Ձեր վստահելի աղբյուրը

«Հաշվետու ժամանակահատվածում ՀՀ ԶՈւ-ն համալրվել են տարբեր տեսակի ԱԹՍ-ներով, հակատանկային միջոցներով, ՀՕՊ միջոցներով և դրանց արդիականացված համակարգերով, թրթուրավոր և անվավոր ինժեներական տեխնիկայով, ականազերծման լրակազմով, քողարկման ցանցերով, ՌՔԿՊ կապի միջոցներով, ականանետերով, նռնականետներով, օպտիկական սարքերով, ջերմատեսիլ միջոցներով տարբեր տեսակի զինամթերքով և այլ տեսակի սպառազինության և ռազմական տեխնիկայի միջոցներով, որոնք այստեղ ներկայացնելու կարիք չեմ տեսնում»,-ԱԺ պաշտպանության և անվտանգության հարցերի հանձնաժողովի նիստում հայտարարեց պաշտպանության նախարար Սուրեն Պապիկյանը ներկայացնելով  «Հայաստանի Հանրապետության կառավարության ծրագրի (2021-2026 թթ.) 2022 թվականի կատարման ընթացքի և արդյունքների մասին» զեկույցի պաշտպանության հատվածը:

Նա տեղեկացրեց, որ 2022 թվականի հուլիսին ընդունված օրենսդրական փոփոխությունների արդյունքում վերանայվել են  պաշտպանության ոլորտում պետական կառավարման  մարմինների լիազորությունները, ռազմաուսումնական հաստատություններն ավարտած սպայական կազմի համար սահմանվել է անհատույց օգտագործման իրավունքով բնակարան ստանալու իրավունքը:

«2022 թվականի դեկտեմբերին ընդունված օրենսդրական փոփոխություններով սահմանվել է մարտական խնդիրների իրականացմանն առնչվող պայմանագրային զինծառայողների ատեստավորման նոր համակարգ, ինչպես նաև պարտադիր զինվորական ծառայությունից պայմանագրային զինվորական ծառայության փոխադրման նոր կարգ՝ «Պաշտպան հայրենյաց» ծրագիրը»,-հայտարարեց Պապիկյանը:

Նրա խոսքով՝ ընդլայնվել է նաև վարժական հավաքների անցկացման շրջանակը՝ դրանց տևողությունը 25 օր սահմանելու միջոցով մի քանի անգամ ավելի պահեստազորայիններ ընդգրկելու նպատակով:

«Մշակվել և հաստատման է ներկայացվել մի շարք ռազմավարական բնույթի և առաջնորդող փաստաթղթեր և նախագծեր»,-տեղեկացրեց նախարարը և հիշատակեց «Պաշտպանության մասին», «Կառավարության կառուցվածքի և գործունեության մասին», «Հանրային ծառայութունների մասին»  և այլ օրենքներում կատարված փոփոխությունները, որոնց միջոցով կանոնաարգվել է Զինված ուժերի գործունեությունը՝ գործառույթների արդյունավետության բարձրացման նպատակով: