Ձեր վստահելի աղբյուրը

«Հայաստանի և Ադրբեջանականի իշխանությունները վիրտուալ տարածքում ինչ-որ փաստաթուղթ են քննարկում, որը նրանք կոչում են խաղաղության պայմանագիր։ Խաղաղությունը մարդու բանական, բնածին մղումն է»,-խորհրդարանական հայտարարությունների ժամանակ ասաց «Հայաստան» խմբակցության պատգամավոր Արթուր Խաչատրյանը։

Հայտնելով, որ որևէ մեկը չի կարող դեմ լինել խաղաղությանը՝ պատգամավորն ասաց, որ այդ միտքը հնչեցնում է, որպեսզի չասեն, թե ընդդիմությունը դեմ է խաղաղությանը և պատերազմ է տենչում։

Նա հարց բարձրացրեց, թե «խաղաղություն» ասելով ի՞նչ են հասկանում թշնամիները, երբ զավթում են Արցախի զգալի մասը, շրջափակում են Հայաստանը Արցախի Հանրապետությանը կապող կյանքի միջանցքը, ներխուժել են Հայաստանի ինքնիշխան տարածք և սպառնում են Հայաստանից զավթած տարածքներն Ադրբեջանին բռնակցել։

Խաչատրյանը հիշեցրեց, որ արցախյան հակամարտությունը ծագեց, երբ Ադրբեջանը թշնամաբար, ջարդերի միջոցով փորձեց արյան մեջ խեղդել Արցախի հայերի ընդվզումը, զրկել արցախցիներին իրենց հիմնարար՝ ինքնորոշման իրավունքից, իսկ հակամարտությունը խաղաղ ավարտ կունենա, երբ Արցախի ժողովուրդի ինքնորոշման իրավունքը հարգվի։

«Բայց, Ադրբեջանն այսօր էլ հետ չի կանգնել իր մտադրությունից։ Նրանք խաղաղություն չեն ուզում, այլ Հայաստանի ամբողջական կապիտուլյացի են պահանջում։ Ադրբեջանի մտադրությունները հստակ են»,-հայտնեց պատգամավորը և հարցրեց, թե ի՞նչ դիրքորոշում ունեն Հայաստանի իշխանությունները:

Հիշեցնելով, որ Հայաստանի իշխանությունները դեկտեմբերին հայտարարում էին, թե խաղաղության բանակցությունների մասին խոսք լինել չի կարող, քանի դեռ Բերձորի միջանցքը փակ է՝ ընդդիմադիր պատգամավորն ասաց. «Սակայն, փակ միջանցքը չխանգարեց, որ Ալիևն ու Փաշինյանը հանդիպեն Մյունխենում ու բանակցեն, իսկ հիմա լուրեր են շրջանառվում Բրյուսելում հնարավոր բանակցությունների մասին։ Փաստորեն, բանակցությունների քաղաքն այդքան կարևոր էր Հայաստանի իշխանությունների համար»։ 

Հայտարարելով, որ Ադրբեջանը Հայաստանին պայմանագրի ինչ-որ նախագիծ է ներկայացրել՝ Խաչատրյանը հիշեցրեց, որ ընդամենը 3 - 4 տարի առաջ Նիկոլ Փաշինյանը ասում էր, որ բանակցային գործընթացի թափանցիկությունն իրենց համար առաջնային նշանակություն ունի, բայց այսօր նրա ղեկավարած իշխանության ներկայացուցիչները 7 փակի տակ են պահում այդ պայմանագրի բովանդակությունը։

Նրա խոսքով՝ ՀՀ Անվտանգության խորհրդի քարտուղարն ակնարկներ էր արել դրա մասին՝ կարևորելով Արցախի հայերի իրավունքները։

«Ադրբեջանն էլ հայտարարում է, որ պատրաստ է հայ փոքրամասնությանը տա նույն իրավունքները, ինչ ունի Ադրբեջանի ադրբեջանցի մեծամասնությունը։ Այս հարցում կարծես թե Հայաստանի իշխանություններն առարկություն չունեն։ Հիմա ինչ-որ մեխանիզմ են քննարկում։ Հետո էլ կասեն՝ դե, մեխանիզմները կան, դուք բանակցեք, մեր միսիան ավարտված է»,-ենթադրեց պատգամավորը և այն անընդունելու համարեց, քանի որ ժողովուրդը նրանց մանդատ չի տվել Արցախն Ադրբեջանի գերիշխանությանը հանձնել։

Խաչատրյանի խոսքով՝ իշխանությունները խոստացել էին Արցախի դե օկուպացիա և անջատում հանուն փրկության, որ ժողովրդին կներկայացնելնԱրցախի հարցի լուծման մոտեցումները և հայցել նրա կարծիքը։

«Ինչու՞ չեք անում, գոնե այդ մի խոստմանը հավատարիմ եղեք»,-խոսքն ավարտեց ընդդիմադիր պատգամավորը։