Ձեր վստահելի աղբյուրը

«Մեր կազմակերպության անդամ ընկերություններն ակտիվ մասնակցություն ունենալով նման քննարկումներին՝ այնուամենայնիվ, դեռ ունեն դժգոհություններ, որոնք արտահայտել են նամակի միջոցով և ներկայացրել ենք որոշակի մտահոգություններ մեր բիզնես-համայնքի կողմից»,-ԱԺ ֆինանսավարկային և բյուջետային հարցերի մշտական հանձնաժողովի հերթական նիստում հայտնեց Ամերիկայի առևտրի պալատի գործադիր տնօրեն Լիլիթ Գևորգյանը:

Վերջինս հրավիրվել էր ՊՔ-ական պատգամավոր, նույն հանձնաժողովի նախագահ Գևորգ Պապոյանի հեղինակած օրենքի նախագծի քննարկմանը, որով առաջարկվում է արգելել արտարժույթով հիպոթեկային վարկերի տրամադրումը:

Լիլիթ Գևորգյանը նշեց, որ այդ մտահոգությունները համատեղ ներկայացրել են վարկային կազմակերպությունները միավորող կազմակերպության հետ:

«Երբ ռիսկը հանում ես քաղաքացու վրայից և տանում ես ֆինանսական ոլորտ, այնտեղի ինստիտուտների վրա՝ իրենք, այդ ռիսկը կառավարելով, որոշակի ծախսեր են անում դրա վրա և ծախսեր են ավելացնում նաև վարկի վրա»,-բացատրեց Գևորգյանը:

Նա ասաց, որ Պապոյանի առաջարկած նախաձեռնությունը նման է այն գործողություններին, երբ ավելացված արժեքի հարկով պետությունը փորձում է քաղաքացիներին որոշ վնասակար հաճույքներից՝  խաղամոլությունից, ծխելուց և ալկոհոլ օգտագործելուց կտրել:

«Երբ ավելացնում ես հարկերը, այդ բոլոր հարկերը վերջին հաշվով վճարում է սպառողը, ո՛չ ընկերությունը, ո՛չ էլ ֆինանսական ինստիտուտն է այդ հարկերն իր վրա վերցնում: Նույն տրամաբանությունը կա նաև այստեղ, երբ  ռիսկը փոխանցվում է ֆինանսական ինստիտուտին, ապա այն համապատասխան չափով այդ ռիսկերի կառավարումն ներառում է իր ծախսերի մեջ»,-բացատրեց Ամերիկայի առևտրի պալատի գործադիր տնօրենը:

Լիլիթ Գևորգյանը հայտնեց, որ արտարժույթով վարկերի տրամադրման արգելքի մասով բանկերն ավելի քիչ ռիսկեր ունեն, քանի որ նրանք ֆինանսական շուկայից դրամական միջոցներ ներգրավելու և տեղաբաշխելու այլ հնարավորություններ ու գործիքներ ունենալով, կարող են ավելի լավ կառավարել այդ ռիսկերը:

«Վարկային կազմակերպություններն այս փոփոխությունից մի քիչ անշահավետ վիճակում են հայտնվում, քանի որ նրանց միակ ֆունկցիան և լիցենզիայով տված հնարավորությունն է վարկեր տալ և, այդ գործընթացում վարկառուի նախընտրություններից ելնելով, կա՛մ դոլարով այն տալ, կա՛մ դրամով: Այսօրվա դրությամբ այս փոփոխություններն ինչքան էլ լավ նպատակներ ունենան, ամեն դեպքում, նույն քաղաքացուն դնում է ոչ շահեկան դրության մեջ, քանի որ վարկային կազմակերպություննրեը, որպեսզի կարողանան մրցակցել՝ մի կողմից ավելի բարձր տոկոսով են առաջարկելու վարկերը, իսկ բանկերը եթե ավելի շահավետ պայմաններով առաջարկեն, ապա վարկային կազմակերպությունները շուկայից դուրս են մղվելու: Վարկային կազմակերպությունները որպես բիզնես շատ անշահավետ անմրցունակ վիճակում են հայտնվելու»,-փաստեց գործադիր տնօրենը:

Նա նաև կարծիք հայտնեց, որ ԿԲ-ն կամ գործադիրը եթե ունենան վարկային կազմակերպությունների և բանկերի մրցակցությունը հավասարակշռող գործիք, ապա ավելի հեշտ կլինի կառավարել օրենսդրական փոփոխության ռիսկերը:

Հանձնաժողովի նախագագ Գևորգ Պապոյանը հայտնեց, որ Լիլիթ Գևորգյանի ելույթի ժամանակ մտել է համացանց, նայել  վարկային կազմակերպություններից մեկի եկամուտները և պարզել, որ սպառողական վարկի տարեկան փաստացի տոկոսադրույքը 452-515 %-է:

«452-515 % տարեկան փաստացի տոկոսադրույքով վարկ տվող կազմակերպության շահերի պաշտպանության լավագույն կետն հաստատ այս հանձնաժողովը չէ: Ես ուղիղ եթերում խոստանում եմ, որ այս հարցով զբաղվելու եմ, մեր քաղաքական հանձնառությունը պետք է լինի այս հարցով զբաղվելը»,-հայտարարեց ՔՊ-ական պատգամավորը և հավելեց, որ իր առաջնային նպատակը ՀՀ քաղաքացիների շահրեն են:

Լիլիթ Գևորգյանը հիշեցրեց, որ հանձնաժողովում քննարկում են հիպոթեկային վարկի տոկոսները, ոչ թե՝ սպառոականինը:

Քննարկման մասնակիցները հիշեցրեցին, որ վարկային կազմակերպությունների ռիսկերն ավելի մեծ է, քանի որ նրանց վարկային պորտֆելով արտարժութային վարկերը 45-50 % են կազմում, այն դեպքում երբ՝ բանկերում մոտ 10 % է, մյուս կողմից էլ օերնսդրական նախաձեռնությունը վարկերի տոկոսը կբարձրացնի: