Լավրով. Բաքուն համաձայն է ՌԴ-ում հանդիպմանը, իսկ Հայաստանը դեռ վերջնական համաձայնություն չի տվել.
Ռուսաստանը վերահաստատել է իր պատրաստակամությունը՝ հնարավորություն ընձեռելու շարունակել եռակողմ բանակցությունները Ռուսաստանի Դաշնության, Հայաստանի և Ադրբեջանի միջև արտաքին գործերի նախարարների մակարդակով։ Այս մասին այսօր հայտարարել է ՌԴ ԱԳ նախարար Սերգեյ Լավրովը Ադրբեջանի արտգործնախարար Ջեյհուն Բայրամովի հետ բանակցություններից հետո կայացած մամուլի ասուլիսում։
«Մենք վերահաստատեցինք մեր պատրաստակամությունը՝ հնարավորություն ընձեռելու, որպեսզի նման հանդիպումները շարունակվեն»,- ասաց նա։
Լավրովը հավելել է, որ Երևանը դեռ վերջնական համաձայնություն չի տվել արտգործնախարարների եռակողմ հանդիպմանը մասնակցելու հրավերին։
«Անցյալ տարվա դեկտեմբերին պայմանավորվածություն կար Ռուսաստանի Դաշնության տարածքում մեր գործընկերների հերթական հանդիպումն անցկացնելու վերաբերյալ։ <...> Ադրբեջանական կողմը պատրաստ է դրան, հայկական կողմն ասաց, որ իրենք նույնպես չեն առարկում, բայց մինչ այժմ վերջնական համաձայնություն չի տվել։ Ես չեմ կարծում, որ մենք շատ համառ կլինենք մեր ծառայություններն առաջարկելու հարցում»,-շեշտել է նա։
Լավրովի խոսքով, Բայրամովի հետ զրուցել են նաև Հարավային Կովկասում տրանսպորտային և տնտեսական կապերի ապաշրջափակման բանակցային գործընթացի ընթացքի մասին։
«Մենք ակնկալում ենք, որ շուտով Ռուսաստանի, Հայաստանի և Ադրբեջանի փոխվարչապետերը՝ որպես եռակողմ աշխատանքային խմբի համանախագահներ, կկարողանան կոնկրետ պայմանավորվածություններ ձեռք բերել Ադրբեջանի և Նախիջևանի հիմնական տարածքի միջև երկաթուղային երթուղու օգտագործումը վերականգնելու վերաբերյալ։
Մենք ընդգծեցինք հայ-ադրբեջանական սահմանի սահմանազատման հանձնաժողովի աշխատանքն ակտիվացնելու անհրաժեշտությունը, որը ստեղծվել է այն գիտակցությամբ, որ Ռուսաստանը խորհրդատվական օգնություն կտրամադրի այդ աշխատանքներին։ Մենք պատրաստ ենք դրան, ինչպես պատրաստ ենք աջակցել Բաքվի և Երևանի միջև խաղաղության պայմանագրի կնքմանը։ Մեր ընկերներն այսօր մանրամասն տեղեկացրին մեզ, թե ինչպես են նրանք պատկերացնում կարգավորման ջանքերի հետագա ակտիվացման ուղղությունը»,- ասել է Լավրովը։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
