Ձեր վստահելի աղբյուրը

«Միջազգային հանրությունն ունի Արցախի հանրապետության ճանաչման իրավական, պատմական և քաղաքական բավարար հիմքեր»,-«Արցախի հանրապետության միջազգային ճանաչման հրամայականը» խորագրով  համաժողովի ժամանակ այսօր հայտարարեց Արցախի ԱԳ նախարար Սերգեյ Ղազարյանը։

Նրա խոսքով՝ 32 տարի առաջ Արցախի անկախության հռչակումը միակ միջոցն էր՝ ապահովելու Արցախի ժողովրդի գոյությունը:

Նախարարը հիշեցրեց, որ 1991թ դեկտեմբերի 10-ին հանրաքվեով իրացրել է ժողովուրդն իր ինքնորոշման իրավունքը, իսկ Ադրբեջանը,փորձելով բռնի ուժով ճնշել Արցախի ժողովրդի ազատության և ինքնորոշման իրավունքը, երեք անգամ դիմել է հակամարտության ուժայինլուծման՝ այդպիսով խախտելով միջազգային իրավունքի և ՄԱԿ-ի կանոնադրության պահանջները:

Հայտնելով, որ հարաբերական խաղաղության շրջանում Ադրբեջանը հետևողականորեն վարել է էթնիկ ատելություն բորբոքող և խտրականության քաղաքականություն՝ Սերգեյ Ղազարյանը նշեց, որ  զուգահեռաբար պաշտոնական Բաքուն 30 տարի շարունակ սաբոտաժի է ենթարկել միջազգային միջնորդներին, մասնավորապես, ԵԱՀԿ Մինսկի խմբի համանախագահող երկրների՝ միջազգային իրավունքի նորմի հիման վրա հակամարտության խաղաղ կարգավորմանն ուղղված բոլոր փորձերը:

Արտաքին գործերի նախարարը փաստեց, որ Արցախի և նրա 120.000 բնակչության ավելի քան 70 օր շարունակվող շրջափակումը էթնիկ զտման քաղաքականության հերթական օրինակն է:

Նրա խոսքով՝ Ադրբեջանի խտրական քաղաքականության վարման փաստը հաստատել է նաև ՄԱԿ-ի արդարադատության միջազգային դատարանը, որի որոշումներն արձանագրել են Ադրբեջանի կողմից հայերի դեմ տարվող ռասսայական ատելության և խտրականության հրահրումն ու քարոզչությունը:

«Դատարանի եզրակացությունները թույլ են տալիս Ադրբեջանի քաղաքականությունը, այդ թվում՝ Արցախի շրջափակումը, բնորոշել որպես Ադրբեջանի իշխանությունների կողմից միտումնավոր իրականացվող խտրական գործողությունների դրսևորում: Միջազգային հանրության կողմից Արցախի անկախության ճանաչումը միջոց է՝ կանգնեցնելու Արցախի ժողովրդի իրավունքների զանգվածային և պարբերաբար խախտումները»,-հայտարարեց Ղազարյանը: