Ձեր վստահելի աղբյուրը

Չնայած Ռուսաստանի նկատմամբ արևմուտքի տնտեսական պատժամիջոցներին՝ Հայաստան շարունակում է  ներմուծվել ու սպառվել եվրոպական, ամերիկյան բրենդների սիգարետների ռուսական արտադրանքը։

Փաստը զարմացրել է ու կասկածներ է հարուցել հայաստանցի ուշադիր սպառողի մոտ։

«Իմ գնած ծխախոտը բրիտանական է, սակայն ներքին փաթեթավորումը տվալ ընկերությանը չէ, տուփի վրա նշված է՝ արտադրված է  Ռուսաստանում անցած տարեվերջին, մինչդեռ Ռուսաստանը, բոլորիս հայտնի է, գտնվում է տնտեսական պատժամիջոցների ներքո»,-Panorama.am-ի հետ զրույցում ասում է քաղաքացին ու կասկածներ հայտնում սիգարետի որակի, ծագման մասին։

Խանութներում փոքր ուսումնասիրությունը ցույց տվեց, որ նման խնդիր կա, Երևանում վաճառվում է շվեյցարական, բրիտանական, ամերիկյան ու այլ ընկերությունների՝ Ռուսաստանում արտադրված ծխախոտ։ Ստացվում է՝  Հայաստան է բերվում պատժամիջոցների ներքո գտնվող արտադրանք։

«Միանշանակ պնդել, որ այդ ընկերությունները միացել են պատժամիջոցներին, չենք կարող։ Առնվազն ճիշտ կլինի, որ ներմուծող ընկերությունները սպառողի համար հասանելի տեղեկություն տան, ինչպե՞ս է ստացվում, որ Հայաստանում կա նման արտադրանք, արդյո՞ք այդ ընկերությունների ներկայացուցչությունները Ռուսաստանում շարունակում են գործել։ Եթե չեն փակվել, խնդիր չունենք, եթե փակվել են, ուրեմն խնդիր կա»,-խոսելով ստեղծված իրավիճակի մասին՝ Panorama.am-ի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը։

Արևմտյան ԶԼՄ-ներում այս թեմայով հրապարակումների մոնիտորինգը ցույց տվեց, որ անցած տարվա ընթացքում եղել են  ծխախոտի արտադրությամբ զբաղվող ընկերություններ, որոնք հայտարարել են՝ չեն միանում պատժամիջոցներին, կշարունակեն իրենց արտադրանքը վաճառել Ռուսաստանում։

«Ցանկանում ենք չափազանց բարդ ու անորոշ ժամանակներում հոգ տանել մեր բազմաթիվ աշխատակիցների մասին, միաժամանակ կասեցրել ենք Ռուսաստանում  ծրագրված բոլոր կապիտալ ներդրումները և կենտրոնանալու ենք տեղական արտադրության վրա»,-հայտարարել էր ամերիկա-բրիտանական ընկերությունը։

Սպառողների շահերի պաշտպանությամբ զբաղվող ՀԿ նախագահն այս իրավիճակում հիշեցնում է պետական վերահսկողության ու դրա անհրաժեշտության մասին։

«Ցավոք, մենք ապրում ենք մի իրականության մեջ, որտեղ ինչի մասին ամենաշատն են խոսում, ամենաքիչ գործն են անում։ Կհիշեք, թե ծխախոտի դեմ պայքարի շուրջ ինչ մեծ աղմուկ էր բարձրացել, դրոշակակիրներշը ծխելու դեմ ինչ  պայքար էին մղում, օրենք ընդունվեց։ Մինչդեռ տարիներ շարունակ ծխախոտի ոլորտում որևէ վերահսկողություն չի իրականցվել։ Չենք լսել մի հայտարարություն, որ X ընկերության սիգարետը ստուգել ենք, հայտնաբերել ենք այս կամ այն խնդիրը։ Եվ սա այն պարագայում, երբ երկրում կա հավատարմագրված լաբորատորիա, որը կարող է նման  ստուգում իրականացնել»,-ասաց Բաբկեն Պիպոյանը։

Նրա խոսքով, եթե չկա պետության կողմից ինֆորմացիա, ապա սպառողը փորձում է խնդրի լուծումն ինքնուրույն գտնել։

«Հետևաբար ճիշտ կլինի, որ բիզնեսն ինքն արձագանքի, և ասի, թե ինչպես է ստացվում, որ առաջին հայացքից սանկցիայի տակ հայտնված արտադրանքն այս ժամանակահատվածում ներմուծվում  է Հայաստանում։ Չի բացառվում, որ այս արտադրանքը սանկցիայի տակ չի հայտնվել, և որևէ խնդիր չկա, բայց նույն տրամաբանությամբ չի բացառվում նաև, որ սանկցիան կիրառված է, տեղի է ունենում ապօրինի արտադրություն և շրջանառություն, ինչն իհարկե կարող է լինել շատ խնդրահարույց է։ Բայց քանի որ այս ոլորտում պետական մակարդակով որևէ արձագանք չի եղել, բացի մի վատ օրենքի ընդունումից, որը չի էլ պահվում, ճիշտ կլինի՝ բիզնեսը սպառողների հետ ուղիղ շփման միջոցով խնդիրը կարգավորի»,-ընդգծեց ՀԿ նախագահը։