Ձեր վստահելի աղբյուրը

«Այս ողջ ժամանակահատվածում Վեհափառ հայրապետը Գերագույն հոգևոր խորհրդի հետ միասին բազմաթիվ առիթներով անդրադարձ է կատարել այսօրվա իրականությանը, որը մենք, ընդհանուր առմամբ գնահատում ենք «գողացված ուրախության իրականություն», «խոցված իրականություն», միևնույն ժամանակ այն մեզ համար մնում է հույսի և վերականգնումի ճանապարհի իրականություն»,-«Արցախի միջազգային ճանաչման հրամայականը» խորագրով համաժողովի բացման խոսքում ասաց Տավուշի թեմի առաջնորդ, Տեր Բագրատ արքեպիսկոպոս Գալստանյանը:

Նա փոխանցեց Վեհափառ հայրապետի օրհնությունը և ջերմ գնահատականքը նրանց, ովքեր կազմակերպել են միջոցառումը և գեթ մի փոքր մտահոգություն ունեն և կյանքի առաքելություն են դարձրել պայքարն Արցախի համար:

«Շատ հստակ նշվել է, որ մեր գոյության, գիտակցության, ինքնության և ապրումների համար այսօր և ընդհանրապես Արցախը և ողջ հայ ժողովրդի ինքնությունը և, միևնույն ժամանակ, ինքնորոշման իրավունքն անսակարկելի են, սա այն բացարձակ սահմանագիծն է, որից այն կողմ մենք ուղղակիորեն չենք կարող անցնել»,-հայտարարեց  Տեր Բագրատ Գալստանյանը:

Շեշտելով, որ արցախցիների ինքնորոշման իրավունքն անսակարկելի է՝ Տավուշի թեմի առաջնորդն հայտարարեց.

«Բոլորին շնորհավորում եմ այն խիզախումների համար, որ 35 տարի առաջ այս օրերին ապրում էր մեր ողջ ժողովուրդը՝ միտված լինելով Արցախի և ընդհանրապես լայն իմաստով, մեր կյանքի ազատագրությանը:

Վերստին հաստում ենք, որ մենք կոչված չենք վերջնականապես պարտվելու, այլ կոչված ենք այդ պարտությունից սովորելու, վեր կանգնելու, կռելու և կերտելու մեր նոր հաղթանակները»։