Ձեր վստահելի աղբյուրը

ԱՄՆ վարչակազմի պաշտոնյաները փետրվարի 13-16-ը Սաուդյան Արաբիայում խորհրդակցություններ կանցկացնեն Պարսից ծոցի համագործակցության խորհրդի (ՊՀՀ) երկրների ներկայացուցիչների հետ Իրանի, հակաօդային պաշտպանության (ՀՕ) և ահաբեկչության դեմ պայքարի հետ կապված հարցերի շուրջ: ՏԱՍՍ-ը գրում է, որ այդ մասին ասվում է ԱՄՆ Պետդեպարտամենտի ուրբաթ օրը տարածած հայտարարության մեջ։

Ինչպես երևում է փաստաթղթից, ամերիկյան միջգերատեսչական պատվիրակությունը «կմեկնի Սաուդյան Արաբիա՝ մասնակցելու Փետրվարի 13-16-ը կայանալիք ՊՀՀ-ի աշխատանքային խմբերի հանդիպումներին»։ Խորհրդակցությունները, որոնք կանցկացվեն Էր-Ռիադում, կկենտրոնանան «երեք առաջնահերթ խնդիրների վրա՝ ինտեգրված հակաօդային և հակահրթիռային պաշտպանություն և ծովային անվտանգություն, Իրան և ահաբեկչության դեմ պայքար»,-հայտնել են Պետդեպարտամենտից:

ԱՄՆ պատվիրակության կազմում կլինեն Իրանի հարցերով ԱՄՆ հատուկ ներկայացուցիչ Ռոբերտ Մալլին, Պետդեպարտամենտի հակաահաբեկչության համակարգողի պաշտոնակատար Քրիստոֆեր Լենդբերգը, Մերձավոր Արևելքի հարցերով պաշտպանության փոխնախարար Դանա Սթրոուլը և այլ դիվանագետներ և զինվորականներ:

ՊՀՀ -ն տարածաշրջանային կազմակերպություն է, որը բաղկացած է վեց երկրներից՝ Բահրեյն, Քաթար, Քուվեյթ, Արաբական Միացյալ Էմիրություններ, Օման և Սաուդյան Արաբիա: Այն ստեղծվել է 1981 թվականին։