Ձեր վստահելի աղբյուրը

«Լեգիստ» իրավաբանական գրասենյակի փաստաբաններ Սոս Հակոբյանն ու Արսեն Բաբայանն ավարտել են ՍԴ դատավոր Սեդա Սաֆարյանի վերաբերյալ միջնորդությունը:

Գրասենյակից տեղեկացնում են, որ վաղը՝ փետրվարի 21-ին, միջնորդությունը կհանձնվի ՀՀ ԱԺ նախագահին, ՀՀ ԱԺ «Հայաստան», «Պատիվ ունեմ» և «Քաղաքացիական պայմանագիր» խմբակցությունների ղեկավարներին:

Հասցեատերերին հանձնելուց հետո միջնորդության ամբողջական տեքստը կհրապարակվի։

Ավելի վաղ հրավիրած ասուլիսում փաստաբանները հայտարարել են, որ ՍԴ դատավոր Սեդա Սաֆարյանը խախտել է անհամատեղելիության պահանջները, ինչն ունի մեկ հետևանք՝ դատավորի լիազորությունները դադարում են օրենքով սահմանված կարգով։ ԱԺ-ն պատգամավորների ընդհանուր թվի առնվազն 3/5-ով ընդունված որոշմամբ դիմում է  ներկայացնում ՍԴ։ ՍԴ դատավորի լիազորությունների դադարեցնելու որոշումը ՍԴ-ն կարող է ընդունել դատավորների ընդհանուր թվի ձայների առնվազն 2/3-ով։

Նրանք համարում են, որ Սեդա Սաֆարյանի կողմից խախտվել են նաև կարգապահական  կանոնները, ինչի հետևանք կարող է լինել հետևյալ կարգապահական տույժերից մեկի կիրառումը.
1. Նախազգուշացում
2. Նկատողություն
3. Խիստ նկատողություն։

Հիշեցնենք, որ Սեդա Սաֆարյանը ՍԴ դատավոր լինելուն զուգահեռ շարունակել է փաստաբանական գործունեությունը։