Ձեր վստահելի աղբյուրը

«Զոհված զինծառայողների ծնողները հրաժարվել են ոստիկանների հետ առերեսումներից, քանի որ Քննչական կոմիտեում այլևս անելիք չունեինք։ Մնում է, որ ոստիկանները մեկը մյուսի մեջ պարզեն, թե ով է հրամանը տվել բռնության գործադրմամբ բերման են ենթարկել զոհված զինծառայողների ծնողներին»,- լրագրողների հետ զրույցում ասաց զոհված զինծառայողներից մեկի հայրը։

Հիշեցնենք, որ 2022 թվականի սեպտեմբերի 21-ին ոստիկանները «Եռաբլուր» զինվորական պանթեոնում բռնության գործադրմամբ բերման են ենթարկել զոհված զինծառայողների ծնողներին, այնուհետև հայցեր ներկայացրել նրանց վարչական պատասխանատվության ենթարկելու մասին՝ իբր ոստիկանների պահանջներին չենթարկվելու համար։

Նա նշեց, որ Երևանի փոխոստիկանապետ Արթուր Խուդինյանն ասել է՝  նման հրաման ինքը չի տվել, կարմիր բերետավորների հրամանատարն ասել է՝ ինքն է հրաման տվել։

«Ինչ բարոյական, ինչ մարդկային իրավունքով՝ չգիտեմ։ Ճիշտ է, իր արածի համար մեր մայրերից մեկի մոտ զղջաց, բայց, համենայնդեպս, զղջալը դեռ չի նշանակում, որ իր մարդկային հատկանիշները ձեռք է բերել։ Եթե հրաման է տվել, ուրեմն ոչ մարդկային վերաբերմունք է ցուցաբերել հերոսածին զինծառայողի մոր նկատմամբ»,- ասաց նա։

Անդրադառնալով ոստիկանության կողմից ծնողների դեմ ներկայացված հայցադիմումներին՝ նա նշեց, որ առաջին որոշումը կհրապարակվի փետրվարի 20-ին։

Զոհված զինծառայողի հայրն ասաց, որ մի կողմից ծնողները  տուժող են ճանաչվել, մյուս կողմից հայցեր են ներկայացվել ծնողներին վարչական պատասխանատվության ենթարկելու համար։

«Կա՞ իրավագիտության մեջ երկակի ստանդարտներ։ Եթե տուժող եմ ճանաչվել, ապա ոստիկանությունը ո՞ր բարոյական, իրավական օրենքի հիման վրա է հայց ներկայացրել։ Ինձ թվում է՝ երկակի ստանդարտներ չկան իրավագիտության մեջ, ուղղակի որպեսզի կոմպենսացնեն մեր նկատմամբ իրենց գազանաբար վերաբերմունքը, իրենց քրեական գործը մեղմացնեն,  այս երկրորդ գործը կարել են մեզ վրա։  Շինծու գործ է։

Հարցը գումարայինը չէ, բարոյականն է։  50 հազար դրամը որևէ մեկի կյանքում էական նշանակություն չունի, բայց ինչ է նշանակում  հերոսածին ծնողին տուգանել 50 հազար դրամով։  Պետական բյուջեն երևի դրա կարիքն ունի։ Եթե իմանանք դրա կարիքն ունեն, դրամահավաք կանենք, մեր գրպաններից այդ 50 հազարները կմուծենք, բայց ոչ վարչական դատարանի միջոցով, այլ նվիրատվության կարգով։ Երևի պարգևավճարներ պետք է տան»,- ասաց զոհված զինառայողի հայրը։

Այստեղ հարկ է շեշտել նաև, որ զինծառայողները զոհվել են Հայրենիքի համար պատերազմում, նաև՝ թուրք վարձկաններից ու բայրաքթարներից, իսկ ՀՀ իշխանությունը արդեն երրորդ օգնությունն է ուղարկում Թուրքիա։ 

Հայրենիքի համար զոհվածների ծնողներից հավաքում է, որ սպանողների՞ն տա։