«Ուրիշներին մարդասիրական աջակցություն ցուցաբերլու շտապող իշխանությունը չունի յուրայիններին ապրումակցելու մի գրամ ցանկություն»
«Այսօր ուզում եմ անդրադառնալ արդեն 10 օրից ավել բաց երկնքի տակ լուսացնող մարդկանց խնդրին, խոսքը ՊՆ-ի նախկին շենքի բնակիչների մասին է»,-ԱԺ հայտարարությունների ժամին ունեցած ելույթում ասաց «Հայաստան» խմբակցության պատգամավոր Գառնիկ Դանիելյանը:
Նրա խոսքով՝ 2018 թվականից շենքը մատնված է եղել անտերության և մարդիկ գնացել ու բնակվել են այնտեղ:
Ըստ Դանիելյանի՝ բնակիչների թվում կան 5 և ավել երեխաներ ունեցող բազմազավակ ընտանիքներ, կերակրող մայրեր, հաշմանդամություն ունեցող անձինք, ծերեր:
«Շատերն այստեղ են հայտնվել հայրենազրկումից՝ Հադրութի և Քարվաճառի հանձնումից հետո, կան նաև զոհված զինծառայողների և այս պահին մարտական հերթապահություն իրականացնողների ընտանիքներ»,-տեղեկացրեց պատգամավորը:
Հայտնելով, որ նաև իր համառ ջանքերի շնորհիվ է թույլատրվել շենքին կից վրաններ տեղադրել՝ Գառնիկ Դանիելյանը հայտնեց, որ նախորդ օրը տեղեկացել է, որ հիմա էլ ոստիկանությունը բնակարաններից դուրս է նետում նրանց գույքը, չսպասելով, որ կազմակերպվի դրանց պատշաճ տեղափոխում, ինչն անմարդկային է ու անթուլատրելի:
Պատգամավորը հայտնեց, որ դրսում հայտնված քաղաքացիների վիճակը վատթարանում է և նրանց կյանքին ու առողջությանը կարող է վտանգ առաջանալ:
«Արդեն ունեմ տեղեկություն այն մասին, որ մանկահասակ երկու երեխա հոսպիտալացվել են: Ո՞վ է պատասխան տալու այս երեխաների առողջական խնդիրների համար»,-ասաց ընդդիմադիր պատգամավորը:
Անթուլատրելի համարելով քաղաքացիների նկատմամբ նման անտարբեր, սառնասիրտ վերաբերմունքը՝ Գառնիկ Դանիելյանը հարց հնչեցրեց, թե մարդկանց այս ցրտին առանց տանիքի թողնելուն արդյոք այլընտրանք չկա:
«Ուրիշներին մարդասիրական աջակցություն ցուցաբերլու շտապող իշխանությունը չունի յուրայիններին ապրումակցելու, աջակցելու մի գրամ ցանկություն:Թեև, արցախի մեր 120 հազար հայրենակիցներին անտարբերության մատնած իշխանությունների դեպքում այսպիսի քայլերը բոլորովին անսպասելի չեն»,- հայտարարեց պատգամավորը:
Նա ասց, որ այն պայմանները, որոնք առաջարկվել են մարդկանց՝ շենքը լքելու դիմաց, նրանց խնդիրները չեն լուծում և հարց հնչեցրեց, թե շենքից վտարելուց առաջ ընտանիքների սոցիալական կարիքների գնահատում արվել է, թե ոչ:
«Իշխանություններն այս երեխաների և դրսում գիշերող մարդկանց առողջության վատթարացման բոլոր պատասխանատուներն են»,-խոքն ավարտեց ընդդիմադիր պատգամավորը:
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
