Ձեր վստահելի աղբյուրը

«ՆԳՆ-ի ոստիկանության ծառայության կողմից բավականին ակտիվ պայքար է գնում թմարմիջոցների ապօրինի շրջանառության ուղղությամբ»,-խորհրդարանում հայտնեց ՆԳՆ նախարար Վահե Ղազարյանը:

Նա ասաց, որ 2023 թվականի հունվարի 1-ից առ այսօր ոստիկանության օպերատիվ ամփոփագրերով արձանագրվել է 324 դեպք, որից 122-ը՝ իրացման, 150-ը՝ պահելու:

Վահե Ղազարյանը հայտնեց, որ 45 դեպքը սինթետիկ թմրանյութերին են վերաբերում:

«Իրոք մտահոգիչ է: Եթե կան դեպքեր, ապա, վստահ եմ, որ կան թմրամիջոցների ապօրինի շրջանառության մեծ ծավալներ, այդ իսկ պատճառով 2023 թվականը ոստիկանության կողմից հայտարարվել է թմրամիջոցների դեմ պայքարի տարի»,- հայտնեց ՆԳՆ նախարարը հավելելով, որ այդ նպատակով մշակվել է ռազմավարական ծրագիր:

Նրա խոսքով՝ միջազգային արդյունավետ փորձի հիման վրա նախատեսվում է նաև օրենսդրական փոփոխություններ իրականացնել և արդեն սկսել են բացատրական աշխատանքները երիտասարդության և անչափահասների շրջանում:

Ղազարյանը հայտնեց, որ նախատեսում են նաև ուժեղացնել սահմանային հսկողությունը՝ դրա համար օգտագործելով վարժեցված շներին և ակնկալում են նաև հանրության աջակցությունը:

«Գիտենք, որ ամենաշատը  համացանցի միջոցով իրացումն է տարածված: 2022 թվականին Քրեական ոստիկանության գլխավոր վարչությունում ստեղծվեց համացանցի միջոցով թմրանյութերի ապօրինի շրջանառության դեմ պայքարի բաժին»,-տեղեկացրեց Ղազարյանը և նշեց, որ դրա արդյուքնում 2023 թվականին հայտնաբերվել է 143 դեպք՝ հենց  Թելեգրամ-ալիքներում: