Ձեր վստահելի աղբյուրը

Ռուսաստանի, Թուրքիայի և Սիրիայի փոխարտգործնախարարների մակարդակով տեխնիկական բանակցություններ կանցկացվեն հաջորդ շաբաթ Մոսկվայում՝ քննարկելու երեք երկրների արտգործնախարարների հանդիպման կազմակերպման հարցը։ ՏԱՍՍ-ը հայտնում է որ այդ մասին չորեքշաբթի օրը հայտարարել է Թուրքիայի արտգործնախարար Մևլութ Չավուշօղլուն իր իրանցի գործընկեր Հոսեյն Ամիր Աբդոլլահիանի հետ բանակցություններից հետո կայացած մամուլի ասուլիսում։

«Առաջին հանդիպումը կայացել է եռակողմ ձևաչափով (երեք երկրների զինվորականների ներկայացուցիչների միջև ): Իրանի արտգործնախարարն ասաց, որ իրենք կցանկանային մասնակցել այդ հանդիպումներին: Մեր՝ Թուրքիայի տեղանկյութնից, վատ բան չկա դրանում»,-ասել է Չավուշօղլուն և հավելել.«Մենք ռուսներին ասել ենք նաև, որ Իրանի մասնակցության հետ կապված խնդիրներ չկան։ Արտգործնախարարների հանդիպման աշխատանքները շարունակվում են։ Այն կանցկացվի քառակողմ ձևաչափով։ Ռուսաստանն առաջարկել է տեխնիկական հանդիպում անցկացնել։ Այս աշխատանքի շրջանակներում մեր փոխնախարարը կմասնակցի հաջորդ շաբաթ Մոսկվայում կայանալիք հանդիպմանը»:

Մինչդեռ Մերձավոր Արևելքի և Աֆրիկայի հարցերով ՌԴ նախագահի հատուկ ներկայացուցիչ, փոխարտգործնախարար Միխայիլ Բոգդանովն ավելի վաղ ՏԱՍՍ-ին ասել էր, որ նախապատրաստական փուլում է Ռուսաստանի, Թուրքիայի, Սիրիայի և Իրանի արտգործնախարարների հանդիպումը։