Ձեր վստահելի աղբյուրը

Քաղաքացի Նարինե Դավթյանը 2019 թվականին դատական հայց է ներկայացրել Մարիամ Հովսեփյանի դեմ՝ պահանջելով պատվին, արժանապատվությանը և գործարար համբավին պատճառված վնասի հատուցում:

«Դատալեքս»-ում հրապարակված է այս գործով պատասխանողի իրավական դիրքորոշումը. «Հայցվորի կողմից չեն ներկայացվել բավարար թույլատրելի և վերաբերելի ապացույցներ առ այն, որ պատասխանողի կողմից կատարված հրապարակմամբ օգտագործված արտահայտություններն ուղղված են հենց հայցվորի դեմ, և պատասխանողն ունեցել է ուղղակի դիտավորություն վիրավորելու և նսեմացնելու հայցվորին, հայցվորի կողմից չեն պահպանվել հայց ներկայացնելու ժամկետները, որպիսի պայմաններում արտահայտությունը վիրավորանք որակելու համար բացակայում է օրենքով սահմանված պարտադիր վավերապայմաններից ևս մեկը, ինչը բավարար է հայցը մերժելու համար»։

Արարատի և Վայոց Ձորի մարզերի ընդհանուր իրավասության դատարանը, դատավոր Ելենա Քոչարյանի նախագահությամբ, Նարինե Դավթյանի հայցապահանջը ընդդեմ Մարիամ Հովսեփյանի՝ վիրավորելու միջոցով պատիվն ու արժանապատվությունը և գործարար համբավն արատավորելու համար ներողություն խնդրել և փոխհատուցում վճարելու պահանջի մասին բավարարել է մասնակի։

Պատասխանող կողմը վերաքննիչ բողոք է ներկայացրել, այն մերժվել է:

Մարիամ Հովսեփյանը դատարանի գործողությունների դեմ հանցագործության մասին հաղորդում է ներկայացրել։

«Հայաստանում գտնվելուս ժամանակ փաստաբանիս՝ Լուսինե Վիրաբյան հետ, մի կարևոր բանով ենք զբաղվել՝ իմ հաղորդման հիման վրա հարուցվել է քրեական գործ, ՀՀ Քննչական կոմիտեի Արաբկիրի բաժնում, օրենքի խախտմամբ ձեռք բերված ապացույցները առաջի ատյանի քաղաքացիական դատարան ներկայացնելու, մոլորության մատնելու և կիրառելու առիթով:

Գործով հայցվոր Նարինե Դավթյանը, ում կողմից քաղաքացիական գործի քննության ընթացքում դատարանին է ներկայացվել օրենքի խախտմամբ ձեռք բերված ապացույցները` սույն քրեական գործով ներգրավված է որպես վկա-կասկածյալ։
Հաշվի առնելով նախաքննության գաղտնիության հանգամանքը` ավելի լայն ինֆորմացիա չենք կարող տալ։
Օրենքի առաջ բոլորը պետք է հավասար լինեն, իսկ մեղավորները կկրեն պատասխանատվություն քրեական օրենսգրքի 499 հոդվածի հատկանիշներով»,- գրել է Մարիամ Հովսեփյանը ֆեյսբուքյան իր էջում:

News.am-ին Մարիամ Հովսեփյանի ներկայացուցիչ, փաստաբան Լուսինե Վիրաբյանը ներկայացրել է գործի նախապատմությունը. ««Վայբեր» հավելվածի միջոցով անձերի միջեւ տեղի է ունեցել երկխոսություն, որից մաս է հրապարակվել այն մասին, որ երկու անձ խոսում են, թե ինչպես կարելի է տարաձայնություններ մտցնել ՌԴ հայ համայնքի մեջ: Ըստ այդ ձայնագրության՝ պետք էր գումար հավաքել եւ վարչապետի տիկին Աննա Հակոբյանի ֆոնդին գումար փոխանցել, որպեսզի լավ երեւալ նրա աչքին եւ այլն: Այդ երկխոսությունը տարածվել է տելեգրամյան տարբեր ալիքներում, այդ երկխոսությունն իր էջում տեղադրել է նաեւ Մարիամ Հովսեփյանը, եւ խնդրել, որ երկոսության մասնակից անձինք կամ հերքեն կամ պարզաբանեն այդ հարցը: Նա որակավորում է տվել նաեւ այդ երկխոսության մասին: Այդ ընթացքում հայտնվում է մի կին Նարինա Դավթյան անուն-ազգանունով, որն ասում է՝ ես չեմ այդ խոսակցության մեջ, բայց միաժամանակ վիրավորվում է Մարիամի գրառումից»։