Ձեր վստահելի աղբյուրը

«Ես կցանկանայի, որ մենք միշտ թերահավատությամբ վերաբերվեինք այն արտահոսքերին, որոնք վերաբերում են  կոնֆիդենցիալության ոլորտին»,-ասուլիսում հայտնեց Նիկոլ Փաշինյանը՝ պատասխանելով լրագրողի հարցին, թե ընդդիմությունը փաստաթուղթ է շրջանառել, որը խոսում է, որ Հայաստանի համար ընդունելի է մի տարբերակ, որտեղ կա հետևյալ ձևակերպումը. «Լեռնային Ղարաբաղի հայերի անվտանգություն և իրավունքներ, որը կհամապատասխանի Ադրբեջանի սահմանադրությանը»:

Նա հավաստիացրեց, որ այդպիսի դեպքեր նախկինում էլ եղել են և հնարավոր է Ա4 ֆորմատի թղթի վրա տեքստ հրապարակվի և պնդեն, որ այն պաշտոնական քննարկվող է:

«Շատ դեպքերում կառավարությունը կարող է սահմանափակված լինել այդ թղթերի վերաբերյալ տեղեկություններ հրապարակելուց, որովհետև ստիպված պետք է լինի այլ մանրամասներ բացահայտել այն հիմնավորելու համար, իսկ այդ մանարմասների բացահայտումը արտաքին հարաբերությունների ոլորտում խնդիրներ է առաջացնում»,-բացատրեց Փաշինյանը:

Նա առաջարկեց արձանագրել փաստեր և հիշեցրեց, որ ՀՀ-ն և Ադրբեջանը պայմանավորվել են, որ ճանաչում են միմյանց տարածքային ամբողջականությունը:

«Ուզում եմ պարզ լինենք: Ինչու ենք մենք ճանաչում Ադրբեջանի տարածքային ամբողջականությունը, որովհետև, եթե մենք չենք ճանաչում Ադրբեջանի տարածքային ամբողջականությունը, ապա վերջինս էլ չի ճանաչում մեր տարածքային ամբողջականությունը: Այլ խնդիր է, որ երբ մենք ճանաչում են Ադրբեջանի տարածքային ամբողջականությունը՝ վերջինս այլ դռնով կամ խողովակով փորձում է Հայաստանի տարածքային ամբողջականությունը չճանաչելուն ուղղված գործողություններ իրականացնել»,-հայտարարեց ՀՀ գործադիր մարմնի ղեկավարը:

Անդրադառնալով ԼՂ-ի կարգավիճակին՝ Փաշինյանն ասաց, որ այն հրապարակային դիրքորոշումները, որ արտահայտել է հայկական կողմը, դրանք շարունակում են մնալ նույնը:

«Այն է՝ Լեռնային Ղարաբաղի ժողովրդի անվտանգության և իրավունքների հարցը պետք է հասցեագրվի և հարցի առաջնային շահառուն պետք է լինի ԼՂ-ի ժողովուրդը և այն միջազգային մեխանիզմներով պետք է դիտարկվի Բաքու-Ստեփանակերտ հարթության մեջ: Ես կարծում եմ, որ այս ձևակերպումները տալիս են բոլոր հնարավորությունները, որպեսզի մենք հասցեագրենք ՀՀ-ի ազգային շահերը, և լիարժեք կերպով հասցեագրենք նաև ԼՂ-ի ժողովրդի ամվտանգության և իրավունքի հարցերը»,-ասաց Փաշինյանը:

Նա առաջարկեց չքննարկել առանձին պարբերություններ, քանի որ որևէ փաստաթուղթ մի պարբերությունից բաղկացած չէ՝ բացատրելով.  «Որովհետև կարող է լինի պարբերություն, որ մեզ թվա, որ գրված է սա, բայց մեկ ուրիշ տեղ գրված լինի պարբերությունը, որը 180 աստիճանով պտտի այդ պարբերության իմաստը, որը մենք տեսել ենք ԼՂ-ի բանակցային ողջ գործընթացում»:

Անդրադառնալով ՀԱՊԿ-ի գլխավոր քարտուղարի տեղակալի պաշտոնից հրաժարվելու որոշմանը՝ Փաշինյանը հայտեց, որ երբ 2022 թվականին ՀԱՊԿ նախագահն այցելել էր Հայաստան, նա իր հետ զրույցում ասել է, որ ՀԱՊԿ-ում մտավախություն կա, որ ՀՀ-ն դուրս կգա կազմակերպությունից:

«Ես ասացի՝ գիտեք, կարծում եմ, որ այդ մտավախությունը տեղին չէ, տեղին է այլ մտավախություն, որն առկա է ՀՀ-ում: Մտավախություն կա, որ ՀԱՊԿ-ը դուրս կգա ՀՀ-ից և իմ գնահատականն այն է որ ՀԱՊԿ-ը ցանկանալով, թե չցանկանալով դուրս է գալիս ՀՀ-ից և այն մեզ անհանգստացնում է»,-հայտարարեց նա և, վստահեցնելով, որ այդ ամենը հրապարակային են եղել և հայկական կողմի մտավախություններն արտահայտվում են տարբեր կերպ, հավելեց. «Մենք հաճույքով կստանձնենք ՀԱՊԿ-ի գլխավոր քարտուղարի տեղակալի պաշտոնը, եթե այդ պաշտոնի ստանձմամբ չստացվի, որ մեր ժողովրդին  սխալ ուղերձ ենք հղում: Եթե այն նշանակի ՀՀ-ի անվտանգության ապահովմանը ևս մեկ գործոնի ավելացում, եթե այն դա չի նշանակելու, մենք նման քայլի իմաստը չենք տեսնում՝ առնվազն մեր ժողովրդի հետ ազնիվ լինելու տրամաբանությունից ելնելով: Բոլորդ վկա եք, թե մենք ինչքան երկար և հետևողական ենք աշխատել ու շարունակում ենք աշխատել ՀԱՊԿ-ի հետ»:

Փաշինյանը հայտարարեց, որ կազմակերպության շրջանակներում Հայաստանը սկզբունքներ է առաջ քաշել, որը ՀՀ-ի մասին չէ:

«Այն նրա մասին է, թե առնվազն ՀՀ-ի տարածքում ՀԱՊԿ-ն գործում է, թե չի գործում, կա, թե չկա: Մենք պատրաստ ենք և ուզում ենք առերեսվել այս հարցին:

Հիշո՞ւմ եք՝ մեզ ասում եին ՀՀ-ի բանակը չի կռվում՝ ՀԱՊ-ից են ուզում, որ գա մեզ պաշտպանի: 2022 թվականի սեպտեմբերի ռազմական բախումներ տեղի ունեցան և հայտարարեցին, որ ՀՀ -ն դիմել է ՀԱՊԿ-ին, բայց՝ սխալ հոդվածով, 4-րդով պետք է դիմեր, բայց 2-րդ հոդվածի 3-րդ պարբերության 6-րդ նախադասությամբ է դիմել և հատուկ են արել, որ ՀԱՊԿ-ը եթե ոզենա էլ չկարողանա որոշում կայացնել»,-ասաց Փաշինյանը և վստահեցրեց, որ Հայաստանը ՀԱՊԿ-ին դիմել է բոլոր հնարավոր հոդվածներով: