Ձեր վստահելի աղբյուրը

«Արցախում ստեղծված  իրավիճակի նկատմամբ միջազգային և անհրաժեշտ ուշադրությունը գնալով նվազում է»,- խորհրդարանական ճեպազրույցների ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը։

Նրա կարծիքով, միջազգային հանրությունը և հատկապես  տարածաշրջանային այն խաղացողները, որոնք մշտապես Հարավային Կովկասում  ունեցել են ազդեցություն, ունեն լուրջ հնարավորություն ազդելու Ադրբեջանի վրա և իրավիճակը  որոշակի հանգուցալուծման տանելու ուղղությամբ։

«Այն իրավիճակն, որն  այսօր առկա է Արցախում, բավականին ծանր է և, չնայած շատերին թվում է,  որ մարդիկ ադապտացվում են ստեղծված իրավիճակին, իրավիճակից բխող գործողությունների միջոցով որոշակի  խնդիրներ կարգավորվում են, միանշանակ ասեմ, որ այդպես չէ, մեր հայրենակիցներն Արցախում բավականին ծանր, բարդ շրջան են ապրում, ցավալիորեն այս իրավիճակում նրանք այսօր միայնակ են»,- ասաց ընդդիմադիր քաղաքական գործիչը։

Ինչ վերաբերում է ԵՄ դիտորդական առաքելությունը հայ - ադրբեջանական սահմանին,  Տ.Աբրահամյանն ասաց. «Փետրվարի 20-ից մոտ 100 հոգանոց խումբ է աշխատանքներ իրականացնելու։ Իրավիճակը  պետք է  պահել ընդհանուր վերահսկողության տակ, հասկանալ, թե նրանք ինչ գործառույթներ են իրականացնում և  այդ համատեքստում քննարկել դրանց  հնարավոր էֆեկտիվությունը, դրանց հնարավոր ազդեցությունը  տարածաշրջանային զարգացումների վրա»։