Ձեր վստահելի աղբյուրը

Հայաստանից Արցախը սնուցող միակ էլեկտրագծի խափանման պայմաններում հունվարի 9-ից Արցախում օգտագործվում է միայն տեղում արտադրված էլեկտրաէներգիան:  «Սարսանգ» հէկ-ն ապահովում է էլեկտրաէներգիայի մեծ մասն ու պայմաններ ստեղծում ցանցի համար, որ փոքր հէկ-երը նույնպես կարողանան աշխատել և արտադրանք տալ:

«Եթե 2022 թվականի հունվար-փետրվար ամիսներին արտադրել ենք 10,3 միլիոն կիլովատ ժամ էլեկտրաէներգիա, ապա այս վիճակում մենք հիմա կարտադրենք ամսվա վերջի տվյալներով 27,5 միլիոն կիլովատ ժամ էլէգրաէներգիա: Այսինքն՝ 2,5 անգամ ավելի շատ էլեկտրաէներգիա ենք արտադրել: Դա ծախսեցինք, արտադրեցինք, և փաստորեն Արցախի Հանրապետությունն այդքան շատ էլեկտրաէներգիա է ծախսել, իսկ այն ժամանակ, երբ համակարգում էինք, մի մասը փոխհատուցվում էր Հայաստանից եկող համակարգի միջոցով»,-Արցախի Հանրային հեռոստաընկերությանն ասել է «Սարսանգ» հէկ-ի պետ Գրիգոր Գրիգորյանը։

Սարսանգի ջրամբարում ջրի մակարդակն աննախադեպ իջել է՝ ավելի քան 20 մետր: Ստեղծված իրավիճակում հիդրոկայանն օգտագործում է արտադրական ամբողջ հզորությունը, որ երկիրն էներգետիկ ճգնաժամի չմատնվի: Արցախհեկի գլխավոր ինժեներն ասում է՝ այս տարի ջրամբարում աննախադեպ շատ ջուր էին կուտակել:

«Կուտակել ենք բավականին լավ ջուր՝ հաշվելով, որ ձմեռը կարողանանք օգտագործել, բայց ոչ մեկը չի պատկերացրել, որ բռնելու են այսպես մեզ անջատեն ցանցից, և այսօր արդեն 47 օր է՝ մենք աշխատում ենք առանց ցանցի, սա շատ դժվար ռեժիմ է, շատ ծանրաբեռնված գրաֆիկ է՝ հատկապես հերթափոխի անձնակազմից ակնկալվում է շատ լարված աշխատանք»,-ասել է «ԱրցախՀԷԿ» ՓԲԸ գլխավոր ինժեներ Արմեն Գասպարյանը։

Ջրային կոմիտեի նախագահ Գեորգի Հայրիյանի խոսքով, եթե չվերականգնվի Շինուհայր-Ստեփանակերտ էլէկտրագծի անխափան աշխատանքը, ամռանը Սարսանգից ջուր բաց թողնելու հնարավորություն չի լինելու։  Ջրամբարը լցնելու համար մի քանի տարի է պահանջվելու:

«Երկու շաբաթվա ընթացքում բավականին լուրջ քանակի ջուր է օգտագործվել, որը օրինակի տեսքով նրանց բերել եմ: Եթե դա չլիներ, կարող էինք շատ ավելի ջուր տրամադրել նրանց: Նույն և ավելի բարդ իրավիճակում հայտնվել ենք հիմա»,-ասել է նա։

Գեորգի Հայրիյանի խոսքով՝ գրեթե նույն իրավիճակն էր նաև 2022-ի մարտին, երբ ադրբեջանական կողմը արգելափակել էր Հայաստանից Արցախ գազատար խողովակը: Տեղում էլեկտրաէներգիայի արտադրանքի ավելացումն Արցախի այլընտրանքն է: Ջրի սակավության դեպքում, սակայն, այլընտրանք չունեն սահմանակից ադրբեջանական ցանքսերը:

«Շատ սխալ քաղաքականություն է Ադրբեջանի կողմից՝ Հայաստանից ներմուծվող էլեկտրական հոսանքի անջատումը, որովհետև նրանք հենց իրենց են վնաս տվել, վնաս են տվել իրենց բնակչությանը: Այսինքն՝ Ադրբեջանի այն բնակչությունը, որը վերջին երկու տարում օգտվում էր Սարսանգի ջրերից՝ գյուղատնտեսություն զարգացնելու համար, 2023 թվականին չի ունենա այդ հնարավորությունը, դա միանշանակ»,- նշել է ԱՀ ջրային կոմիտեի նախագահը։

Հունվարի 9-ից սկսած Արցախհէկում աշխատում են աննախադեպ ծանրաբեռնվածությամբ: Վառելիքի բացակայության պատճառով մասնագետները ստիպված են 48-ժամյա հերթապահություն անել: Մեկ ժամանոց հովհարային անջատումները կրկնապատկել են լարվածությունը:

«Եթե այն ժամանակ հէկն աշխատում էր համակարգում, օպտիմալ ռեժիմում էր աշխատում, իսկ հիմա մենք աշխատում ենք այսպես կոչված վթարային վիճակում, և հզորությունը փոփոխությունների է ենթարկվում ամեն րոպեի, որովհետև յուրաքանչյուր բեռի միացման և անջատման ժամանակ կատարվում է հաճախականության և լարման տատանումներ, իսկ դա պետք է բերվի իր նոմինալ վիճակին»,- ասել է «Սարսանգ» հէկ-ի պետ Գրիգոր Գրիգորյանը։
  
2020 թվականի պատերազմի հետևանքով ադրբեջանական վերահսկողության տակ է մնացել 30 հիդրոէլեկտրակայան: Դա է պատճառը, որ տեղական էլեկտրաէներգիայի արտադրությունը գրեթե ամբողջությամբ  մնացել է Սարսանգի ջրամբարի վրա կառուցված հէկի հույսին:

Մանրամասները՝ տեսանյութում։