Ձեր վստահելի աղբյուրը

«2018 թվականից մշտապես, կարծես թե հետևողական, սկսվեց դատական իշխանությունը հեղինակազրկելու, նսեմացնելու պրոցեսը»,- ասուլիսում ասաց Բարձրագույն դատական խորհրդի որոշմամբ լիազորությունները դադարեցված դատավոր Զարուհի Նախշքարյանը։

Նրա խոսքով, հասկանալի է, որ այդ բոլորը կատարվում է  պետական մակարդակով։

«Կարգապահական  վարույթները շեշտակի աճեցին, իսկ վերջին կես տարվա ընթացքում առհասարակ մենք կարող ենք համոզվել, որ որևէ մեկը, անկախ  նրանից, թե որքան բարեխիղճ է նա աշխատում, որքանով է  փորձում ժամկետները պահել,  որն անհնար է այս պայմաններում, որքանով է զերծ մնում բոլոր կոռուպցիոն  ռիսկերից, այնուամենայնիվ, բոլոր դատավորները վտանգված են, և արդարադատության նախարարի կողմից կարգապահական վարույթ հարուցելու գործիքը  դարձել է շատ կոնկրետ մահակ յուրաքանչյուր դատավորի համար»,- ասաց Զ. Նախշքարյանը։

Նա նշեց, որ կարգապահական վարույթի հարուցումը սպառնում է  անխտրի բոլորին, բայց ընտրովի սկզբունքով։

«Խնդիրն այն չէ, որ կարգապահական վարույթներ են հարուցվում, այլ նրանում է, որ դա դարձել է գործիք, ընտրովի գործիք։ Այսինքն, եթե ԲԴԽ նախագահը որևէ մեկին չի սիրում, չի հավանում, տարբեր պատճառներ կարող են լինել, կարող է  կարգապահական վարույթ հարուցվել և այդ դատավորն այլևս դադարի իր գործունեությունը։ Այսինքն, միայն այն պառճառով, որ դուր չի գալիս ինչ-որ մեկին, օրինակ,  արդարադատության նախկին նախարարին, ներկայիս ԲԴԽ նախագահին։

Քանի որ այն դատավարական խախտումները, որոնք դատավորները թույլ են տալիս, դատավորների մեղքով չէ, դա այն բարեփոխումների բացակայությունն է, որով պետք է  բացը լրացվեր, չէ՞ որ հաշվարկելի են գործերի հետագա հոսքերը, ավելանալու տենդենցը»,- ասաց  Զարուհի Նախշքարյանը։

Նա նշեց, որ անհրաժեշտություն կար ԲԴԽ-ին, արդարադատության նախարարին, օրենսդիր իշխանությանը չքննադատել, եթե ինքը չքննադատեր, միգուցե իր ներկայությունը դատական համակարգում հանդուրժվեր։

«Իմ համար հասկանալի ու ընդունելի է, որ իմ լիազորությունները դադարեցվել են իմ գաղափարների համար»,- ընդգծեց Զարուհի Նախշքարյանը։

Լիազորությունները դադադեցված դատավորը նշեց, որ ինքը մշտապես բարձրաձայնել է, նաև ԲԴԽ նախագահ Կարեն Անդրեասյանի հետ առանձնազրույցում, քանի դեռ Երևանի քաղաքացիական  դատարանում ծանրաբեռնվածության  խնդիրը չի լուծվել, կարգապահական  վարույթները պետք է սահմանափակել կամ զերծ մնալ այդ հիմքով կարգապահական վարույթների հարուցումից կամ պատիժ նշանակելուց, քանի դեռ խնդիրն օրենսդրորեն լուծում չի ստացել։

Հարցին՝ ինչպիսի՞ն է եղել Կ.Անդրեասյանի արձագանքը, Նախշքարյանն ասաց. «Ես չեմ կարող բարձրաձայնել այն, ինչ  պարոն Անդրեասյանի հետ առանձնազույցում լսել եմ, բայց, համենայնդեպս, ինչպես հետագա ընթացքը ցույց, տվեց իմ առաջարկը, հորդորն այս մասով մնաց անհետևանք»։

Նա հիշեցրեց, որ իր նկատմամբ կարգապահական վարույթի քննությանը ԲԴԽ նախագահն ինքնաբացարկ էր հայտնել այն պատճառաբանությամբ, որ Դիլիջանում դատավորների հետ հանդիպումների ընթացքում առանձնազրույցի արդյունքում նրա մոտ ձևավորվել է  կանխակալ վերաբերմունք Նախշքարյանի նկատմամբ, որը բացառում է  իր մասնակցությունը դատավորի վերաբերյալ կարգապահական վարույթին, ու ինքնաբացարկ հայտնեց։

Ասուլիսին ներկա  Զ. Նախշքարյանի ներկայացուցիչ Սիրանուշ Սահակյանն ասաց, որ այստեղ իրենք կեղծ ազնվության հետ առնչվեցին. «Երբ  անձը խոստովանեց, որ կատարել է արտահայտություններ, որոնք  անհամատեղելի են իր անաչառության հետ և ինքը,  այո, բացասական  կանխակալ վերաբերմունք ունի Նախշքարյանի նկատմամբ։ Բայց հասկանալի պատճառով չշարունակեց ու չմանրամասնեց կանխակալության հիմքը։

Բայց, իմ գնահատականն է, որ այս կեղծ ազնվությամբ անվտանգության բարձիկներ է տեղադրել և  անմասն է մնացել մի արատավոր գործընթացից, որը հետևանք էր ունենալու։

Երբ ապագայում մենք կհասնենք միջազգային ատյանների կողմից հարցի  հանգուցալուծման և որոշման, ԲԴԽ 9 օգտագործված  անդամներն ունենալու են հետևանքներ, այդ հետևանքներից անմասն է մնալու պարոն Անդրեասյանը»։

Հիշեցնենք, որ Բարձրագույն դատական խորհրդի փետրվարի 27-ի որոշմամբ դադարեցվել են  Երևանի քաղաքի առաջին ատյանի  ընդհանուր իրավասության  քաղաքացիական դատարանի դատավոր Զարուհի Նախշքարյանի լիազորությունները  էական  կարգապահական խախտումի հիմքով։

Զ. Նախշքարյանի ներկայացուցիչ Ռուբեն Մելիքյանը հայտնեց, որ ԲԴԽ որոշման առնչությամբ իրենք օգտագործելու են իրենց հասու բոլոր գործիքները՝ ՄԻԵԴ դիմելու կամ չբացառեց նաև  ներպետական գործիքների կիրառումը, օրինակ,  ՍԴ դիմել, թեև մեծ վստահություն չունեն ՍԴ  գործունեության արդյունավետության մասով։