Ձեր վստահելի աղբյուրը

Արցախի Հանրապետության կառավարությունը հրապարակել է Ադրբեջանի կողմից 64 օր շրջափակված (փետրվարի 10-ի դրությամբ) երկրում տիրող  իրավիճակը. 

Արցախում միրգը, բանջարեղենը և ձուն սպառողներին կտրամադրվեն միայն կտրոններով

Հաշվի առնելով շրջափակման հետևանքով առաջացած մթերքների սղությունն ու բնակչության շրջանում հավասարաչափ բաշխելու անհրաժեշտությունը, կտրոնով տրամադրվող ապրանքների ցանկն ընդլայնվել է: Փետրվարի 21-ից պետական պահուստից տրամադրվող 5 անուն պարենային ապրանքներին (բրինձ, շաքարավազ, հնդկաձավար, մակարոնեղեն, ձեթ) կավելանան նաև միրգը, բանջարեղենը և ձուն:

Ադրբեջանի կողմից Արցախի շրջափակման պատճառով տուժել է տնտեսության 41 ոլորտ

Արցախի Հանրապետության պետական եկամուտների կոմիտեի նախագահի տեղակալ Արմինե Մուսայելյանը մանրամասնել է, որ տուժել են մանածագործական հագուստի, խմիչքների արտադրության, միրգ-բանջարեղենի, մսի-մսամթերքի մշակման ու պահածոյացման ոլորտները, հանրային սննդի կազմակերպման ծառայությունները, ինչպես նաև հյուրանոցային տնտեսությունները՝ բացառությամբ, եթե  իրացման շրջանառության մեջ 60 տոկոսը և ավելին կազմում է պետական պատվերի շրջանակներում կացության ապահովումը։

Ա. Մուսայելյանը նշել է, որ մեծածախ ու մանրածախ առևտրի ոլորտն էլ տուժել է ապրանքի բացակայության, իսկ արտադրողները հումքի ներկրման բացակայության  պատճառով:

Էլեկտրամատակարարման համակարգի գերծանրաբեռնվածությունը շղթայական վթարների է հանգեցնում

Հատկապես վերջին օրերին գազամատակարարման հերթական խափանման, տեղացած ձյան և օդի ջերմաստիճանի նվազման պայմաններում զգալիորեն աճել է էլեկտրամատակարարման համակարգի ծանրաբեռնվածությունը, ինչի հետևանքով շղթայական վթարներ են տեղի ունեցել համակարգում՝ լրացուցիչ ժամկետով զրկելով բաժանորդներին էլեկտրամատակարարումից: Այս մասին հայտնում են «Արցախէներգո» ընկերությունից` հորդորելով հատկապես մայրաքաղաքի բաժանորդներին հնարավորին տնտեսել էլեկտրաէներգիան, հակառակ դեպքում առաջանում են լուրջ խնդիրներ։

Այս արագությամբ աճող վթարների քանակը ուղղակի անհնարին է դարձնում նույնիսկ հովհարային ժամանակացույցով էլեկտրաէներգիայի մատակարարումը:

Օրվա վիճակագրական թարմացումներ

5 երեխա գտնվում է մանկական հիվանդանոցի նորածնային և վերակենդանացման բաժանմունքներում:

11 չափահաս բուժառու գտնվում է վերակենդանացման բաժանմունքում, որոնցից 4-ը ծայրահեղ ծանր վիճակում է։

Արդեն 239 երեխա ծնվել է շրջափակման մեջ:

Արցախի բոլոր բուժհաստատություններում պլանային վիրահատությունների դադարեցման պատճառով մոտ 620 քաղաքացի զրկվել է վիրահատվելու միջոցով առողջական խնդիրների լուծման հնարավորությունից։

Մինչ այսօր Կարմիր Խաչի միջազգային կոմիտեի միջնորդությամբ և ուղեկցությամբ Արցախից Հայաստան է տեղափոխվել 90 հիվանդ՝ համապատասխան բուժում ստանալու համար։

Ստեղծված տնտեսական բարդ իրավիճակի պատճառով նախնականորեն առնվազն 5,100 մարդ կորցրել է աշխատանքը և եկամտի աղբյուրը։

Ավելի քան 25,200 տոննա կենսական նշանակության ապրանքներ կմակատարարվեին Արցախ, եթե չլիներ շրջափակումը, որի ընթացքում Կարմիր խաչի միջազգային կոմիտեի և ՌԴ խաղաղապահ զորակազմի կողմից մատակարարվել է դրա միայն չնչին մասը:

Կարևոր փաստեր

Ադրբեջանի կառավարության գործակալները ահաբեկչական գործողություններով 64 օր շարունակ շրջափակման պայմաններում պատանդ են պահում Արցախի 120,000 բնակչությանը:

Շրջափակման պատճառով Արցախի 120,000 բնակչությունը (ներառյալ՝ շուրջ 30,000 երեխա, 20,000 տարեց, 9,000 հաշմանդամություն ունեցող անձ) կրում է բազմաթիվ զրկանքներ և, ի թիվս այլ իրավունքների խախտման, կանգնած է թերսնման և ցրտահարման մեծ ռիսկի առջև:

Շրջափակման պայմաններում սննդի սրացող սղության պատճառով հունվարի 9-ից փակվել կամ մասնակի է աշխատում 41 մանկապարտեզ, 56 նախադպրոցական խումբ, 20 երկարօրյա ուսումնական հաստատություն։

6,828  երեխա այլևս չի կարողանում կրթօջախ հաճախել ընդհանրապես կամ երկարօրյա ռեժիմով՝ զրկվելով համապատասխան կրթություն և խնամք ստանալու հնարավորությունից: