Ձեր վստահելի աղբյուրը

Հավաքական անվտանգության պայմանագրի կազմակերպության (ՀԱՊԿ) անդամ երկրների փրկարարական ստորաբաժանումների «Ժայռ-2023» զորավարժությունները, որոնք կանցկացվեն սեպտեմբերին Բելառուսում, ուղղված են լինելու միջուկային և ռադիացիոն անվտանգության խնդիրների մշակմանը։ ՏԱՍՍ-ը փոխանցում է, որ այդ մասին երեքշաբթի հայտարարել է Բելառուսի արտակարգ իրավիճակների նախարար Վադիմ Սինյավսկին։

«Մենք կունենանք բավականին լուրջ իրադարձություններ «Ժայռ-2023» զորավարժությունների գծում, որոնք այլ երկրների մեր գործընկերների մասնակցությամբ կկազմակերպենք այստեղ, սեպտեմբերին:  Մեր զորավարժությունների թեման է ճառագայթային և միջուկային անվտանգությունը»,-«Բելառուս-1» հեռուստաալիքին տված հարցազրույցում ասել է նախարարը։

Սինյավսկին ավելի վաղ հայտնել էր, որ այս զորավարժությունների շրջանակներում նախատեսվում է մշակել ՀԱՊԿ երկրների փրկարարների համատեղ գործողությունների համակարգումը բարդ արտակարգ իրավիճակներին արձագանքելիս։ Նախարարը նշել է, որ 2023 թվականին ՀԱՊԿ-ում Մինսկի նախագահության շրջանակներում աշխատանքներ կիրականացվեն արտակարգ իրավիճակներում օպերատիվ կառավարման արդյունավետության բարձրացման ուղղությամբ։ Նա հայտնել է, որ սեպտեմբերին Մինսկում նախատեսվում է անցկացնել ՀԱՊԿ անդամ երկրների արտակարգ իրավիճակները համակարգող խորհրդի հերթական նիստը, որի կազմում ընդգրկված են կազմակերպության անդամ երկրների փրկարարական վարչությունների ղեկավարները։