ՀՀ երրորդ նախագահ Սերժ Սարգսյանի գործով հարցաքննվեց ևս մեկ վկա
Երևանի ընդհանուր իրավասության դատարանում, դատավոր Վահե Միսակյանի նախագահությամբ, ՀՀ երրորդ նախագահ Սերժ Սարգսյանի և մյուսների գործով դատական նիստին հարցաքննեց վկա Արսեն Հարությունյանը: Նա հայտարարեց, որ 2011-2014 թվականը եղել է «Մաքսուր» ՍՊԸ–ի (մեծածախ վառելիքի ներմուծող և մատակարար) տնօրեն:
«Եղել եմ ֆորմալ տնօրեն, իրական տնօրինությունն արել է Մանուկյան Խաչիկը: Ես զբաղվել եմ կազմակերպչական և ֆինանսական հարցերով՝ փոխանցումներ, կոնվերտացիաներ եմ արել: Ընդհանուր գործունեությունը կազմակերպել է Մանուկյան Խաչիկը։ 2019-ի գարնան վերջ կամ ամռան սկիզբ Մանուկյան Խաչիկը ինձ կանչեց և ասաց, որ նման գործընթաց կա, հնարավոր է ինձ էլ կանչեն քննչական: 2019 թվականի ամռան սկզբին ինձ կանչեցին Հատուկ քննչական ծառայություն այս գործով որպես վկա ցուցմունք տալու։ Մի անգամ էլ, ինչքան հիշում եմ, կանչել են աշնանը»,- նշեց նա։
Նա հայտնեց, որ ընկերության սեփականատեր Խաչիկ Մանուկյանի հետ ազգակցական կապեր ունի։
Ինչ վերաբերվում է այս գործին, վկան ասաց. «Մանուկյան Խաչիկն ինձ հրահանգ տվեց, որ այսպիսի տենդեր կա, այս գինը ներկայացրու՝ մասնակցենք. կշահենք՝ լավ, ինչ-որ մեկի հետ կփորձենք մատակարարել, չենք շահի՝ Աստված մեր հետ»:
Ա.Հարությունյանի խոսքով, այդ ժամանակ դիզվառելիքի խոշոր ներմուծողներն էին «Ֆլեշ» և CPS ընկերությունը, «Մաքսուրը», որոնք մասնակցում էին հիմնական տենդերներին, նաև կոնկրետ այդս տենդերին։
«Ես գիտեմ, որ երեք ընկերություններ են մասնակցել՝ «Ֆլեշ» և CPS ընկերությունները, մեր ընկերությունը։ Ես այդքանը գիտեմ։ Մանուկյան Խաչիկն ինձ այս երեքի մասին է ասել։
Մանուկյան Խաչիկն ինձ ասել է ներկայացրու այս թվով գնային առաջարկ, որպեսզի մասնակցենք մրցույթին։ Ինչքան հիշում եմ, մեկ լիտրը 420 կամ 430 դրամի սահմաններում։ Այդ գնային սահմաններում, կոնկրետ չեմ հիշում»,- ասաց վկան՝ հավելելով, որ հաշվարկներն արել է Խաչիկ Մանուկյանը և նրա առաջարկած գինն է ներկայացվել մրցույթին։
Վկա Ա. Հարությունյանը հարցաքննության ընթացքում հաճախ էր ասում՝ «չեմ հիշում», «ինչքան հիշում եմ», «իմ պարտականությունների մեջ չի մտել»։
Նա ասաց, որ չի հիշում, չգիտի, թե ինչու հենց իրենց ընկերության հետ պայմանագիրը չկնքվեց.
«Գիտեմ, որ պայմանագիր կնքվել է «Ֆլեշ» ընկերության հետ, իսկ թե ինչու մեր ընկերության հետ չկնքվեց, ինչ եղավ, ոնց եղավ, ձեր հացին չեմ կարող պատասխանել, քանի որ տեղյակ չեմ։ Պատճառից ընդհանրապես տեղյակ չեմ, թե ինչու մեր ընկերության հետ չկնքվեց»։
Պաշտպան Ամրամ Մակինյանն ասաց, որպեսզի վկան հստակեցնի, թե ինչ նկատի ուներ Խ.Մանուկյանը ասելով ՝ «կշահենք՝ լավ, ինչ-որ մեկի հետ կփորձենք մատակարարել», խնդրեց բացատրել, թե ինչ է նշանակում «ինչ-որ մեկի հետ կփորձենք մատակարարել», վկան նշեց. «Քանի որ ծավալը մեծ էր, իմ կարծիքով, մտածել է, որ կմիանանք իրանական կամ վրացական որևէ ընկերության հետ մատակարարում իրականացնելու համար»:
Վկայի հարցաքննությունից հետո դատական նիստը հետաձգվեց։ Հաջորդ նիստը կկայանա մարտի 9-ին։
Հիշեցնենք, որ քրեական գործով այս պահին մեղադրյալի կարգավիճակում է երեք անձ. Սերժ Սարգսյանից բացի մեղադրանքներ են առաջադրվել նաև Գևորգ Հարությունյանին, գործարար Բարսեղ Բեգլարյանին։
Ըստ Սերժ Սարգսյանին առաջադրված մեղադրանքի՝ «նա 2008թ․ ապրիլի 9-ից մինչև 2018թ․ ապրիլի 9-ը ընկած ժամանակահատվածում, զբաղեցնելով ՀՀ նախագահի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագործելով, 2013թ․ հունվարի 25-ից մինչև նույն թվականի փետրվարի 7-ն ընկած ժամանակահատվածում, կազմակերպել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակության կատարում»։
Ըստ Բարսեղ Բեգլարյանին առաջադրված մեղադրանքի՝ «նա հանդիսանալով «Ֆլեշ» ՍՊ ընկերության սեփականատեր, 2013թ․ հունվարի 25-ից փետրվարի 7-ն ընկած ժամանակահատվածում դրդել է 2013թ․ Հայաստանի Հանրապետության գյուղատնտեսության նախարարի պաշտոնը զբաղեցնող Սերգո Կարապետյանին՝ ՀՀ հողօգտագործողներին 2013թ․ գարնան գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագրի իրականացման ընթացքում կատարել ՀՀ կառավարությանը վստահված, պահուստային ֆոնդում գտնվող առանձնապես խոշոր չափերով պետական միջոցների՝ ընդհանուր 489,160,310 ՀՀ դրամի վատնում»։
Ըստ Գևորգ Հարությունյանին առաջադրված մեղադրանքի՝ «նա 2012թ․ հունիսի 25-ից մինչև 2015թ․ հունվարի 12-ն ընկած ժամանակահատվածում զբաղեցնելով ՀՀ գյուղատնտեսության նախարարության բուսաբուծության վարչության պետի պաշտոնը, հանդիսանալով մշտապես իշխանության ներկայացուցչի գործառույթներ իրականացնող պաշտոնատար անձ, իր պաշտոնեական դիրքն օգտագրծելով, 2013թ․ հւնվարի 25-ից մինչև նույն թվականի փետրվարի 7-ն ընկած ժամանակահատվածում, օժանդակել է պաշտոնատար մի խումբ անձանց կողմից պետությունից վատնելու եղանակով առանձնապես խոշոր չափերով գումարի՝ 489,160,310 ՀՀ դրամի հափշտակություն կատարելուն»։
Հիշեցնենք, որ կորոնավիրուսի հետևանքով մահացել են գործով անցնող Սերգո Կարապետյանը և Սամվել Գալստյանը։ Դատարանի որոշմամբ, նրանց նկատմամբ քրեական հետապնդումը դադարեցվել է։
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
