մնալու դիվային մոլուցքը։ Այդ նպատակի համար կան որոշակի բլոկներ, որոնցից մեկն էլ քարոզչականն է, իրավապահ համակարգը դարձել է հենց այս բլոկի սպասարկուն»,-ասաց Մելիքյանը։

Բանախոսը նշեց՝ նման համոզման եկել է քրեական հետապնդումներին հետևելուց հետո, որոնք բովանդակազուրկ են, խտրականության, օրենքի կամայական մեկնաբանման դրսևորումներ են, որոնք որևէ քրեական հետևանք չեն կարող առաջացնել, որոշ դեպքերում վաղեմության ժամկետներն են անցած, որոշ դեպքերում այդ հոդվածներն են ապաքրեականցված։

«Հետևաբար այդ մարդիկ որևէ պատժի չեն կարող ենթարկվել, ուրեմն ինչո՞ւ է մեր իրավապահ համակարգն այս խնդիրների մեջ դրանցով զբաղվում՝ թմրանյութերի շրջանառության ծավալն է մեծացել, բռնությամբ զուգորդված հանցագործություններն են ավելացել, հազար ու մի բան կա, բայց իրավապահները հսկայական ռեսուրս են ծախսում այն գործերի վրա, որոնք որևէ ապագա չունեն, որևէ արդյունք չի լինելու այդ գործերով։ Դրա միակ նպատակը քարոզչական է»,-ասաց իրավապաշտպանը։

Մելիքյանն ընդգծեց՝ Փաշինյանը վերցնում է  ինչ-որ ֆիգուրներ ու շարում խաղատախտակի վրա, ինչպես օրինակ, իրավաբանական ոլորտում չաշխատած, նույնիսկ այդ ժամանակ իրավաբանական կրթություն չունեցող Երանուհի Թումանյանցը նշանակվեց արդարադատության նախարարի տեղակալ կամ Սեդա Սաֆարյանը՝ ՍԴ դատավոր։

«ՍԴ դատավորները հեղինակության ինչ-որ աստիճան պետք է ունենան, ես չեմ ուզում գնահատականներ տալ, քանի որ անգամ ավելորդ է դրա մասին խոսել։ Մարդ, որը ՍԴ դատավոր դառնալուց հետո շարունակում է զբաղվել փաստաբանությամբ։ Ծիծաղելի է, բայց այդ մարդը բնականաբար պետք է հայտնվեր Սահմանդրական դատարանում, քանի որ անհրաժեշտ է, որ շախմատ խաղացողի հրանհանգները կատարի, երբ ասեն՝ ձի F3, ձին կատարի հենց այդ քայլը, ոչ թե օրինակ H3»,-ասաց քննարկման մասնակիցը։

Իրավապաշտպանն այս ամենի գագաթնակետն ու պսակն է համարում Կարեն Անդրեասյանի նշանակումը ԲԴԽ նախագահի պաշտոնում, Գրիգոր Մինասյանի նշանակումը ԱՆ պաշտոնում։

«Բոլորը լավ գիտեն, որ այդ մարդիկ մոտ ընկերներ են։ Այսինքն այստեղ գործում է մեկ կամք, ակնհայտ է, որ այստեղ որոշում կայացնում է Կարեն Անդրեասյանը։ Օրինակ, նիստերից մեկում լսվում է, որ  դատավորներից մեկն ասում է՝ սա ապօրինի է, Անդրեասյանը հակադարձում է՝ ոչ, ապօրինի չէ։ Հիմա իր ընկերը բերում է միջնորդություն, իրենք հաստատում են, քանի որ Կարեն Անդրեասյանն իրավաբանությունից գլուխ է հանում, երբեմն էլ մերժում է միջնորդությունները, որ ցույց տա իբր լինում են նաև մերժումներ, բայց դա իրերի վիճակը չի փոխում։ Այս ամենի կիզակետում ԲԴԽ-ն է»,-մանրամասնեց Մելիքյանը։