Ձեր վստահելի աղբյուրը

«Ես ոչ թե դեմ եմ խաղաղության պայմանագրին, ընդհակառակը՝ կողմ եմ խաղաղությանը, ամենաշատը ես գիտեմ խաղաղության գինը, մենք գիտենք խաղաղության գինը, բայց խաղաղության պայմանագրի կետերը պետք է իմանանք, պետք է հանրայնացնեն։ Թող հանրայնացնեն, դրա մասին հետո խոսենք»,- «Ղարաբաղյան պրոֆիլ» խորագրով համաժողովի ընթացքում լրագրողների հետ զրույցում ասաց «Հայրենիք» կուսակցության նախագահ, ԱԱԾ նախկին տնօրեն Արթուր Վանեցյանը՝ պատասխանելով  խաղաղության պայմանագրի վերաբերյալ Panorama.am-ի հարցին։

Նրա խոսքով, միայն խելագարը կարող է դեմ լինել խաղաղությանը և խաղաղության պայմանագրի կնքմանը. «Ես ասում եմ՝ մենք  պետք է հասկանանք, թե ինչ գին ենք վճարում այդ խաղաղության դիմաց և արդյոք խաղաղության պայմանագրի ստորագրումից հետո լինելու է  Հայաստան, լինելու է Արցախ, կարողանալո՞ւ են հայերն ապրել իրենց հայրենիքում  անկախ, ինքնիշխան, անվտանգ։

Շատ կարևոր է ֆիքսել մի փաստ. Հայաստանն ասում է, որ արդեն մշակել է խաղաղության պայմանագրի իր տարբերակը և փոխանցել է  Ադրբեջանին։ Հիմա հարց եմ տալիս՝  ի՞նչ է գրված այս պայմանագրում։ Որևէ մեկդ գիտի՞։ Որևէ մեկս դրա մասին չգիտի, բայց,  փաստացի, ականատես ենք եղել, որ  այսօրվա իշխանություն կոչվածները մշտապես հակահայկական թղթեր են ստորագրել, հակահայկական քայլեր են արել, անգամ չեն պահպանել փաստաթղթերում գրվածն, այլ ասել են, որ ունեն բանավոր պայմանավորվածություններ,  որի արդյունքում հանձնել են տարածքներ»։

Հարցին՝ ինչպե՞ս պետք է կանխել նման փաստաթղթի ստորագրումւը, Արթուր Վանեցյանն ասաց, որ կանխելու գործիքներից մեկն այն է, որ բոլորը՝ քաղաքական գործիչները, հանրությանը հայտնի մարդիկ, հանրության շրջանում  կարծիք ձևավորող մարդիկ խոսեն դրա մասին։

«Մենք  իշխանություն չենք, զինված խումբ չենք, ահաբեկչական խումբ չենք, որ փորձենք  այլ կերպ կանխել։ Պետք է խոսենք, հանրությանը ներկայացնենք այն վտանգները, որոնք կարող են վրա հասնել ու փորձենք բոլորով կանխել այդ հավանական  հակահայկական փաստաթղթի ստորագրումը»,- նշեց «Հայրենիք» կուսակցության նախագահը՝ հավելելով, որ հասել ենք մի կետի, որ այլևս չենք կարող ինչ-որ բաներ պլանավորենք, հերթական անգամ ասենք՝ անելու ենք սա, չենք անելու սա, պետք է հասկանալ, որ վտանգված է  Հայաստանը, Արցախը, հայ ժողովրդի ապագան, ուստի պետք է շատ արագ գործենք։

«Երբ ինձ ասում եք՝  ի՞նչ պետք է անել։ Կոնկրետ ես ամեն ինչ անում եմ. սկսած  2019 թվականի սեպտեմբերին, երբ հրաժարական ներկայացրեցի ու հայտնի հայտարարությունն արեցի, որևէ  մեկի մտքով չէր անցնում, թե ուր է  գնում այս երկիրը։ Խոսել եմ դրա մասին, խոսել եմ մշտապես, շարունակում եմ խոսել, իմ գործունեության ընթացքում մշտապես փորձել եմ մեր հանրության ուշադրությունը հրավիրել այդ խնդրի վրա»,- ասաց Ա. Վանեցյանը։

Ըստ նրա, այս իշխանությունների ամենամեծ խնդիրներից մեկն այն է, որ բաժանարար գծեր են  մտցրել, հանրությունը կիսել են սևերի, սպիտակների, յուրայինների, հակառակորդների, ռուսամետների ու արևմտամետների, բաժանումների, որի արդյունքում կարողանում են կառավարել ժողովրդին ու պահպանել  իրենց իշխանությունը։

«Այսինքն, այս բաժանարար գծերը, որոնք ստեղծված են ու կան, դա հիմնական գործիքն է, որով Նիկոլ Փաշինյանը պահպանում է իր իշխանությունը։ Իսկ ես վստահ եմ, որ Նիկոլ Փաշինյանի  բոլոր քայլերն ունեն մեկ նպատակ՝ պահպանել իր սեփական իշխանությունը։ Ինչ-որ վերլուծություններ ենք անում, մասնագետները քաղաքագիտական վերլուծություններ են անում,  հավատացեք՝ Նիկոլ Փաշինյանը գործում է պահի ազդեցության տակ,  գործում է բնազդով՝ պահպանել իր իշխանությունը։ Վերջ։ Ուրիշ որևէ նպատակ այս իշխանությունը չունի։

Ուստի մենք պետք է ուժ գտնենք մեր մեջ, որպեսզի  բոլոր ուժերը, քաղաքացիները միավորեն մեկ գաղափարի շուրջ ու կարողանան դուրս գալ այս ծանր վիճակից»,- ասաց Արթուր Վանեցյանը։

Հարցին՝ Հայաստանը պատրա՞ստ է հայ-թուրքական սահմանի բացմանը, պատրա՞ստ է դիմակայել թուրքական  էքսպանսիային, նա պատասխանեց. «Հանրության շրջանում կա մի միտք, գաղափար,  որ ասում են՝ Թուրքիայի սահմանը բացվի, լավ կապրենք։ Հարց եմ ուզում ուղղել բոլորին՝  արդյոք Հայաստանի անվտանգային համակարգն այսօր պատրաստ է ունենալ Թուրքիայի հետ բաց սահման, թե ոչ, արդյոք  Հայաստանի տնտեսությունը պատրաստ է ունենալ բաց սահման Թուրքիայի հետ, թե ոչ։ 

21-րդ դարում ունենալ փակ սահմաններ, դա անթույլատրելի է և ով  կասի, որ փակ սահմանները լավ է, դա շատ սխալ միտք է։  Բայց Հայաստանը պետք է դրան պատրաստվի, պատրաստվի ու նոր գնա այդ քայլին։

Հիշեցնեմ, որ Հայաստանը Թուրքիայի հետ սահման երբեք չի փակել, Թուրքիան է միակողմանի փակել Հայաստանի հետ սահմանը։ Եթե ուզում են բացել, ոչ թե մենք պետք է գնանք, խնդրենք,  պայմաններ առաջ քաշենք, այլ Թուրքիան եթե ուզում է  բացի,  թող հայտարարի, որ բացում է, դրանից հետո մենք կխոսենք»։