Ձեր վստահելի աղբյուրը

«Այսօրվա շրջանակներում դուք պնդումներ եք կատարում, որոնք բացարձակ իրականություն չեն: Սահմանադրության հետ կապված՝ ո՞վ է խանգարել քաղաքական իշխանություններին, կառավարության ղեկավարին՝ Նիկոլ Փաշինյանին, որպեսզի չխախտի Սահմանադրությունը»,-ԱԺ Պետական-իրավական հարցերի մշտական հանձնաժողովում հայտարարեց «Հայաստան» խմբակցության քարտուղար Արծվիկ Մինասյանը՝ դիմելով արդարադատության նախարար Գրիգոր Մինասյանին:

Նախարարը ներկայացրեց «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցը, որի ժամանակ հիշատակեց մի շարք թերություններ, որոնք եղել են նախորդ իշխանությունների տարիներին՝ հիշատակելով նաև Սահմանադրության թերությունները:

«Պարո՛ն Մինասյան, թույլ տվեք չհամաձայնել ձեր տված մի շարք գնահատականների  հետ, երբ համեմատություն եք անում նախկին իրավիճակի հետ: Միևնույն ժամանակ նկատեմ, որ, եթե նախկինում ամեն ինչ լավ լիներ՝ վստահաբար այսօրվա քաղաքական իշխանությունը իշխանության չէր գա: Ուրեմն եղել էին նաև պրոբլեմներ, բայց անընդհատ համեմատել նախիկնում եղածի հետ, չեմ կարծում, որ ճիշտ է»,-ասաց պատգամավորը և շեշտեց, որ պետք է առաջ նայել՝ այսօրվա ստեղծված մարտահրավերներին:

Որպես իշխանությունների կողմից օրենքների և Սահմանադրության խախտում՝ ընդդիմադիր պատգամավորը բերեց Գրիգոր Մինասյանի՝ նախարար նշանակվելու օրինակը, որը երկար ժամանակ արդարադատության նախարարի տեղակալի պաշտոնում էր, երբ գերատեսչությունը նախարար չուներ:

Արծվիկ Մինսյանը փաստեղ, որ «Կառավարության կազմի և կառուցվածքի մասին» օրենքում ամրագրված է, որ երբ նախարար է փոփոխվում՝ կա՛մ նախարարի թեկնածուն միաժամանակ պետք է ներկայացվի, կամ 15 օրվա ընթացքում:

«Դուք քանի՞ ամիս եք պաշտոնակատար եղել, և այս պարտականությունը դրված էր վարչապետի վրա, որը խախտել է»,-ասաց պատգամավորը և հավելեց. «Սահմանադրությամբ իշխանությունները բաժանված և տարանջատված են, ո՞վ է ստիպում գործադիր մարմնի ղեկավարին հրահանգել շրջափակել դատական իշխանության շենքերը, նախկինները չէին չէ՞, այսօրվա իշխանություններն  էին»,-ասաց նա:

Արծվիկ Մինասյանը հայտնեց, որ սահմանադրական կարգավորումների շրջանակներում բազմաթիվ դրույթներ կան, որոնք այսօր ոտնահարվում են, առհամարվում՝ սկսած մարդկանց հիմանկան իրավունքներից, ավարտված պետական կառավարման համակարգով:

«Հաշվետվողականության, թափանցիկության առաջին խախտողն ու ոտնահարողը գործադիր իշխանությունն է: Պատգամավորական հարցումը, որը պաշտպանված է Սահմանադրությամբ և ԱԺ պանոնակարգ և պատգամավորի մասին սահմանադրական օրենքներով, խախտվում է: Նախորդ տարվա հոկտեմբեր ամսից գրավոր հարցում ենք ուղարկել, մինչև այսօր կառավարությունը՝ առռը հա, թե կպատասխանի, ոչ մի պատասխան չի տալիս»,-հայտարարեց պատգամավորը և նշեց, որ այն օրենքի խախտում է և հարց տվեց, թե բացի քաղաքական բարձրաձայնումից նման դեպքերում ո՞ւմ պետք է պատգամավորները բողոքեն, երբ ԱԺ ամբիոնից 3 անգամ բարձրաձայնել է, բայց վարչապետի աշխատակազմն անհաղորդ է մնում»:

Նա ասաց, որ գիտի, թե ինչու չեն պատասխանում, քանի որ այն իշխանության նախընտրական ծրագրում և կառավարության ծրագրային կատարողականի զեկույցում ձևակերպված դրույթներին է վերաբերում, թե ինչո՞ւ են հրաժարվում «Արցախի Հանրապետություն» բառակապակցությունից և «Ինքնիշխանություն»  բառից :

«Խոսել մի իշխանության մասին, որն ամեն օր ոտնահարում է Սահմանադրությունը, օրենսդրական պահանջները և ասել, որ այդ իշխանությունը սրբորեն պաշտպանում է այս հիմնարար կանոները՝ ես կոնկրետ օրինակներով ու փաստերով բերեցի, որ այդպես չէ: Եթե կատարյալ չես, ապա չես կարող դիմացինին մեղադրել անկատարության մեջ, ինչի մասին խոսեց արդարադատության նախարարը»,-հայտարարեց «Հայաստան» խմբակցության քարտուղարը:

Նա արդարադատության նախարարի զեկուցից մեջբերեց հատված, որում ասվում էր, որ 2022 թվականին  քրեակատարողական հիմնարկներում պահվել է 2265 անձ, որոնցից 1055-ը եղել են դատապարտյալ, 1210-ը կալանավորված:

«Այսինքը 50%-ից ավելին կալանավորումներ են եղել, հիմա այդ կալանավորումը պատժի տեսա՞կ է եղել, թե՞ խափանման միջոց»,-ասաց նա և հիշեցրեց, որ հաճախ չհիմնավորված ձևով անձի նկատմամբ կատարվում է կալանավորում, բայց իրական նպատակն անձին պատժելն է և որևէ մեկն ապօրինի կալանավորման համար պատասխանատվության չի ենթարկվում:

Պատգամավորը նաև հայտարարեց, որ 7 անգամ դատական միջնորդություն է արվել, բայց քանի որ խոսքը վերաբերում է Նիկոլ Փաշինյանին, ապա 6-ը մերժվել է մեկը՝ մասնակի բավարարվել:

«Ասում են՝ եթե անձնավորված եք դիմում, մարդու անունը գրում եք, մենք պրոբլեմ ենք ունենում, չենք կարողանում ընթացք տալ դիմումին: Սա՞ է իրավական պետությունը»,-հայտարարեց Արծվիկ Մինասյանը:

Հանձնաժողովի նախագահ Վլադիմիր Վարդանյանը հայտնեց, որ եթե նման բան ասել է դատաիրավական համակարգի ներկայացուցիչը, ապա պետք է անուն հնչեցվի, քանի որ այն կոնկրետ հետևանք պետք է ունենա:

Արծվիկ Մինսյանը պատասխանեց, թե լավ գիտի, թե հանցագործության մասին հաղորդումը որտեղ է տրվում: