Ձեր վստահելի աղբյուրը

Քիչ անց կմեկնարկի ՀՀ կառավարության հերթական նիստը, որի օրակարգում մինչ այժմ  ընդգրկված է 30 հարց։ Սակայն պարզ չէ, թե ինչ են քննարկելու նիստում, եթե մինչ այս պահը ընդգրկված 30 հարցն էլ չզեկուցվող են։ 

Ի դեպ, սա Նիկոլ Փաշինյանի կառավարությունում պարբերական բնույթ է կրում։ Ամեն հինգշաբթի անցկացնում են նիստեր, օրակարգում ընդգրկում են հարցեր, որոնց 90 տոկոսը չզեկուցվող են, մինչդեռ դրանցում կան կարևոր հարցեր, որոնց մասին այդպես էլ հանրությունը չի իմանում։

Ահա այսպես  բաց և թափանցիկ է աշխատում հայրենի կառավարությունը։

Չզեկուցվող նախագծերից մեկով նախատեսվում է հավանություն տալ «Սահմանադրական դատարանի մասին» սահմանադրական օրենքում և հարակից օրենքներում  լրացումներ կատարելու մասին օրենքների նախագծերին:

Նախագծերով առաջարկվում է «Սահմանադրական դատարանի մասին» սահմանադրական օրենքում, ՀՀ վարչական դատավարության, ՀՀ քաղաքացիական դատավարության և ՀՀ քրեական դատավարության օրենսգրքերում կատարել համապատասխան լրացումներ՝ նախատեսելով ՀՀ սահմանադրական դատարանի և ՀՀ վճռաբեկ դատարանի կողմից խորհրդատվական կարծիք ստանալու համար Մարդու իրավունքների եվրոպական դատարանին դիմելու ընթացակարգային կանոններ, այդ թվում՝դատավորի կողմից խորհրդատվական կարծիք ստանալու առաջարկություն ներկայացնելու հնարավորության,խորհրդատվական կարծիք ստանալու խնդրանքին ներկայացվող պահանջների, փոխգործակցությունն ապահովող անձի վերաբերյալ կարգավորումներ:

Մեկ այլ որոշումն էլ վերաբերում է ՀՀ կառավարության 2022 թվականի փետրվարի 17-ի «Արցախի Հանրապետության առանձին շրջաններից տեղահանված ընտանիքների համար բնակարանային մատչելիության ապահովման պետական աջակցության ծրագիրը հաստատելու մասին»։