Ձեր վստահելի աղբյուրը

«Իհարկե, աբսուրդ է, որ ինքնիշխանության տեսանկյունից Հայաստանի Հանրապետությանը պատմական մինիմումին հասցրած քաղաքական ուժը կամ թիմն էներկայացնում այս նախագիծը, բայց մի կողմ դնելով այդ ամենը, օրենքում հստակ առկա է իրավական որոշակիության խնդիր և եթե օրենքը ներկայացնող պաշտոնյան անգամ չէր կարողանում զեկուցել այն և բացատրել, թե ինչ կարգավորումներ են նախատեսված դրանով, ուստի «Պատիվ ունեմ» խմբակցությունը սրան քվեարկելու է ձեռնպահ»,-ԱԺ նիստերի վերջում կազմակերպված քվեարկությունների ժամանակ հայտարարեց «Պատիվ ունեմ» խմբակցության ղեկավար Հայկ Մամիջանյանը:

Խորհրդարանը պատրաստվում էր քվեարկել և առաջին ընթերցմամբ ընդունել Հայաստանի Հանրապետության քրեական օրենսգրքում լրացումներ կատարելու մասին նախագիծը, որով քրեական պատասխանատվություն է նախատեսվում Ինքնիշխանությունից հրաժարվելու բռնի գործողություների և կոչեր հրապարակային հնչեցնելու համար:

ՔՊ-ական պատգամավոր Վահագն Ալեքսանյանն արձագանքեց՝ ասելով. «Պատմական մինիմումներից ով-ով, բայց Հանրապետական կուսակցությունը և «Պատիվ ունեմ»-ը չպետք է խոսեն՝ բոլոր առումներով»:

Հիմնականում ՔՊ-ական պատգամավորների կողմ քվեարկությամբ ընդունվեց և սպառվեց նիստերի օրակարգը, որում ընդգրկված էին հետևյալ օրենքները.

«Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություններ կատարելու մասին (Առաջին ընթերցմամբ),

Հայաստանի Հանրապետության քրեական դատավարության օրենսգրքում լրացումներ կատարելու մասին և «Դատախազության մասին» օրենքում փոփոխություններ և լրացումներ կատարելու մասին (Երկրորդ ընթերցմամբ),

«Աղբահանության և սանիտարական մաքրման մասին» Հայաստանի Հանրապետության օրենքում փոփոխություններ և լրացումներ կատարելու մասին և Վարչական իրավախախտումների վերաբերյալ Հայաստանի Հանրապետության օրենսգրքում լրացումներ և փոփոխություններ կատարելու մասի(Առաջին ընթերցմամբ),

«Ֆիզիկական կուլտուրայի և սպորտի մասին» օրենքում փոփոխություններ և լրացումներ կատարելու մասին (Երկրորդ ընթերցմամբ),

«Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» Հայաստանի Հանրապետության օրենքում փոփոխություններ և լրացումներ կատարելու մասին և «Գույքի նկատմամբ իրավունքների պետական գրանցման մասին» Հայաստանի Հանրապետության օրենքում լրացումներ կատարելու մասին (Երկրորդ ընթերցմամբ),

Հայաստանի Հանրապետության հարկային օրենսգրքում փոփոխություններ և լրացումներ կատարելու մասին և «Կուտակային կենսաթոշակների մասին» օրենքում փոփոխություններ կատարելու մասին(Երկրորդ ընթերցմամբ),

«Հայաստանի Հանրապետության Կառավարության և Չինաստանի Ժողովրդական Հանրապետության Կառավարության միջև` տեխնիկատնտեսական համագործակցության մասին» համաձայնագիրը վավերացնելու մասին,

«Արդյունաբերական քաղաքականության մասին» օրենքում լրացում կատարելու մասին և «Առևտրաարդյունաբերական պալատների մասին» օրենքում լրացում կատարելու մասին(Երկրորդ ընթերցմամբ),

Պետական գաղտնիքի մասին և կից փաթեթը (Երկրորդ ընթերցմամբ),

Հայաստանի Հանրապետության քաղաքացիական օրենսգրքում փոփոխություններ և լրացումներ կատարելու մասին և կից փաթեթը (Առաջին ընթերցմամբ),

«Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում լրացումներ կատարելու մասին(Առաջին ընթերցմամբ),

«Հայաստանի Հանրապետության կառավարության և Ռուսաստանի Դաշնության կառավարության միջև տեղեկատվական անվտանգության ապահովման բնագավառում համագործակցության մասին» համաձայնագիրը վավերացնելու մասին,

«2018 թվականի հունիսի 28-ին ստորագրված՝ Եվրասիական տնտեսական միության անդամ պետությունների և Վիետնամի Սոցիալիստական Հանրապետության կենտրոնական մաքսային մարմինների միջև «Եվրասիական տնտեսական միության և դրա անդամ պետությունների՝ մի կողմից, և Վիետնամի Սոցիալիստական Հանրապետության՝ մյուս կողմից, միջև ազատ առևտրի մասին» 2015 թվականի մայիսի 29-ի համաձայնագրի 5.7 հոդվածի համաձայն՝ տեղեկությունների փոխանակման իրագործման մասին» արձանագրության մեջ փոփոխություններ կատարելու մասին» արձանագրությունը վավերացնելու մասին,

«Քաղաքաշինության մասին» օրենքում լրացումներ և փոփոխություններ կատարելու մասին(Առաջին ընթերցմամբ),

«Հայաստանի Հանրապետության կառավարության և Սիրիայի Արաբական Հանրապետության կառավարության միջև օդային հաղորդակցությունների մասին» համաձայնագիրը վավերացնելու մասին,

«Ավիացիայի մասին» օրենքում լրացումներ կատարելու մասին(Երկրորդ ընթերցմամբ),

«Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում փոփոխություններ և լրացումներ կատարելու մասին(Երկրորդ ընթերցմամբ),

«Ազգային անվտանգության մարմիններում ծառայության մասին» օրենքում փոփոխություններ և լրացումներ կատարելու մասին և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություն կատարելու մասին(Երկրորդ ընթերցմամբ) նախագծերը: