Ձեր վստահելի աղբյուրը

ԵՄ անդամ երկրների մշտական ներկայացուցիչները համաձայնության են եկել Ուկրաինայում հատուկ ռազմական գործողության պատճառով Ռուսաստանի դեմ պատժամիջոցների 10-րդ փաթեթի շուրջ։ ՏԱՍՍ-ի փոխանցմամբ, այս մասին հայտնել է ԵՄ Խորհրդում Շվեդիայի նախագահությունը։

Սահմանափակող միջոցների նոր փաթեթը ներառում է, մասնավորապես, «երկակի նշանակության ապրանքների և տեխնոլոգիաների նկատմամբ արտահանման ավելի խիստ սահմանափակումներ, պատերազմին աջակցող, քարոզչություն տարածող կամ անօդաչու թռչող սարքեր մատակարարող անհատների և կազմակերպությունների դեմ նպատակային սահմանափակող միջոցներ, պատժամիջոցներ ռուսական ապատեղեկատվության դեմ», ասել է նախագահությունը:

Պատժամիջոցներն այժմ պետք է պաշտոնապես հաստատվեն ԵՄ խորհրդի կողմից՝ գրավոր ընթացակարգով, որից հետո դրանք կհրապարակվեն ԵՄ պաշտոնական ամսագրում և ուժի մեջ կմտնեն։

Եվրամիության առաջնորդները վերջին մի քանի շաբաթների ընթացքում խոստացել էին, որ պատժամիջոցների 10-րդ փաթեթն ուժի մեջ կմտնի փետրվարի 24-ին՝ Ուկրաինայում Ռուսաստանի հատուկ ռազմական գործողության մեկնարկի օրը։