Ձեր վստահելի աղբյուրը

Վարչական դատարանը՝ դատավոր Ռոբերտ Մաքեյանի նախագահությամբ մերժել է ոստիկանության հայցն ընդդեմ Արցախյան երրորդ պատերազմում զոհված ժամկետային զինծառայող Մխիթար Գալեյանի հոր՝ Գարիկ Գալեյանի։ Անցած տարվա նոյեմբերին ոստիկանությունը դիմել էր վարչական դատարան՝ ՎԻՎ ՀՀ օրենսգրքի 182-րդ հոդվածի պահանջով վարչական պատասխանատվության ենթարկելու պահանջով։

Հայցվորը դատարան ներկայացրած հայցադիմումով հայտնել է, որ 2022 սեպտեմբերի 21-ին` ժամը 06:00-ից, Հայաստանի Հանրապետության ոստիկանության Երևան քաղաքի վարչության կայազորի վերակարգերը ծառայություն են իրականացրել Երևան քաղաքում՝ Մալաթիա-Սեբաստիա վարչական տարածքում, հասարակական կարգի պահպանության, հասարակական կարգի անվտանգության ապահովման համար: Ժամը 06:55-ի սահմաններում, մի քանի քաղաքացիներ, այդ թվում՝ Գարիկ Մեխակի Գալեյանը, գտնվելով Երևան քաղաքի «Եռաբլուր» զինվորական պանթեոնում՝ իրականացրել են բողոքի ակցիա՝ հանրահավաք: Ծառայություն իրականացնող ոստիկանության ծառայողները Ա. Ավանեսյանից պահանջել են դադարեցնել գործողությունները, տրվել է ողջամիտ ժամկետ՝ հեռանալ նշված վայրից, սակայն Գարիկ Գալեյանը շարունակել է իր գոծողությունները, շարունակել են հանրահավաքը՝ խոչընդոտելով հասարակական կարգի պահպանության և հասարակական անվտանգության նկատառումներով իրականացվող ծառայությանը:

Հիշեցնենք, որ գործի քննությունն ավարտվել է  փետրվարի 15-ին, որոշումը հրապարակվել է երեկ՝ մարտի 7-ին։ Որոշումն օրինական ուժի մեջ է մտնում հրապարակման պահից մեկ ամիս հետո և նույն ժամկետում կարող է բողոքարկվել վերաքննության կարգով՝ ՀՀ վերաքննիչ վարչական դատարան:

«Վերը նշված իրավական և փաստական հանգամանքների վերլուծության արդյունքում դատարանը գալիս է այն եզրակացության, որ տվյալ դեպքում վիճելի է մնում ոստիկանության ծառայողի կողմից Գարիկ Գալեյանին օրինական պահանջ ներկայացված լինելու հանգամանքն, իսկ դրա ապացուցման բեռը կրում է հայցվոր կողմը, հետևաբար, նա է կրում նաև այդ փաստի չապացուցման բացասական հետևանքները:

Այսպիսով, ամբողջ վերագրյալի հիման վրա դատարանը գտնում է, որ վարչական իրավախախտման արձանագրության մեջ նշված արարքը` Երևան քաղաքի «Եռաբլուր» զինվորական պանթեոնում ոստիկանության ծառայողի կողմից ներկայացված օրինական պահանջը չկատարելը տեղի չի ունեցել, քանի որ դատաքննությամբ չի հիմնավորվել, թե ինչ պահանջ է ներկայացվել, ըստ այդմ՝ նաև չի հիմնավորվել ոստիկանության ծառայողի կողմից Գարիկ Գալեյանին պահանջ ներկայացրած լինելու հանգամանքը, որպիսի պայմաններում բացակայում է Վարչական իրավախախտումների վերաբերյալ ՀՀ օրենսգրքի 182-րդ հոդվածով նախատեսված արարքը` օրինական պահանջի չկատարումը:

ՀՀ վարչական դատավարության օրենսգրքի 216-րդ հոդվածի 4-րդ մասի համաձայն՝ սույն օրենսգրքի 214-րդ հոդվածով նախատեսված գործերով վարչական դատարանը որոշում է կայացնում անձին վարչական պատասխանատվության ենթարկելու կամ հայցադիմումը մերժելու մասին:

Վերոգրյալի հիման վրա դատարանը գտնում է, որ Հայաստանի Հանրապետության ոստիկանության հայցն անհիմն է և ենթակա մերժման»,-մասնավորապես ասված է որոշման մեջ։