Ձեր վստահելի աղբյուրը

«Այս փուլում շատ արդիական է դարձել  Արցախի Հանրապետության միջազգային ճանաչման խնդիրը, քանի որ միայն այդ եղանակով է հնարավոր, եթե խոսում ենք իսկապես արցախցիների իրավունքների մասին, իրապես այդ իրավունքները դարձնել երաշխավորված»,- «Արցախի Հանրապետության միջազգային ճանաչման հրամայականը» գիտագործնական համաժողովին Panorama.am-ի հետ զրույցում ասաց իրավաբանական գիտությունների դոկտոր, պրոֆեսոր Գևորգ Դանիելյանը։

Նա նշեց, որ Արցախի ճանաչման իրավական հիմքերը շատ են, եղել է նախկին խորհրդային օրենսդրությունը, ոիի հիման վրա Արցախի ժողովուրդն արդեն իսկ իրացրել է ինքնորոշման իր իրավունքը, այսօր էլ դա կարող է կրկնվել, եթե ինչ-որ մի տեղ վիճահարույց համարվի հանրաքվեի արդյունքները։

«Այստեղ շատ կարևոր է, թե կա արդյոք քաղաքական, պետական կամք, որպեսզի այդ մարդկանց հնարավորություն տրվի իրականացնելու իրենց ազգային ինքնորոշման իրավունքը»,- ասաց իրավաբանական գիտությունների դոկտորը։

Նա վստահ է, որ Արցախի ժողովուրդը համառ է, գիտակցի է, եթե հանրաքվե լինի, բնականաբար, կքվեարկեն ազգային ինքնորոշման օգտին։

«Բայց կունենա՞նք մենք այդ հանրաքվեն կազմակերպելու կամքը»,- հարցադրում արեց Գ.Դանիելյանը։

Ըստ իրավաբանի, միջազգային հանրությանը պետք է հասանելի դառնա, որ այստեղ ընդհանուր,  վերացական իրավունքների մասին չէ խոսքը, կոնկրետ ազգային ինքնորոշման իրավունքը իրացնելու, երաշխավորելու, երկակի ստանդարտներից ձերբազատվելու մասին է։

Գևորգ Դանիելյանը միաժամանակ նշեց, որ մեծ հույսը չունի միջազգային հանրությունից, բայց եղածը պետք է օգտագործել. «Միջազգային  հանրությունն այսօր շատ ամորֆ է, այդպիսին է դարձել, հեղինակազրկվել է հենց իր երկակի ստանդարտների արդյունքնում։ Դուք ինքներդ եք  ձեզ վարկաբեկել, հիմա ձեր վրա հույս չենք դնում, բայց այլ ելք չկա»։

Նա հուսով է, որ ինչ-որ մի տեղ ավելի մեծ դեր ունեն դատարանները։

«Այլ հարց է՝ իսկ այդ դատական ակտներն ինքնընստինքյան կկատարվե՞ն։ Ոչ,  ուղղակի այդ դատական ակտերը փաստում են իրողությունը, այն իրողությունը, որից մենք ենք անգամ հրաժարվել»,- ասաց նա։

Ըստ Գ.Դանիլյանի, ամենայն հավանականությամբ Հաագայի դատարանի որոշումը դեր չի խաղա  Լաչինի միջանցքի բացման համար։

«Կբացվի, բայց աշխարհաքաղաքական այլ  շահեր  հաշվի առնելով, բայց սա կլինի իրավաբանորեն հաստատված շատ կարևոր փաստ մեր հետագա գործընթացներում»,- ասաց իրավաբանը։

Գ. Դանիելյանի խոսքով, իրենք ուզում են  հանրությանը  ցույց տալ, որ այլընտրանք կա, ուղղակի ճիշտ չի ներկայացվում՝ քննադատում են, բայց իբր ոչինչ չեն առաջարկում։

«Առաջարկում ենք, ուղղակի պետք է այդ առաջարկությունները համակարգված  հասանելի դարձնենք մեր հանրությանը և այդ առաջարկությունները բացարձակապես  աղերսներ չունեն ազգային անվտանգության հետ, ինչպես  երբեմն շատ պրիմիտիվ  փորձ է արվում ներկայացնել, թե  իբրև մենք իրավիճակը համարժեք չենք ընկալում, ավելի շատ ենք սրում ու ազգային  անվտանգության խնդիրներ ենք ստեղծում։ Ոչ, հակառակը, եթե մենք պարբերաբար զիջում ենք, հենց ստեղծում ենք ազգային անվտանգության տեսանկյունից խոցելի իրավիճակներ»,- ասաց Գևորգ Դանիելյանը։

Հարցազրույցն ամբողջությամբ՝ տեսանյութում։