Ձեր վստահելի աղբյուրը

«Այս մի ամսվա ընթացքում հետ ենք սովորել, ինչպես հասկացա»,-Երևանի ավագանու նիստում չկայացած  հերթական քվեարկությունից հետո հայտարարեց քաղաքապետ Հրաչյա Սարգսյանը՝ նկատի ունենալով մեկ ամսից ավել ավագանու նիստեր չգումարելը:

Ավագանին մի քանի անհաջող քվեարկությունից հետո միայն կարողացավ հաստատել չզեկուցվող և զեկուցվող հարցերի փաթեթները:

«Լույս» խմբակցության անդամ Անի Խաչատրյանն առաջարկեց չզեկուցվող հարցերի փաթեթից 8-րդ հարցը դարձնել զեկուցվող, քանի որ նման մեկ այլ նախագիծ, որը ներկայացրել է «Իմ քայլը» խմբակցությունը, զեկուցվող է:

«Ինչ ուզում մտցնում եք տակը, այդպես չի լինում չզեկուցվողներ: Ինչը ձեզ ձեռք չի տալիս՝ հարմար վերնագրով գրում և անցկացնում եք»,-հայտարարեց Անի Խաչատրյանը:

Հրաչյա Սարգսյանը, նկատի ունենալով՝ կառավարության նիստերը, հայտարարեց, որ չզեկուցվող հարցերի  փաթեթով աշխատակարգ կա նաև Ազգային ժողովում և պետք չէ բարդացնել:

«Հիմա չեմ ուզում այդ դիսկուրսն անեմ: Հարցերը ժամանակին բաժանվել են, եթե հարցադրումներ ունեիք, ապա ոչ միայն այստեղ ելույթներ ունենալու, Ֆեյսբուքում քոմենթ գրելու և լայքեր հավաքելու համար էին դրանք, այլ խնդրում եմ այդ հարցադրումները գրեիք քննարկեինք»,-հայտարարեց քաղաքապետը և հարցրեց, թե մինչ այս չզեկուցվող հարցերի հետ կապված որևէ դիտարկում եղել է ավագանու անդամներից:

Անի Խաչատրյանը տեղից կրկնեց իր հիմնավորումները:

«Տիկին խաչատրյան խնդրում եմ լսենք իրար, բազար մի սարքեք»,-ասաց քաղաքապետը:

«Լույս» խմբակցության անդամ Անի Խաչատրյանը ասաց, թե լղոզելու են հարցրեը:

«Տիկի՛ն Խաչատրյան, քանի որ դուք այստեղ եք՝ չենք կարողանալու լղոզել, հիմա ինչո՞ւ եք կռիվ անում»,-հայտարարեց Հրաչյա Սարգսյանը: