Ձեր վստահելի աղբյուրը

«Ագրոքիմիկատներ ու պեստիցիդներ ներկրողները հայտնվել են ցայտնոտային վիճակում։ 700 տոննա թունաքիմիկատ գտնվում է մաքսային պահեստներում, թույլ չեն տալիս ներկրել»,-այսօր հայտարարեցին ՍԱՏՄ շեքի դիմաց բողոքի ակցիա իրականացնող քաղաքացիները։

Ներկրողներից մեկը մանրամասնեց, որ նախկինում ներկրվող ագրոքիմիկատներն այժմ չեն կարողանում ներկրել, քանի որ ՍԱՏՄ ղեկավարն անցած տարվա նոյեմբերի 28-ին որոշում է կայացրել, որի շուրջ ներկրողների հետ որևէ քննարկում չի եղել։ Այն ներկայացվել է արդեն որպես փաստ։

Բողոքի ակցիա իրականացնողները նշում են, որ դիմել են կառավարություն, ներկայացրել խնդիրը, սակայն որևէ լուծում չի առաջարկվել։  Մինչդեռ թունքաիմիկատները կարող են դառնալ ժամկետանց, իսկ ներկրողները սնանկանան։

«Հիմա գործադիրի հետ քննարկումների մեջ ենք, հետո կդիմենք դատարան։ ՍԱՏՄ-ն փոփոխություններ է կատարել, որը հակասում է Հայաստանի Սահմանդրությանը, «Բուսասանիտարիայի մասին» օրենքին։ Եթե մինչ այս ներկրման դեպքում եղել է նշված գրանցող երկիր, ապա սյունակում նշվում է արտադրող երկիրը, ինչը ներկրման համար խոչընդոտներ է ստեղծում»,-ասաց ակցիայի մասնակիցը։

Թե ինչու է նման փոփոխություն իրականացվել, ներկրողները դժվարանում են ասել։
«Այս պահին խնդիր ունեն ներկրողները, մի քանի օրից խնդիր կունենան ֆերմերները, իսկ վերջնարդյունքում՝ սպառողները»,-նշեց ներկրողը։

ՍԱՏՄ խոսնակ Անուշ Հարությունյանը բողոքի ակցիայի մասնակիցներին առաջարկեց գրավոր ձևակերպել բողոքն ու ներկայացնել տեսչական մարմնին, քանի որ այս պահին չունեն ակցիայի մասնակիցների ձևակերպված պահանջները։

Բողոքի ակցիայի մասնակիցներն ասացին՝ կառավարության, էկոնոմիկայի նախարարությանն ուղղած դիմումները վերահասցեագրվել են տեսչական մարմնին, բացի այդ մի քանի անգամ գրավոր դիմում են ներկայացրել ՍԱՏՄ-ին, ինչին ի պատասխան ստացել են նույն գրությունը։ Դիմել են նաև դիմում բոլոր ներկրողների անունից։

Նրանց խոսքով, այս պահին 13 ներկրողների բերած թունաքիմիկատները գտնվում են պահեստներում, մինչդեռ գյուղատնտեսությունը չի սպասում որոշումներին, նամակների պատասխաններին, սա բերելու է ճգնաժամի, վաղը այդ խնդրի հետևանքով հնարավոր է  հանրապետությունում կարտոֆիլ, ծիրան չլինեն։

«Շվեյցարական ընկերության Անգլիայում արտադրած ապրանքը մնացել է պահեստներում, հիմա ասում եք, նորից դիմում գրեք։ Որ գրենք, արտադրող երկիրը փոխվելո՞ւ է»,-ասացին ակցիայի մասնակիցները։

«Խնդրում եմ ևս մեկ դիմում գրել, համախմբել բոլոր պահանջները»,-ասաց ՍԱՏՄ խոսնակը։

«Դեկտեմբերից դիմում ենք գրում, մինչ այսօր լուծում չի եղել։ Պետք է էլի ժամանակ ձգե՞ք»,-հակադարձեցին  նրանք՝ ներկայացնելով մի քանի առաջարկ, օրինակ, ՍԱՏՄ նոր ղեկավարը պետք է վերնայի նախկինի ընդունած որոշումը, կամ մի քանի ամսով հետաձգեն որոշմնա գործողությունը, կամ օրինակ, որոշումը չտարածվի մինչև դրա ընդունումը ներկրված թունաքիմիկատների վրա։

ՍԱՏՄ ներկայացուցիչը ևս մեկ անգամ խնդրեց դիմում գրել։