Ձեր վստահելի աղբյուրը

Գերմանիայի Կարլսրուե քաղաքում անհայտ անձը պատանդ էր վերցրել երկու մարդու և նրանց ազատ արձակելու համար «յոթանիշ փրկագին» էր պահանջում: Լուրը հայտնել էր Stuttgarter Zeitung թերթը, որին անդրադարձել  «Գազետա ռու»-ն։

«Մեր տեղեկություններով՝ խոսքը հրազենով պատանդառուի, ենթադրաբար երկու պատանդի մասին է։ Միջադեպի վայրը Կարլսրուեի կենտրոնում է՝ գլխավոր փողոցներից մեկում։ Տեղի բնակիչներն ասում են, որ կրակոցներ են լսել»,-գրել էր թերթը։

Ավելի վաղ հաղորդվել էր, որ Կարլսրուեի ոստիկանությունը լայնամասշտաբ գործողություն է իրականացնում քաղաքի կենտրոնում գտնվող դեղատանը պատանդ վերցնելու դեպքի պատճառով։

Տեղի ոստիկանության տվյալներով՝ իրավապահները կապի մեջ էին հանցագործի հետ,  բնակչությանը վտանգ չէր սպառնում։ պատանդառուի հետ կապի մեջ էին մասնագետները, որոնք հատուկ պատրաստված են պատանդների հետ իրավիճակներում բանակցելու համար: Ըստ լրատվամիջոցի՝ «մարտավարական նկատառումներից ելնելով» քննիչները և իրավապահները մանրամասներ չէին հայտնել։

Ավելի ուշ հայտնի դարձավ, որ ոստիկանությունը կալանավորել է անհայտ հանցագործին:

«Ժամը 21.10-ին հատուկ ջոկատայինները մտել են դեղատուն: Կասկածյալ տղամարդը զինաթափվել և կալանավորվել է: Ներկայումս շենքը խուզարկվում է: Ըստ նախնական տեղեկությունների՝ զոհեր չկան»,- Twitter-ում հայտնել են Կարլսրուեի ոստիկանությունից: