Ձեր վստահելի աղբյուրը

«Քաղաքականության հիմնական լոկոմոտիվը ոչ թե արժեհամակարգն է, այլ շահը, որն ամեն ինչից վեր է դասվում»,-ասաց միջազգայնագետ Սուրեն Սարգսյանը, որը քաջատեղյակ է հայ-ամերիկյան հարաբերություններին ու հետազոտում է ԱՄՆ արտաքին քաղաքականությունը։

Որպես օրինակ նա ներկայացրեց՝ չնայած ԱՄՆ-ն հռչակել է, որ վարչակազմի քաղաքականության հիմքում մարդու իրավունքներն են, սակայն ռեալ պոլիտիկում մենք տեսնում ենք, որ ԱՄՆ դաշնակիցների թվում է նաև Սաուդայան Արաբիան, որը մարդու իրավունքների հետ առանձնապես աղերս չունի։

Նշենք, որ Սուրեն Սարգսյանը մասնակցում է այսօր՝  հայտնի պատմական իրադարձությունից ուղիղ 35 տարի անց նախաձեռնած «Ղարաբաղյան պրոֆիլ» խորագրով համաժողովին։ Միջոցառման աջակիցն է «Հայրենիք» կուսակցությունը։

Անդրադառանալով ԼՂ խնդրի վերաբերյալ ԱՄՆ դիրքորոշմանը՝ «Ղարաբաղյան պրոֆիլ» խորագրով համաժողովի բանախոս Սուրեն Սարգսյանն ընդգծեց, որ Միացյալ Նահանգների դիրքորոշումն անցած 30 տարիների ընթացքում անփոփոխ է։

«Ամերիկացիները միշտ ասել են՝ պետք է այս խնդիրը լուծել, ոնց ուզում եք, լուծեք։ Եթե այնքան ուժ ու կարողություն ունեք, որ կարող եք ազգային ինքնորոշման իրավունքի հիման վրա լուծել, այդպես արեք։ Եթե Ադրբեջանը կարողանա լուծել տարածքային ամբողջականության սկզբունքը կիրառելով, այդպես լուծեք, ինձ համար միևնույն է, ինձ համար կարևոր է, որ խնդիրը լուծվի»,-ասաց բանախոսը։

Միջազգայնագետը մանրամասնեց, ԱՄՆ այս դիրքորոշման պատճառն այն է, որ Նահանգները մտածում են, եթե տարածաշրջանում լուծվում է ԼՂ խնդիրը, կարգավորվում են հայ-թուրքական հարաբերությունները, ապա այստեղ Ռուսաստանի ազդեցությունը նվազում է, ինչը բերում է տարածաշրջանից Ռուսաստանի դուրս մղելուն։

«Սա եղել է ԱՄՆ որդեգրած քաղաքականությունը սկսած ԱՄՆ 41-րդ նախագահ  Ջորջ Բուշից ու մինչ այսօր որևէ բան չի փոխվել։ Սա աշխարհքաղաքական մրցակցություն է, իսկ գերտերություններն ամեն տեղ են մրցակցում, Հայաստանն ու Հարավային Կովկասը բացառություն չեն։  ԱՄՆ-ն այսօր օգտագործում են այդ հնարավարությունները»,-ասաց նա՝ ընդգծելով, որ հայ-ամերիկյան բարձր մակարդակի շփումներն ակտիվացել են հենց այս օրակարգի շրջանակում։

Անդրադառնալով այսօր ստեղծված իրավիճակին՝ Սուրեն Սարգսյանն արձանագրեց, Հայաստանը բավարարել է թուրքական կողմի բոլոր նախապայմանները, ԱՄՆ-ն տեսնում է հնարավարություն հայ-թուրքական հարաբերությունների կարգավորման համար, բնական է, որ աջակցելու է ցանկացած գործընթացի, որը կբերի ԼՂ խնդրի ու հայ-թուրքական հարաբերությունների վերջնական լուծմանը։

«ԱՄՆ-ն տարածաշրջանում ունի երկու ծրագիր. մաքսիմում՝ Ռուսաստանին տարածաշրջանից դուրս մղել, մինիմում՝ բալանսավորել։ Ռուսների դուրս գալու պարագայում ԱՄՆ-ն ֆիզիկապես այստեղ ներկա չի լինելու, այստեղ իր դաշնակցի միջոցով է գործելու, իսկ տարածաշրջանում ԱՄՆ միակ ռազմավարական դաշնակիցը Թուրքիան է։ Կարծում եմ, այստեղ ամեն ինչ պարզ է դառնում, թե ինչ գլոբալ պրոցեսներ են տեղի ունենում, այս ամեն ինչն ուր է գնում, այս տրամաբանության մեջ դիտարկելիս շատ պրոցեսներ ավելի շոշափելի ու տեսանելի են դառնում»,-ասաց Սարգսյանը։

«Ղարաբաղյան պրոֆիլ» միջոցառման ընթացքում, բացի փորձագետների մասնակցությամբ քննարկումներից, նախատեսվում է ներկայացնել անցած 35 տարիներն ամփոփող լուսանկարների ցուցահանդես, ինպես նաև ներկայացնել «Եռաբլուր» վիրտուալ-թանգարանը։