Ձեր վստահելի աղբյուրը

«Նախագծով զինծառայողների հիմնադրամի խորհրդին լիազորություն է տրվում իր սահմանած պայմաններով և կարգով լրացուցիչ սոցիալական ծառայություններ մատուցել հիմնադրամի շահառուներին»,-ԱԺ Աշխատանքի և սոցիալական հարցերի մշտական հանձնաժողովի նիստում հայտնեց աշխատանքի և սոցիալական հարցերի նախարարի տեղակալ Դավիթ Խաչատրյանը:

Նա ներկայացրեց կառավարության հեղինակած «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխություններ և լրացումներ կատարելու մասին նախագիծը:

Փոխնախարարի խոսքով՝փոփոխությամբ նաև նախատեսվում է անցումային շրջանի համար, մինչև «Անձի ֆունկցիոնալության գնահատման մասին» օրենքի ամբողջական կիրարկումը, դրամական աջակցություն վճարել այն զինծառայողներին, ովքեր ունեցել են առաջին կամ երկրորդ խմբի կամ ֆունկցիոնալության խորը կամ ծանր աստիճանի սահմանափակումով հաշմանդամություն (ճանաչվել են հիմնադրամի շահառու) և բժշկասոցիալական փորձաքննության արդյունքում ճանաչվում է երրորդ խմբի կամ ֆունկցիոնալության միջին աստիճանի սահմանափակումով հաշմանդամություն ունեցող անձ:

«Դրամական աջակցության չափն առաջարկվում է` սպայական կազմի զինծառայողներին` 75 000 դրամ, պայմանագրային և զորահավաքային կազմի զինծառայողներին, կամավորականներին` 50 000 դրամ, պարտադիր ժամկետային կազմի զինծառայողներին` 25 000 դրամ»,-ասաց Խաչատրյանը և բացատրեց, որ գումարները սահմանվել է` հաշվի առնելով այն հանգամանքը, որ այդ անձինք ստանալու են նաև հաշմանդամություն զինվորական կենսաթոշակ և համապատասխան պարգևավճար:

Փոխնախարարի բերած տվյալներով՝ փոփոխությունը վերաբերելու է 114 անձի, որոնք այդ վիճակում են հայտնվել և կանխատեսվում է, որ նոր օրենքի գործարկումից հետո ընդհանուր 160 անձ կդառնան երրորդ կարգի հաշմանդամ և կզրկվի հիմնադրամի շահառու լինելու իրավունքից:

Նրա խոսքով՝ նախագծով շահառու սպայական կազմը կստանա 149,300 դրամ, երբ նախկինում  Հիմնակդրամից ստանում էր 200,000 դրամ, պայմանագրային ենթասպայական և շարքային կազմերը,կամավորագրվածները 116,200 դրամ, նախկին 150,000 դրամի փոխարեն և պարտադիր ժամկետային զինծառայողները կստանան 91,000 դրամ նախկին 100,000 դրամի փոխարեն:

Դավիթ Խաչատրյանը հավելեց, որ այդ գումարները կտրամադրվեն 3 տարի ժամանակով, որից հետո շահառուներն այլևս Հիմնադրամից դրամական աջակցություն չեն ստանա, այլ պետության սահմանած աջակցության մյուս միջոցներից և թոշակներից կօգտվեն:

«Այս օրենքի նախագծով մենք իրականում վատթարացնում ենք այսօրվա իրավիճակը»,-հայտարարեց «Հայաստան»  խմբակցության պատգամավոր Աղվան վարդանյանը և փոխնախարարին հարցրեց, թե ավելի ճիշտ չէր լինի հարցին անդրադառնալ, երբ ֆունկցիոնալության գնահատման համակարգը լիարժեք ներդրվի:

Փոխնախարարը հայտնեց, որ փոփոխությունը ֆինանսական և բարոյական անցման իրավիճակ է ապահովում և պետք է հաշվի առնել, որ այդ զինծառայողների առողջական վիճակն էլ է լավացել, եթե հաշմանդամության կարգը իջեցվել է: