Ձեր վստահելի աղբյուրը

«Կարծում եմ, որ Հայաստանի դատական համակարգում կան դատավորներ, որոնք կարող են իրենց զոհել հանուն  համակարգի կայացման և հակառակը, կարծում եմ, Հայաստանի պետական համակարգում կան շատ կարևոր,  պատասխանատու  պաշտոն զբաղեցնող անձինք, որոնք հանուն ոչ թափանցիկ, ոչ արդար շահերի, մասնավոր շահերի կարող են զոհաբերել համակարգեր»,- Բարձրագույն դատական խորհրդում դատավոր Զարուհի Նախշքարյանին կարգապահական պատասխանատվության ենթարկելու ԱՆ ներկայացրած միջնորդության քննության ժամանակ հայտարարեց փաստաբան Սիրանուշ Սահակյանը։

Նա նշեց, որ հետևողական, բացառիկ, արտակարգ ջանասիրություն է ցուցաբերվում Զարուհի Նախշքարյանի նկատմամբ կարգապահական գործիքների շրջանակներում, այստեղ պետք է որևէ ողջամիտ բացատրություն գտնել։

«Հայաստանում չկա մեկ այլ դատավոր, որի առնչությամբ այսքան կարճ ժամկետում, նույնիսկ եթե անտեսենք ժամկետային գործոնը, այդ քանակով կարգապահական պատասխանատվության ենթարկելու միջնորդություններ ներկայացված լինեն ԲԴԽ-ին  և բացառապես գործադիր իշխանության ներկայացուցչի կողմից։

Մյուս կողմից էլ,  չգիտես ինչու, երբ վերլուծություններ են իրականացնում, իրենց ուշադրությանը ակամա գալիս են նաև այլ դատավորներ, բայց զեկուցագիր կազմող  պաշտոնյաները դարձյալ խոսում են միայն Զարուհի Նախշքարյանի անձի մասին։

Այս փաստերը մեզ հնարավորություն են տալիս  հիմնավոր մտածելու, որ մենք  գործ ունենք հետապնդման հետ»,- ասաց Ս. Սահակյանը։

Ըստ նրա, էական չէ, թե ինչ հայտանիշով է հետապնդվում. «Մենք գործ ունենք գործադիր իշխանության կողմից դատավորի հետապնդման դասական օրինակի հետ և դուք ինքներդ փաստեր ուսումնասիրելով եկել եք այն համոզման, որ ներկայացված միջնորդությունները չեն ունեցել հիմնավորվածության այն  աստիճանը, որ հնարավոր լիներ բավարարել ԲԴԽ-ի կողմից»։

«Այս գործի շրջանակներում դարձյալ ընտրվել է մի պատրվակ, որն այնքան էլ չի առնչվում իրավախախտմանը և փորձ է արվում  սանկցավորել դատավորին մի քննադատության համար, որի իրական հասցեատերը  գործադիր իշխանությունն է և  հասեցատեր է հենց դատական իշխանությանն առնչվող իր քաղաքականությունը ձախողելու մեջ, չնայած  ձևավորված հանրային մեծ սպասումների»,- ասաց Զարուհի Նախշքարյանին ներկայացուցիչ Ս. Սահակյանը։

Զարուհի Նախշքարյանի ներկայացուցիչ Ռուբեն Մելիքյանը նշեց, որ ԲԴԽ կայացրած որոշումը վերաբերելու է ևս մի կարևոր արժեքի՝ խոսքի ազատությանը. «Մենք ունենք խոսքի ազատության հետ կապված արժեք։ Խոսքի ազատությունն այն է, որն, ըստ էության, ժողովրդավարական հասարակության դեմքն է, առանց դրա հնարավոր չէ պատկերացնել որևէ ժողովրդավարական հասարակություն։ Խոսքի ազատությունը սահմանափակելու և չսահմանափակելու ընտրության հնարավորություն կա, իսկ այս որոշումը միայն Զարուհի Նախշքարյանին չի վերաբերվելու, այլ, ըստ էության, բոլոր դատավորին»։ 

Զարուհի Նաշքարյանին կարգապահական պատասխանատվության ենթարկելու վերաբերյալ արդարադատության նախարարի միջնորդության հարցով որոշումը ԲԴԽ-ն կհրապարակի փետրվարի 27-ին։

Հիշեցնենք, որ արդարադատության նախարարությունը դիմել է Բարձրագույն դատական խորհրդին՝ դատավոր Զարուհի Նախշքարյանին կարգապահական պատասխանատվության ենթարկելու հերթական միջնորդությամբ, որի փաստական հիմքը դատավորի հրապարակային խոսքն է, որով նա «իր դրական վերաբերմունքն է արտահայտել դատավոր Աննա Փիլոսյանի առնչությամբ» և, ըստ արդարադատության նախարարի, հրապարակայնորեն կասկածի տակ է առել դատավոր Ա.Փիլոսյանի վերաբերյալ ԲԴԽ դատական ակտը։

ԲԴԽ 2022թ. դեկտեմբերի 26-ի որոշմամբ դատավոր Ա.Փիլոսյանի լիազորությունները դադարեցվել էին՝ գերբեռնվածության պայմաններում աշխատելիս չորս գործով վճիռները տևական ժամանակով ուշացնելու համար։

Հիշեցնենք նաև, որ Սիրանուշ Սահակյանը և Ռուբեն Մելիքյանը 2021 թվականին Բարձրագույն դատական խորհրդի առջև ներկայացրել էին դատավոր Զարուհի Նախշքարյանի շահերը Արդարադատության նախարարության միջնորդությամբ երեք կարգապահական վարույթներով։ Միջնորդություններից երկուսը մերժվել էին, իսկ մեկը՝ բավարարվել, և դատավորին հայտարարվել էր խիստ նկատողություն։