Ձեր վստահելի աղբյուրը

Բրյուսովի անվան լեզվագիտական համալսարանում իրավիճակը կրկին լարված է։ Համալսարանի ռեկտորի ժամանակավոր պաշտոնակատար է նշանակվել, ինչը մեծ դժգոհություն է առաջացրել ուսանողների, դասախոսների շրջանում։

Բուհի մոտ ոստիկաններ են եկել։ Դահլիճում ուսանողների հետ հանդիպմանը հայտարարվեց, որ ոստիկաննեը համալսարան են եկել դասախոսներից մեկի ահազանգով։ Հորդորեցին ուսանողներին խուճապի չմատնվել։

«ԲՊՀ 3 հոգանոց խորհուրդը սկսեց իր սև քայլերը, ինչի հետևանքով ԲՊՀ ուսանողությունը հայտարարել է դասադուլ»,-գրել է համալսարանի դասախոս Էռնեստ Ավանեսովը։

«Ուսանողները և դասախոսները բոյկոտում են ԿԳՄՍ նախարության ապօրինի որոշումը։ Բրյուսովում Դասադուլ և գործադուլ է: Պահանջում ենք չեղարկել որոշումը»,-գրել է համալսարանի ռեկտորի տեղակալ Ցոլակ Ակոպյանը։ 

Դահլիճում ուսանողների հետ հանդիպմանը դասախոսներից Խաչատրյանը նշեց. «Մեզ այսօր ապտակ է հասցվել, մեր, մեր ուսանողների կարծիքը հաշվի չի առնվել։ Կարծում եմ, պետք չէ անձնավորել, պետք է ամեն բան անել օրենքով»։

Դասախոս Տիգրան Թորոսյանը հայտարարեց, որ չի կարելի հինգ հազար մարդու, համալսարանի իրավունքները ոտնահարել։

«Չի կարելի համալսարանի հետ վարվել ինչպես մի չօգտագործվող պահեստի, երբ կուզենք կբացենք, երբ կուզենք՝ կփակենք։ Ոտնահարվել է ուսանողների, դասախոսների իրավունքները»,-հայտարարեց նա։

Այս պահին բազմաթիվ ուսանողներ համալսարանի բակում են՝ հրաժարվելով մտնել լսարաններ։ Բուհի դասախոսներն ու ուսանողները սպասում են ԿԳՄՍ նախարարության ներկայացուցիչերին։

Լուսանկարը՝ արխիվից։