Ձեր վստահելի աղբյուրը

Փաշինյանյան իշխանականների բարդույթներն անգամ մնգոյի մակարդակի են։ Որքան շատ է Թուրքիան արհամարհում ՀՀ-ն, հայկականություն ու պետականությունը, այնքան ՀՀ-ն հեծնած իշխանիկները ավելի են ձգտում Թուրքիայի «սիրտը» մտնել։

100 տոննա օգնությունը երկու օր առաջ Թուրքիա գնաց «Սպայկայի» բեռնատարներով, որ քննչական թոհուբոհով անցնելուց հետո անցյալ տարի 8,5 միլիարդ դրամ էր վերականգնել բյուջե։

Մինչ այդ հայաստանյան հանրությունը փրկարարներ ուղարկելն էր ակտիվ քննարկում։ Ինչ գործ ունեն հայաստանյան փրկարարները թշնամական թուրքիայում։ Նիկոլական մարդասեր հանրույթը դրա մեջ ազնվություն ու դիվանագիտություն էր տեսնում ու հիանում հավանաբար իր մարդկային արժեքներով։

Ազնվությունը, իբր՝ երեխաներ, մարդիկ ինչ մեղավոր են և այլն։
Դիվանագիտությունը էլ՝ «Թուրքիան կտեսնի, որ օգնում ենք իրենց, մեզ կսիրի վերջապես»։

Վանի թաս, Վանի թութուն՝ կթարգմաներ ու կզարմանար Մահարին։
Ադրբեջանից Թուրքիային շտապեցին զգուշացնել, թե՝ ամեն հայ փրկարարի կողքը մի թուրք ոստիկան պիտի կանգնի՝ դրանք գող են, մարդկանց էլ կվնասեն։

Թերևս արժեր, որ փրկարարների կողքը նրանց պաշտպանողներ լինեին։ Պարզվեց, իզուր չեն ադրբեջանցիները իրենց թուրք եղբայրներին հենց այդ բառերով զգուշացնում. Այդ գիտեն, այդ են ասում։

Ավստրիայի, Գերմանիայի, Իսրայելի փրկարարները դադարեցրել են որոնողական աշխատանքները երկրաշարժից տուժած Թուրքիայում՝ տարածաշրջանում անապահով պայմանների պատճառով՝ թուրքական քրեական խմբավորումները կրակում են, հարցեր են պարզում իրար հետ։ Կգա նաև փլատակների դիակապտության ժամանակը։ Ու ճիշտ են անում երկրները, որ Թուրքիայի շառից իրենց հեռու են գնում, ասելով՝ «Փրկարարական գործողության ակնկալվող հաջողությունը համարժեք չէ անվտանգության ռիսկին»։

Ադրբեջանը Հայաստան-Արցախ միակ գազատարը փակում է՝ հաստատելով, թե որքան են նիկոլական հանության սպասելիքները սին, իսկ Էրդողանը  շնորհակալություն է հայտնում Ադրբեջանին՝ շեշտելով. «Նրանք մեզ հետ են այս ծանր պահին, ինչպես մենք էինք մեր եղբայրների հետ ղարաբաղյան պատերազմի ժամանակ»։

Հիշու՞մ եք 44 օրյա պատերազմը, Ապրիլյանը, սեպտեմբերին հարձակումը Ջերմուկի վրա, թուրք վարձկաններին, գլխատված, անդամահատված հայ գերիներ, զինծառայողներ, կանայք... Թուրքական բայրաքտարները, զենքը Ադրբեջանին հիշեցի՞ք։ Միլիոնների օգնությունը Ադրբեջանին՝ հայասպան քաղաքականությունը իրականացնելու համար՝ հիշեցի՞ք։

Չեք էլ մոռացե՞լ։

Դե ուրեմն էլ ինչ ասեմ։

Ինչու էր պետք հարուստ Թուրքիային տոննաներով ու փրկարարներով օգնություն ուղարկել, եթե Թուրքիան այդքան ունի և զենք, և զորք, և միջոցներ։

Ինչի է պետք օգնել Թուրքիային միջոցներ տնտեսել՝ էլի Ադրբեջանին աջակցելու համար։

Ի՞նչ ինքնասպան քաղաքականություն է իրականացնում ՀՀ-ն։ 

Դեռ մեկ-երկուսդ կասեք՝ Հայաստանին էլ է Թուրքիան շնորհակալություն հայտնե՞լ։ Չէմիչէ։

Շնորհակալություն հայտնել է, ուշադիր՝ Հայաստանի իշխանությունների հետ բանակցություններում Թուրքիան ներկայացնող դեսպան Սերդար Քըլըչը անձնապես Ռուբեն Ռուբինյանին ու մնգոն նոր ավարտած ու նորանշանակ փոխարտգործնախարար Վահան Կոստանյանին։

Իսկ բանակցությունները, գիտեք, տարվում են, ի թիվս, Հայաստանը թուրք-ադրբեջանական ավտոճանապարհ սարքելու ուղղությամբ։ Ավտոճանապարհ, որ բացեցին Հայաստանից Թուրքիա գնացող բեռնատարները։

Իսկ դուք կարծում էիք անկապ  vanitas vanitatu՞m։

Անահիտ Ոսկանյան