Ձեր վստահելի աղբյուրը

Արցախի Հանրապետության պետնախարարի խորհրդական, ԱՀ մարդու իրավունքների նախկին պաշտպան  Արտակ Բեգլարյանը մեկնաբանել է մարտի 5-ին ադրբեջանական դիվերսիոն հարձակման վերաբերյալ Հարավային Կովկասում Եվրամիության հատուկ ներկայացուցիչ Տոյվո Կլաարի արձագանքը՝ իր անվստահությունը հայտնելով նրան։

«Իմ անվստահությունը/կասկածներն ավելի են խորանում Տոյվո Կլաարի նկատմամբ Ադրբեջանի հանցագործությաններին նրա տված արձագանքի պատճառով։

Նա կամ սիրողական դիվանագետ է, կամ ադրբեջանական ուղեղի լվացման տակ է, կամ կոռումպացված պաշտոնյա է, կամ ունի Եվրոպական արժեքների, շահերի և մարդու իրավունքների շեղված ընկալումներ: Բոլոր չորս տարբերակներն էլ փոփոխություններ են պահանջում»,- գրել է Բեգլարյանը Թվիթերում։ 

Հիշեցնենք, որ մարտի 5-ին առավոտյան՝ ժամը 10։00-ի սահմաններում, ադրբեջանական զինուժի դիվերսիոն խմբի կողմից «Խայփալու» կոչվող տեղանքում ոստիկանության անձնագրային և վիզաների վարչության անձնակազմի հերթափոխի մեքենայի թիրախավորման հետևանքով զոհվել է ոստիկանության 3 և վիրավորվել մեկ ծառայող:

Հարավային Կովկասի ու Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը երեկ հայտնել էր, որ  մեկնել է Բաքու։ «Սպասեք բովանդակալից հանդիպումների Ադրբեջանի ղեկավարության հետ՝ Մյունխենում հանդիպումներից հետո խաղաղ գործընթացն առաջ մղելու համար։

Այսօր տեղի ունեցած մահվան ելքով միջադեպն ընդգծում է կայունության և խաղաղության հասնելու համար բանակցություններն առաջ մղելու հրատապությունը»,- գրել  էր նա։