Ձեր վստահելի աղբյուրը

«Եվրախորհրդարանի բանաձևը ոչ մի արժեք չունի»,-այս մասին հայտարարել է «Վրացական երազանք» կուսակցության գլխավոր քարտուղար, Թբիլիսիի քաղաքապետ Կախա Կալաձեն՝ մեկնաբանելով ԵԽ –ի՝ Միխայիլ Սաայաշվիլու առողջական վիճակի մասին ընդունած բանաձևը։ Այս մասին գրում է «Գրուզիա օնլայն»-ը։

Կախա Կալաձեի խոսքով՝ փաստաթուղթը չի կարող արժեքավոր լինել, երբ «մեզ ասում են, որ բարերարը, բարեգործը պետք է պատժամիջոցների ենթարկվի»։

Հիշեցնենք, որ ԵԽ ընդունած բանաձևը կոչ է անում Վրաստանի իշխանություններին ազատ արձակել  նախկին նախագահ Սաակաշվիլիին ու նրան արտերկրում բուժվելու հնարավորություն տալ։ Եվրախորհրդարանի պատգամավորները հավանություն են տվել նաև Վրաստանի նախկին վարչապետ Բիձինա Իվանիշվիլիի դեմ պատժամիջոցների կիրառման անհրաժեշտությանը։ Այն նախաձեռնել են Եվրախորհրդարանի հինգ քաղաքական խմբեր։

«Առավոտյան էլ էի ասել, որևէ նոր ու գերազանց բան չեմ սպասում այդ բանաձևից, և արդյունքը հենց այդպես է։ Որևէ նոր բան չկա, այն գրոշի արժեք չունի։ Երբ խոսքը վերաբերում է ստին, կեղծիքին, հանցագործների հովանավորչությանը, ապա այս բանաձևը, իհարկե, չի կարելի լուրջ ընդունել»,-ասել է նա։

Կախա Կալաձեն հայտարարել է, որ 2012-ից Վրաստանի իշխանությունն արել ու այսօր էլ անում է ամեն բան, որպեսզի իր երկիրը հնարավորինս շուտ դառնա Եվրոպա անունով մեծ ընտանիքի անդամ։

«Մենք շատ հստակ ծրագրեր ենք իրականացրել։ Չնայած դժվարություններին, շատ հաջողություններ են եղել։ Եվ այսօր մենք արժանի էինք կարգավիճակին, բայց չտրամադրելու վերաբերյալ քաղաքական որոշում կայացվեց։ Նրանք դա արեցին մեր երկրի իշխանությունների դեմ»,-ասել է «Վրացական երազանք»-ի ներկայացուցիչն ու մանրամասնել, որ վրացական կողմին 12 կետից բաղկացած նախագիծ է տրամադրվել, իշխանությունն անում է ամեն բան դրանք իրականացելու համար, որպեսզի կարգավիճակ ստանա երկիրը։

«Նույն այդ ժամանակ ի՞նչ է տեղի ունենում։ Ելույթ է ունենում ինչ որ Կուբիլյուս ու ասում, որ եթե Սաակաշվիլին, որը բառիս բուն իմաստով հանցագործ է, Ստարսբուրգն էլ դա ապացուցել է, չազատվի, ապա երկիրը չի կարող  կարգավիճակ ստանալ։ Ես հարցնում եմ մեր երկրի բնակչությանը, ով ուզում է եվրաինտեգրում, ընդունելի՞ են նման վերաբերմունքը, այս մոտեցումները։ Եթե  մեր երկրի բնակչության մեծամասնությունը ներկայացնող իշխանությունների հետ խոսում են շանտաժի լեզվով,  ընդունելի՞ է։ Վստահ եմ, որ ինքնասիրություն  ունեցող ոչ մի վրացի չի ընդունի այս բառապաշարով խոսակցությունը, որն անում են մեր երկրի այսպես կոչված բարեկամները։ Մենք սիրում ենք  մեր հայրենիքը, մեր ժողովրդին։ Պաշտպանել ու պաշտպանում ենք մեր հայրենիքի շահերը, և միշտ ենք դա անելու։ Իհարկե, մենք Եվրոպայի համար հետաքրքիր երկիր ենք, մենք մեզ համարում ենք եվրոպացիներ։ Սակայն մեզ համար կարևոր են նաև մեր երկրի ավանդույթները, արժենքերը, որոնք դարեր շարունակ ունեցել է մեր երկիրը։ Այդ աբսուրդ որոշումը, վիրավորական հայտարարությունը բոլոր կողմերին վնաս է հասցնում։ Լոբբիստների կողմից հանցագործության անմիջական հովանավորության մասին փաստաթուղթը չի կարող արժեք ունենալ։ Փաստաթուղթը չի կարող արժեք ունենալ, երբ մեզ ասում են, որ  բարերարը պետք է պատժամիջոցների ենթարկվի»,-ասել է վրացի պաշտոնյան։