Ձեր վստահելի աղբյուրը

«Այս պատերազմը մենք մեր գլխին ենք բերել, որովհետև տապալել ենք բանակցությունները,  պատերազմը պարտվել ենք, որովհետև մենք չենք կարողացել պահպանել ռազմական հավասարակշռությունը։ Մենք  պարտվել ենք պատերազմը խայտառակ ձևով, քանի որ  այդ պատերազմը վարել ենք շատ վատ»,- «Արցախի Հանրապետության միջազգային ճանաչման հրամայականը» գիտագործնական համաժողովի ժամանակ հայտարարեց ՀՀ արտաքին գործերի նախկին նախարար Վարդան Օսկանյանը։

Նա ընդգծեց, որ չկա պատերազմ, որից հնարավոր չէ  խուսափել, հակառակ պնդումը պարզապես քաղաքական անգործության և անզորության արդարացնելու կանխավարկած է։

Վ.Օսկանյանն ասաց, որ ակտիվ մասնակցություն է ունեցել Մինսկի խմբի կողմից  առաջարկված բոլոր 6 պայմանագրերին, և հատկապես Մադրիդյան փաստաթուղթին։

«Ես կարող եմ հավակնել, որ ես այդ  փաստաթղթի գրողներից մեկն եմ։ Այնտեղ ինչ հայանպաստ դրույթ կա, դրա հեղինակը եղել եմ ես իմ ակտիվ մասնակցությամբ։

Հիշում եք՝ ինչ-որ մի պահի Փաշինյանն ասել էր, որ պետք է խորանա Մադրիդյան փաստաթղթի մեջ, դրույթներ կան, որոնք իրեն անհասկանալի են, Ալիևի հետ էր խորհրդակցել այդ հարցում։ Այդ օրերին ես Փաշինյանի մոտ կանգնած մարդկանց ասացի՝ խնդրում եմ ձեր ղեկավարին ասեք, որ Մադրիդյան փաստաթղթի հեղինակն այստեղ է, Երևանում է  ապրում, կարող է իսկապես ինձ կանչել ու խորհրդակցել։ Եթե, իրոք, այդ օրերին ինձ կանչած լիներ, և ես առիթ ունենայի իր հետ խոսելու, ես իրեն կասեի՝ հաշվի առնելով այդ օրերին իր բարձր հեղինակությունն, լայն աջակցությունը Սփյուռքում, Արցախում և Հայաստանում, ինքն ունի այն հնարավորություն, որ կարողանա քայլ անել, որը նախկին նախագահները  չուզեցին կամ չկարողացան անել. ինքը  իր վրա  վերցնի այդ պատասխանավությունը, անի այդ լրացուցիչ մի քանի զիջումները և հասնի իսկապես Արցախի  հարցի հայանպատ կարգավորմանը։

Այդ հնարավորությունն իսկապես կար, Մադրիդյան փաստաթուղթը  այդ հնարավորությունը տալիս էր, Փաշինյանը լավ ժառանգություն էր ստացել։ Ես, չնայած նրան, որ ինքը սխալ ճանապարհով էր տանում, պատրաստ էի  հենց այդ հարցում իսկապես իր կողքը կանգնել ու ամեն ինչով աջակցել,  որպեսզի հնարավորություն ստեղծվեր իսկապես հասնել այդ հարցի խաղաղ կարգավորմանը ի նպաստ  Հայաստանի և Արցախի, բայց Փաշինյանն այլ ուղղությամբ գնաց՝ գնաց ներքին պառակտման, սկսեց իր զրոյական կետից»,- ասաց Օսկանյանը։

Ըստ նրա, երբ տապալում են դիվանագիտությունը, գալիս է պատերազմ, եթե տանուլ են տալիս պատերազմը,  դիվանգիտությունը նոր հարթության վրա դնելու անհրաժեշտոթյուն և հրամայական է  ստեղծվում։

«Ահավասիկ,  պատերազմից հետո Հայաստանի իշխանությունները վրիպեցին՝ չգիտեմ՝ չէին կարողանում կամ չէին ցանկանում, բայց  չկարողացան իսկապես դիվանագիտությունը բերել առաջին գիծ ու օգտվել նոր  ընձեռնված հնարավորություններից։

Նրանք գնացին իրենց սխալն արդարացնելու ճանապարհով, այդ սխալներն օրեցօր ավելի խորացան ու հասան այսօրվան։ Մի ամբողջ  պետական համակարգ գործի դրվեց  աշխարհին համոզելու, որ Արցախը մերը չէ, ադրբեջանական տարածք է և այդ գործողությունն այսօր էլ շարունակվում է»,- ասաց նախկին նախարարը։

Նա ընդգծեց, որ  Հայաստանի որևէ  իշխանություն Արցախը երբեք Ադրբեջանի կազմում չի ճանաչել, երեք նախագահներն էլ նույն մոտեցումն են ունեցել՝  ինչ որ վերջնարդյունքում Արցախը կդառնա Հայաստանի մաս։

«Այսօր մենք պետք է գիտակցենք, որ Ադրբեջանը չի բանակցում խաղաղության համար, բանակցում է պատերազմում իր ձեռք բերած ավարն օրինականացնելու համար»,- ասաց Վարդան Օսկանյանը։

Նա նաև նշեց, որ Ռուբեն Վարդանյանի՝ Արցախի պետական նախարարի պաշտոնից հեռացնելով  ջրել են Հաագայի դատարանում ունեցած ձեռքբերումը։

«Ադրբեջանն  այսօր, իրոք, կարողանում է պարտադրել իր կամքն ամեն ինչում, բանակցային  օրակարգը թելադրված է  Ադրբեջանի կողմից։

Բանակցային օրակարգում չկա հայկական օրակարգ։ Այդ օրակարգը պետք է ընդլայնել, որպեսզի  առևտուր անելու ավելի մեծ հնարավորություն լինի, բանակցությունները շարունակելու, երկարացնելու հնարավորություն լինի և որևէ փաստաթուղթ չստորագրվի։

Այսօր այլընտրանք կա։ Փաստաթուղթ ստորագրելու այլընտրանքը փաստաթուղթ չստորագրելն է։ Մեր համեստ խնդիրն է չստորագրել այս պահին որևէ փաստաթուղթ, Հայաստանի իշխանությունն այսօր ունի այդ հնարավորությունը»,- ասաց Վարդան Օսկանյանը։